16
1 Tachi Ak'õre baaltek'a bù ateejida Davidpa te ne–edee ma–it'ee oopidadee. Aramata ne–animalaarã Tachi Ak'õre–it'ee peedap'eda, paa jõpijida mãik'aapa awaraa ne–animalaarã paapijida jedek'odait'ee ãchi auk'aarã ome. 2 Mãga oop'eda, Davidpa israelitaarãmaa pedee pia jaraji Tachi Ak'õre t'âde, irua ãra pia ak'ù bapariimerã. 3 Ma awara ùmùk'îraarãmaa, wêraarãmaa paara pan jîp'aa, pan datiljõdee ooda mãik'aapa pan uva p'oodadee ooda teeji ma chaachaa.4 Mãpai Davidpa Levideepa uchiadap'edaarã bùji Tachi Ak'õre baaltek'a bù k'îrapite mimia oopataadamerã. Ûk'uru ùt'aa t'âdait'ee gracias jarade israelitaarã Ak'õre Waibùamaa; awaraarã k'aridait'ee mãik'aapa música chaadait'ee iru–it'ee. 5 Mãùrã poro waibùa Asaf paji; aù eere Zacarías; aù eere Jejiyel, Semiramot, Jehiel, Matatías, Eliab, Benaías, Obed Edom mãik'aapa Jeyel. Ma jõmaarã salterio mãik'aapa arpa chaa k'awaa beerã paji. Asafpa címbalo chaapachi. 6 Jõdee p'aareerã Benaiapa mãik'aapa Jahazielpa trompeta chaapachida Tachi Ak'õre baaltek'a bù k'îrapite. Ma baaltek'a bù k'aurepa israelitaarãpa k'irãpajida Tachi Ak'õrepa pacto ooda ãra chonaarã ome.
Davidpa salmo k'arida gracias jarait'ee Tachi Ak'õremaa
(Salmos 96.1-13; 105.1-15; 106.47-48)
7 Tachi Ak'õre baaltek'a bù aneedap'eda bùdait'ee iru ome unupata tede Jerusalende, Davidpa nãgà k'ari Asafmaa chaapiji, irua, awaraa chaapataarã ome k'aripataadamerã Tachi Ak'õremaa gracias jaradak'ãri.
8 ‘¡Gracias jarapatáatù jõmaarã Ak'õre Waibùamaa! ¡Irumaa ùt'aa t'âpatáatù! ¡P'uuru pidaarã jõmaarãmaa irua ne–inaa oopari nepùràtù! 9 ¡Irumaa k'aripatáatù! ¡Salmosk'aripatáatù! ¡Ma k'aride jõmaarãmaa jarátù irua ne–inaa pia oopari!
10 ¡O–îa p'anapatáatù iru t'â pi–ia k'awapata perã mãik'aapa jùrùpata perã iru k'awadait'ee! 11 ¡Ichita iru jùrùpatáatù parã k'aripamerã! 12 ¡K'irãpátù irua ne–inaa pia oopariida, ne–inaa eperãarãpa p'oyaa oodak'aa ãchi juadoopa! ¡Ichiaba k'irãpátù irua ley jarada eperãarãpa oopataadamerã! 13 Tachi Ak'õre mimiapari Israeldeepa uchiadap'edaarã, na jõma k'irãpátù irua para Jacobdeepa uchiadap'edaarã jùrùt'erada perã.
14 Jõmaarã Ak'õre Waibùa Tachi Ak'õre Waibùa. Na eujãdepemaarã iru jua ek'ari p'anapata. 15 Abrahamdeepa eperãarã chok'ara uchiaruta pùjida, 16 at'ãri k'irãpadait'ee Tachi Ak'õrepa pacto jarada irumaa mãik'aapa chi warra Isaacmaa. 17 Ma pactode jarada ãramaa auk'a jaraji Jacobmaa, israelitaarãpa ichita k'irãpadamerã. 18 Ma pactode Tachi Ak'õrepa nãga jaraji: “Teeit'eeda aji, Canaán eujã parã aùde p'anapataadamerã.”
19 Maapai Abrahamdeepa uchiadap'edaarã chok'ara–e p'anajida mãik'aapa ma eujãde k'îra tewaraarãk'a p'anajida 20 na p'ek'au eujãdepema eujã awara–awaraade nipadak'ãri mãik'aapa rey awara–awaraa jua ek'ari p'anapataadak'ãri. 21 Mamîda Tachi Ak'õrepa ãra pia ak'ù bapachi. Mãgà reyrãmaa irua mãgapachi: 22 ‘¡Mùa jùrùt'eradaarãmaa mãik'aapa mù pedee jarapataarãmaa ne–inaa k'achia oonaadapáde!’ aji.
23 ¡Jõmaweda na p'ek'au eujãdepemaarã, k'arítù Tachi Ak'õremaa! ¡Jõmaarãmaa jarapatáatù irua eperãarã k'aripa atapari o k'achiadeepa! 24 Jõmaweda p'uuru pidaarãmaa jarapatáatù iru jõmaarã k'ãyaara t'ãri piara bù mãik'aapa irua ne–inaa oopari eperãarãpa p'oyaa oodak'aa ãchi juadoopa. 25 Mãga oopari iru jõmaarã k'ãyaara waibùara bapari perã. Awaraa Ak'õre Waibùa iruk'a wê–e. Mapa irumaa o–îa ùt'aa t'âpataadaipia bù mãik'aapa iru waaweedaipia bù, awaraa ak'õre waibùa apata jõmaweda k'ãyaara. 26 Awaraa p'uuru pidaarã ak'õre waibùa apataarãpa irua ooparik'a p'oyaa oodak'aa, eperã juapa ooda perã. Jõdee Jõmaarã Ak'õre Waibùapa pajã ooji. 27 ¡Iru bùmãi k'îra wãree bapari! Iru ome unupata tede irua tachi t'ãri o–îapipari. ¡Mapa o–îa p'anapata!
28 Jõmaweda p'uuru pidaarã, Tachi Waibùamaa ùt'aa t'âpatáatù iru jõmaarã k'ãyaara waibùara bapari perã. 29 Irumaa aupaita ùt'aa t'âpatáatù. Iru–it'ee ne–inaa pia aneepatáatù. Chepatáatù ùt'aa t'ùde iru ome unupata te pi–ia bùde. 30 ¡Na p'ek'au eujãdepema jõmaarãpa iru waaweedaipia bù! Iru k'aurépata na p'ek'au eujã beepari ichia bùdamãi. Mãgá ãyaa wãk'aa. 31 ¡Ùt'aripemaarã na eujãdepemaarã ome, o–îa p'anapatáatù irua na p'ek'au eujã mãgá pia ak'ù bapari perã! ¡Jõmaweda eujãdepemaarã, jarapatáatù ‘Tachi Waibùa jõmaarã rey!’ 32 ¡P'usa aùde nâbù ome, jîwáaji irua oopi bùk'a! ¡Eujã, aùde nâbù ome o–îa béeji! 33 ¡Pak'uru paraamãipema pak'uru k'arítù! ¡Jõmaarã Ak'õre Waibùa k'îrapite o–îa k'arítù, iru cheru perã na p'ek'au eujãde nâbù ak'ùit'ee mãik'aapa jarait'ee pia wa k'achia!
34 ¡Jõmaarã Ak'õre Waibùamaa gracias jarapatáatù iru t'ãri pia bapari perã mãik'aapa tachi ichita k'inia iru bapari perã! 35 Irumaa nãga jarapatáatù: ‘Tachi Ak'õre, pù tai k'aripapari. Tai k'aripáji awaraa eujãdepemaarã juadeepa. Tai p'e atáji abaamãi, mama pùmaa t'ãri o–îapa ùt'aa t'âpataadamerã mãik'aapa pùmaa gracias jarapataadamerã. 36 ¡Jõmaarã Ak'õre Waibùa, israelitaarã Ak'õre Waibùa, k'inia p'anù pù ichita pia bapariimerã!’
Mãga k'aridap'eda, jõmaweda israelitaarãpa mãgajida:
—Amén.
Mãpai t'ãri o–îa ùt'aa t'â p'aneejida Tachi Ak'õremaa.
37 Maap'eda Davidpa Asaf chi k'õp'ãyoorã ome bùji mama ewari chaa Tachi Ak'õre ome unupata tede mimiapataadamerã. 38 Ichiaba bùji Jedutún warra Obed Edom ichi ëreerã sesenta y ocho ome mãik'aapa Josá ma tedepema puerta t'erabai jâapataadamerã. 39 Jõdee Davidpa jaraji p'aareerã Sadoc chi k'õp'ãyoorã ome mimianadamerã Tachi Ak'õre ome unupata te Gabaón ee nok'ode badade. 40 Jaraji tap'eda chaa mãik'aapa k'ewara chaa ne–animalaarã Tachi Ak'õre–it'ee paa jõpataadamerã iru ley p'ãdade jara bùk'a israelitaarãpa oopataadamerã. 41 Ãchi ome bëiji Hemán, Jedutún mãik'aapa apema jùrùt'eradaarã mãgùùrãpa nãga k'aripataadamerã: “Gracias jarapatáatù Tachi Waibùamaa, irua tachi ichita k'inia iru bapari perã.” 42 Hemanpa mãik'aapa Jedutunpa trompeta, címbalo mãik'aapa ne–inaa awaraa chaapata chaapachida k'arimaa p'anùde. Jedutún warrarã ma tedepema puerta jâapataarã paji.
43 Ma t'êepai jõmaweda wãjida ãchi te chaa. David ichiaba wãji ichi temaa pedee pia jarade ichideerãmaa.