Davidpa Tachi Ak'õre baaltek'a bù aneepida Jerusalendee
(2 Samuel 6.12-23)
15
1 David rey bùde te chok'ara oopiji ichi p'uurude. Ma awara ne–edee Tachi Ak'õre ome unupata te oopiji iru baaltek'a bù aùde bùdamerã. 2 Maap'eda Davidpa mãgaji: “Levideepa uchiadap'edaarãpapai Tachi Ak'õre baaltek'a bù ãyaa ateedaipia bù. Tachi Ak'õrepa ãrata jùrùt'eraji ichi jua ek'ari ichita mimiapataadamerã.”3 T'êepai Davidpa jaraji israelitaarã jõmaarã cheepurudamerã Jerusalende Tachi Ak'õre baaltek'a bù aneedait'ee perã bùdait'ee ichia te oopidade. 4 Ichiaba jaraji Aarondeepa uchiadap'edaarã cheepurudamerã awaraa Levideepa uchiadap'edaarã ome. 5 Coatdeepa uchiadap'edaarã ciento veinte chejida ãchi poro waibùa Uriel ome. 6 Merarideepa uchiadap'edaarã doscientos veinte chejida ãchi poro waibùa Asaías ome. 7 Gersondeepa uchiadap'edaarã ciento treinta chejida ãchi poro waibùa Joel ome. 8 Elisafandeepa uchiadap'edaarã doscientos chejida ãchi poro waibùa Semaías ome. 9 Hebrondeepa uchiadap'edaarã ochenta chejida ãchi poro waibùa Eliel ome. 10 Uzieldeepa uchiadap'edaarã ciento doce chejida ãchi poro waibùa Aminadab ome.
11 T'êepai Davidpa p'aareerã Sadoc mãik'aapa Abiatar t'â pëiji. Ichiaba t'â pëiji nãgà Levideepa uchiadap'edaarã: Uriel, Asaías, Joel, Semaías, Eliel mãik'aapa Aminadab. 12 Ma jõmaarã ome unuk'ãri, Davidpa mãgaji: “Parã Levideepa uchiadap'edaarã ëreerã poro waibùarã. Mapa parã, pãchideerã ome ne–inaa jõma óotù Tachi Ak'õrepa oopi bùk'a iru–it'ee awara p'aneedait'ee. Maap'eda israelitaarã Ak'õre Waibùa baaltek'a bù atanátù mãik'aapa anéetù mùa te oopidadee. 13 Naaweda ma baaltek'a bù aneedait'ee pak'ãri, parã Levideepa uchiadap'edaaråpata aneeda–e paji. Maperãpù Tachi Ak'õre k'îraudachi tachi ome mãik'aapa ûk'uru peeji. Mãga oojida aji, irumaa iidida–e pada perã sãga aneedaipia bù.”
14 Maap'eda ma p'aareerãpa mãik'aapa Levideepa uchiadap'edaarãpa ne–inaa jõma oojida Tachi Ak'õrepa oopi bùk'a awara p'aneedait'ee iru–it'ee. Mãgá atanajida israelitaarã Ak'õre Waibùa baaltek'a bù. 15 Ma Levideepa uchiadap'edaarãpa ãchi ik'iade Tachi Ak'õre baaltek'a bù ateejida pak'uru t'îudap'eda argolla aù bi chaa bùde. Naaweda Tachi Ak'õrepa jaraji Moisemaa mãgá ãyaa ateedamerã.
16 Davidpa jaraji Levideepa uchiadap'edaarã poro waibùarãpa jùrùdamerã k'aripataarã mãik'aapa música chaapataarã wãdamerã ma baaltek'a bù ome, k'arimaa, nãgùde música chaamaa: salterio, arpa mãik'aapa címbalo. 17 Ma–it'ee Levideepa uchiadap'edaarãpa jùrùt'erajida Joel warra Hemán, ichi ëreerãdepema Berequías warra Asaf mãik'aapa ãchi auk'aarã Merarideepa uchiadap'edaarãdepema Cusaías warra Etán. 18 Ichiaba jùrùt'erajida mãùrã ëreerãdepema awaraarã k'aripadamerã: Zacarías, Jaziel, Semiramot, Jehiel, Uni, Eliab, Benaías, Maseías, Matatías, Elifeleu, Micnías, Obed Edom mãik'aapa Jeyel.
19 Ma k'aripataarã Hemanpa, Asafpa mãik'aapa Etanpa ichiaba címbalo broncedee ooda chaa wãjida. 20 Jõdee Zacariapa, Azielpa, Semiramotpa, Jehielpa, Unipa, Eliabpa, Maseiapa mãik'aapa Benaiapa salterio alamot tono apatap'edaade chaa wãjida. 21 Jõdee Matatiapa, Elifeleupa, Micniapa, Obed Edompa, Jeyelpa mãik'aapa Azaziapa arpa siminita tono apatap'edaade chaa wãjida. 22 Levideepa uchiadap'edaarã poro waibùa Quenanías ma jõmaarã poro waibùa paji, música k'awaa bada perã. 23 Berequías mãik'aapa Elcaná Ak'õre tedepema puerta jâapataarã paji, ma baaltek'a bù tedeepa ateedak'ãri mãik'aapa teedaa aneedak'ãri. 24 P'aareerã Sebaniapa, Josafatpa, Natanaelpa, Amasaypa, Zacariapa, Benaiapa mãik'aapa Eliezerpa trompeta chaa wãjida ma baaltek'a bù naa. Jõdee Obed Edom mãik'aapa Jehías ichiaba tedepema puerta jâapataarã paji ma baaltek'a bù ateedak'ãri mãik'aapa aneedak'ãri.
25 David israelitaarã poro waibùarã ome mãik'aapa soldaorã milmil poro waibùarã ome auk'a o–îa wãjida Obed Edom temaa ma baaltek'a bù atade. 26 Tachi Ak'õrepa ma Levideepa uchiadap'edaarã k'aripa bada perã, p'ak'a ùmùk'îra siete mãik'aapa oveja ùmùk'îra siete peedap'eda, paapijida iru–it'ee. 27 David p'aru teesoo lino nãusaadee ooda jâ baji, Levideepa uchiadap'edaarã ma baaltek'a bù atee wãdap'edaarã, k'aripataarã, ãchi poro waibùa Quenanías paara. Ichiaba David efod linodee ooda jâ baji. 28 Israelitaarã chok'araarãpa Tachi Ak'õre baaltek'a bù k'õp'ãyaajida. O–îapa biajida, k'arijida mãik'aapa chaa wãjida oveja cacho, trompeta, címbalo, salterio mãik'aapa arpa.
29 Mãgá Tachi Ak'õre baaltek'a bù ome chewãde David p'uurude pachedak'ãri, ventanadeepa Saúl k'au Micalpa ãra cheruta ak'ù baji. Unuk'ãri rey David o–îa pëira chewã, iru ome t'ãri ãrii beeji.