Davidpa chõo p'oyaada
(2 Samuel 8.1-14)
18
1 Ma t'êepai David ichi soldaorã ome chõojida filisteorã soldaorã ome. David eere p'anadap'edaarãpa p'oyaajida. Gat p'uuru aù ik'aawa p'uuru k'aipee bee ome filisteorã juadeepa jãri atajida. 2 Ichiaba Moab eujãdepemaarã p'oyaajida. Maadamãiipa moabitaarãpa Davidmaa impuesto paapachida.3 Jamat p'uurude Davidpa ichiaba p'oyaaji Sobadepema rey Hadad Ezer, mãgà reypa jùrù bak'ãri eujã Éufrates to k'ait'a bada ichi–it'ee jãri atait'ee. 4 Mãgà rey p'oyaak'ãri, David eere p'anadap'edaarãpa mil carreta caballopa jidiupata jãri atajida. Ichiaba jita atajida soldaorã siete mil caballo ârù wãpata mãik'aapa veinte mil jîte wãpata. Caballo ma carreta jidiupatap'edaa peek'oo wãjida. Jîp'a cien chok'ai atabëijida carreta–it'ee.
5 Maap'eda Siria eujãdepemaarã, Damasco p'uurude p'anapatap'edaarã, wãjida ma Sobadepema rey Hadad Ezer k'aripade, David eere p'anadap'edaarã ome chõo jõnù misa. Mamîda Davidpa ãra ichiaba p'oyaaji. Veintidós mil peek'oojida. 6 Ma t'êepai Davidpa ichi soldaorã ûk'uru pëiji Siria eujãdee Damasco p'uuru jâa p'aneedamerã. Mãgá Siria eujãdepemaarã David jua ek'ari p'aneejida mãik'aapa irumaa impuesto p'aapachida. Chõoda chaa Tachi Ak'õrepa David eere p'anadap'edaarãmaa p'oyaapiji.
7 Ma Sobadepema rey Hadad Ezer p'oyaap'eda, Davidpa jãri ataji iru soldaorã poro waibùarãpa escudo nêedee ooda anipapatap'edaa mãik'aapa ma escudo ateeji Jerusalendee. 8 Ichiaba Sobadepema Hadad Ezer jua ek'ari p'anadap'edaa p'uuru Tebajde mãik'aapa Cunde bronce waibùa bada jãri ataji. Ma t'êepai, Salomonpa Tachi Ak'õre te oopik'ãri, ma broncedee oopiji p'aareerã jua, bùùrù sùùpari pailak'a bù mãik'aapa awaraa net'aa iru p'anadap'edaa mimia oodait'ee Tachi Ak'õre tede. Ichiaba ma broncepa te bùùrù jõmaweda p'êepiji.
9 Jamatdepema rey Toupa k'awaa atak'ãri Davidpa Sobadepema rey Hadad Ezer soldaorã p'oyaada, 10 pëiji chi warra, Adorán, rey Davidmaa pedee pia jaramerã irua rey Hadad Ezer p'oyaada perã. Aù naaweda taarã nùde rey Tou chõo bada perã Hadad Ezer ome, o–îa baji Davidpa ma rey p'oyaak'ãri mãik'aapa net'aa pia nêedee, p'arat'adee mãik'aapa broncedee ooda irumaa tee pëiji. 11 Davidpa ma net'aa pia tee pëida jõmaweda awara bùji Tachi Ak'õre–it'ee. Auk'a ooji awaraa net'aa nêedee ooda, p'arat'adee ooda ome. Aù naaweda ma net'aa jãri ata baji nãgà eujãdepemaarã juadeepa: Edom, Moab, Amón, Filistea mãik'aapa Amalec.
12 Mãgá David eere p'anadap'edaarã jura chõo jõnadak'ãri, eujã jewedaa Valle de Sal apatap'edaade Sarvia warra, Abisay ichi soldaorã ome Edom pidaarã dieciocho mil p'oyaajida. 13 Ma t'êepai Davidpa jaraji israelitaarã soldaorã ûk'uru p'aneedamerã Edom eujã jâamaa. Mãgá Edom eujãdepemaarã David jua ek'ari p'aneejida. Chõoda chaa Tachi Ak'õrepa David eere p'anadap'edaarãmaa p'oyaapiji.
Rey David jua ek'ari beerã
(2 Samuel 8.15-18; 20.23-26)
14 David rey bùde ichi jua ek'ari p'anapatap'edaarã pia ak'ùpachi Tachi Ak'õrepa oopi bùk'a. 15 David jua ek'ari soldaorã poro waibùa Sarvia warra, Joab paji. Jõdee Ajilud warra Josafat reypa oopariida p'ãpari paji. 16 Ajitob warra Sadoc mãik'aapa Abiatar warra Ajimélec p'aareerã paji. Savsa rey secretario paji. 17 Joyadá warra Benaías quereteorã mãik'aapa peleteorã poro waibùa paji. Jõdee David warrarã iru jua ek'ari poro waibùarã paji.