Tachi Ak'õrepa Davidmaa jarada
(2 Samuel 7.1-29)
17
1 Maapai rey David ichi palaciode k'ãiwee bak'ãri, ichia Tachi Ak'õre pedee jarapari Natanmaa nãga jaraji:
—Pùa unu bùk'a, mù palacio pi–ia cedro pak'urudee oodade bapari. Jõdee Tachi Ak'õre baaltek'a bù te ne–edee oodade bù. Irua ma baaltek'a bù oopijida aji, tachia k'irãpadamerã irua pacto ooda tachi chonaarã ome.
2 Natanpa mãgaji:
—Pù t'ãride k'îsia bùk'a ooipia bùda aji, Tachi Ak'õre pù ome bapari perã.
3 Mamîda ma ewate p'ãrik'ua Tachi Ak'õrepa Natanmaa mãgaji: 4 “Mù mimiapari Davidmaa nãga jaranáji: ‘Mù, Jõmaarã Ak'õre Waibùapa nãga jara bù: Pùata mù–it'ee te oo–e pait'ee mù aùde bapariimerã. 5 Mùa israelitaarã Egipto eujãdeepa uchiapidak'ãriipa, mù te pak'urudee oodade bak'aa paji. Jîp'a bapachi te ne–edee oodade ma te ateedap'edaamãi. 6 Mù ãra ome nide #mùa bùdaarã mù p'uuru pidaarã ak'ù p'anapataadamerã, ma poro waibùarã apidaamaa maarepida iidi–e paji mù–it'ee te cedrodee oodamerã. 7 Maperã mù mimiapari Davidmaa nãga jaráji: ‘Tachi Ak'õre Waibùapa nãga jara bù: Mùa pù uchiapiji ovejaarã ak'ù bapariidamãiipa israelitaarã rey papiit'ee. 8 Pù wãrumaa mù pù ome bapari mãik'aapa mùa pù k'îra unuamaa iru p'anapataarã jõmaweda jõpipari. Mùa jõmaarãmaa pù t'â t'o iru p'anapiit'ee awaraa eujãdepemaarã poro waibùarã t'âk'a. 9 Eujã awara bùit'ee mù p'uuru pidaarã, israelitaarã aùde k'ãiwee p'anapataadamerã. K'achia beerãpa ãra jùrù cheda–e pait'ee naawedapemak'a 10 poro waibùarã awara–awaraa jua ek'ari p'anapataadak'ãri. Pùa ãra ak'ù bapariit'ee mãik'aapa mùa k'aripap'eda, parã k'îra unuamaa iru p'anapataarã p'oyaadait'ee. Ma awara mùa pùmaa warrarã oopiit'ee. 11 Pù jai–idaak'ãri, mùa pù warra rey bùit'ee mù eperãarã ak'ù bapariimerã pù pari. 12 Iruata mù–it'ee te ooit'ee. Irudeepa uchiait'ee bù aba ichita rey pait'ee. 13 Mù mãgà ak'õre pait'ee; jõdee iru mù warra pait'ee. Mùa iru ichita k'inia iru bapariit'ee. Iru ik'aawaapa ãyaa wã–e pait'ee mùa oodak'a rey pù naa badaa ome, iru pari mùa pù rey bùk'ãri. 14 Ma k'ãyaara pùdeepa uchiait'ee bùpa mùchideerã ichita ak'ù bapariit'eeda aji, iru ichita rey pait'ee perã.’ ”
15 Mãpai Natanpa Davidmaa jaranaji jõmaweda Tachi Ak'õrepa jarada mãik'aapa unupida.
David ùt'aa t'âda
16 Mãga ûrik'ãri, David t'îuji Tachi Ak'õre ome unupata tede mãik'aapa iru k'îrapite su–ak'ù beep'eda, ùt'aa t'âji: “Tachi Waibùa, ¿mù k'aima aji, pùa mùchideerã nãgá audú pia ak'ù bamerã? 17 Pùa mùmaa pia ooji mù israelitaarã rey bùk'ãri. Ârá ma k'ãyaara piara jara bù mùdeepa uchiadait'eerãde. ¡Ak'õre Waibùa, pùa mù unu bù eperã waibùara bùk'a! 18 Pùa mù pia k'awa bùda aji. ¿Sãgá gracias jaraima pùa ma pedee pia jarada pari? 19 Na ne–inaa pi–ia jõmaweda ooji pùa oo k'inia badak'a mù, pù mimiapari, k'inia iru bapari perã. Ma jõma jaraji mùa k'awaamerã wãara pù mù ome bapari. 20 Mùchi Ak'õre Waibùa, wãara pù jõmaarã k'ãyaara waibùara bù. Awaraa Ak'õre pùk'a wê–e. Tai k'ùùrùpa pù pedee ûripata. 21 Ichiaba awaraa eperãarã wê–e pùa jùrùt'erada israelitaarãk'a. Ne–inaa eperãarãpa p'oyaa oodak'aa ãchi juadoopa ooda k'aurepa pùa tachi uchiapiji awaraa eujãdepemaarã juadeepa pùa k'inia bùk'a p'anapataadamerã. Mapa jõmaarãpa pù t'o iru p'anapata. Pù eperãarã Egipto eujãdeepa uchia atak'ãri, ãra naa awaraa eujãdepemaarã ãchi ak'õre waibùa apata ome jërek'ooji. 22 Mãga ooji k'inia bairã israelitaarã pùchi eperãarã ichita pamerã mãik'aapa pù ãchi Ak'õre Waibùa pamerã.
23 “Tachi Ak'õre Waibùa, mùa k'inia bù pùa oomerã pùa jaradak'a mùdeepa uchiadait'eerã ome. Mù pù mimiapari perã, mù ome óoji pùa k'îsia iru bùk'a. 24 Mãgá jõmaarãpa pù t'â t'o iru p'anadait'ee mãik'aapa jaradait'ee: ‘¡Jõmaarã Ak'õre Waibùa israelitaarã Ak'õre Waibùa!’ Mùa k'inia bù mùchideerã pù k'îrapite ichita pia p'anapataadamerã. Mù pù mimiaparipù. 25 Mùchi Ak'õre Waibùa, pù jõmaarã k'ãyaara waibùara bù. Mùmaa k'awapiji mùdeepa uchiadait'eerã ichiaba rey padait'ee. Mapa mù, pù mimiapari aupai bù mîda, pùmaa nãgá ùt'aa t'âmaa bù. 26 Pù ichita Jõmaarã Ak'õre Waibùa pait'ee. Pù pedee ichita wãara bù. Jaraji mù pia ooit'ee, mù pù mimiapari mîda. 27 Mapa mù, pù mimiaparipa, chupùria iidimaa bù pùa mùdeepa uchiadait'eerã pia oomerã, ãra pù jua ek'ari ichita pia p'anapataadamerã. Pù, Jõmaarã Ak'õre Waibùapa mùmaa mãga jaraji. Pùa ãra k'aripak'ãri, wãara pia p'anapataadait'eeda” aji.