Tachi Ak'õre baaltek'a bù aneedap'edaa
(2 Samuel 6.1-11)
13
1 David ichi soldaorã milmil mãik'aapa ciencien poro waibùarã ome pedeeji. 2 Maap'eda nãga jaraji israelitaarã chip'edaidap'edaarãmaa: “Parãpa mùa jararu ijãaruta pùrã mãik'aapa Tachi Ak'õre Waibùapa k'inia bù pùrã, jara pëidáma tachi auk'aarã Israel eujãde p'anapata jõmaarãmaa cheepurudamerã chip'ede tachi ome. Ichiaba t'â pëidáma p'aareerã awaraa Levideepa uchiadap'edaarã ãra p'uurude p'anapata wa p'uuru taawa p'anapata auk'a chedamerã pedeede. 3 Tachi Ak'õre baaltek'a bù aneedáma aji, Saúl rey badak'ãriipa ma baaltek'a bùde k'îsiada–ee p'anadairã mãik'aapa ma baaltek'a bùmãi Tachi Ak'õremaa ne–inaa iidida–e p'anadairã.” 4 Ma chip'edaidap'edaarã jõmaarãpa ijãajida, ãchi–it'ee ne–inaa pia bada perã.Tachi Ak'õre baaltek'a bù aneedap'edaa
(2 Samuel 6.1-11)
5 Mãgá Davidpa israelitaarã jõmaweda t'â pëiji Egipto eerepema Sijor todeepa norte eerepema Lebó Jamat eujã t'îupata parumaa. Jaraji Tachi Ak'õre baaltek'a bù Quiriat Yearín p'uurudeepa aneedamerã. 6 Maap'eda David israelitaarã ome wãji Quiriat Yearín, ichiaba t'âjarapatap'edaa Balá p'uurumaa, Judadeepa uchiadap'edaarã eujãde bada. Mamãik'aapa Tachi Ak'õre baaltek'a bù anee k'inia p'anapachida. Ma baaltek'a bùde querubín k'îrak'a bù esa–auk'a Tachi Ak'õre t'âpachida. 7 Ma baaltek'a bù eperã Abinadab tede baji. Carreta chiwidide ma baaltek'a bù ma tedeepa anee wãjida. Uza, Ajío ome ma carreta ik'aawa wã nipapachida. 8 Ma baaltek'a bù naa wãpachida David jõmaweda israelitaarã ome. K'ari p'anajida mãik'aapa arpa, salterio, pandero, címbalo, mãik'aapa trompeta chaa p'anajida. 9 Trigo tau ãyaa p'epatamãi t'âjarapatap'edaa Quidón k'ait'a panadak'ãri, ma carreta jidiu wãdap'edaa p'ak'a t'êneudachida. Mapa Uzapa Tachi Ak'õre baaltek'a bù jita ataji baainaamerã. 10 Mamîda Uzapa mãga ook'ãri, Tachi Ak'õre k'îraudachi iru ome mãik'aapa mama ichi k'îrapite Uza piupiji.
11 Davidpa mãga k'awaak'ãri, t'ãri arree beeji Tachi Ak'õre ome, irua Uza mama piupida perã. Mapa ma punto t'â bùji Peres Uza.a 12 Ma ewate David p'era baji Tachi Ak'õre k'îrapite. Mapa iidiji: “¿Ârá sãgá mùa Ak'õre baaltek'a bù aneeima? aji. 13 Maperã ma baaltek'a bù waa anee–e paji David p'uuru apatap'edaadee. Ma k'ãyaara ateepiji Gat p'uurudepema Obed Edom temaa. 14 Atane õpee wãyaarude Tachi Ak'õre baaltek'a bù mama Obed Edom tede beeji. Mama bùde, Tachi Ak'õrepa ma te pidaarã ãchi net'aa ome pia ak'ù bapachi.