Chõo k'awaa beerã David eere p'anadap'edaa
12
1 Cis warra Saúl israelitaarã rey bùde ichia David jëret'aaji ichimãiipa. Maap'eda David Siclag p'uurude bùde soldaorã sõcharra beerã wãjida irumaa iru ome nipa k'inia p'anadap'edaa perã. Mãgá iru ome Siclagde p'aneejida. 2 Ma soldaorã ematrùma anipapachida. Ichiaba jâk'arapa mãu bat'a k'awaa p'anajida; juarapa, juabipa paara. Nãgùùrã paji:Saúl ëreerã, Benjamindeepa uchiadap'edaarã: 3 Guibeá p'uurudepema Semá warrarã Ajiezer, ma soldaorã poro waibùa mãik'aapa chi âpema Joás; Azmávet warrarã Jeziel mãik'aapa Pélet; Anatot p'uurudepemaarã Beracá mãik'aapa Jehú; 4 ma awara gabaonita t'âjarapatap'edaa Ismaías. Mãgà treinta soldaorã sõcharraarã poro waibùa paji. Ichiaba nãgùùrã paji: Jeremías, Jahaziel, Johanán, Guederá p'uurudepemaarã Jozabad; 5 Eluzay, Jerimot, Bealías, Semarías; harufita t'âjarapatap'edaa Sefatías; 6 coreitaarã Elcaná, Isías, Azarel, Joezer mãik'aapa Yasobeán; 7 Guederá p'uurudepema Jeroán warrarã Joelá mãik'aapa Zebadías.
8 Gaddeepa uchiadap'edaarã soldaorã ichiaba t'îujida David eere, iru miru bak'ãri soldaorã p'anadap'edaamãi pania wêe bù eujãde. Mãùrã ichiaba sõcharra p'anajida. Escudo, miasu panau nipapachida. T'ãri k'achia–idaa p'anapachida leonk'a mãik'aapa k'ap'ip'ia p'irapachida bigik'a. 9 Nãgùùrã paji: Ezer, ãchi poro waibùa; aù eere Abdías; aù eere Eliab; 10 aù eere Mismaná; aù eere Jeremías; 11 aù eere Atay; aù eere Eliel; 12 aù eere Johanán; aù eere Elzabad; 13 aù eere Jeremías mãik'aapa aù eere Macbanay. 14 Ma Gaddeepa uchiadap'edaarã soldaorã poro waibùarã paji. Mãùrãdepema ek'ariara bada auk'a baji soldaorã jîp'aarã cien ome; jõdee chi waibùara bada auk'a baji soldaorã jîp'aarã mil ome. 15 Mãùrã Jordán to sîajida primaveradepema to choma bùde mãik'aapa ma eujã jewedaade p'anapatap'edaarã jërek'oojida oriente eeree, occidente eeree.
16 Awaraa Benjamindeepa uchiadap'edaarã mãik'aapa Judadeepa uchiadap'edaarã ichiaba chejida t'îudait'ee David eere ichi soldaorã p'anapatap'edaarãmaa. 17 David badamãi k'ait'a panadak'ãri, irua ãchi k'îrachuude wãji mãik'aapa mãgaji: “Wãara parã nepùrù jùrùda–ee cheruta pùrã mù k'aripade, t'ãripa mùa parã auteebaiit'ee. Mamîda cheruta pùrã mù traicionaadait'ee mãik'aapa baaipidait'ee mù k'îra unuamaa iru p'anùùrã juade, mùa ãchimaa maarepida k'achia oo–ee bù mîda, ¡mãgara tachi chonaarã Ak'õre Waibùapa parã k'achia ooipia bùda!” aji.
18 Mãpai Tachi Ak'õre Jaure cheji ma soldaorã treinta poro waibùa Amasaymaa. Mãpai irua mãgaji:
“¡Isaí warra, David, k'ãiwee béeji! ¡K'ãiwee béeji. Ichiaba pù ome nipapataarã k'ãiwee p'aneedapáde aji, pù Ak'õre Waibùapa parã k'aripapari perã!”
Mãga ûrik'ãri, Davidpa ma soldaorã auteebaiji mãik'aapa bùji chi soldaorã poro waibùarã ome.
19 T'êepai filisteorã Saúl ome jura chõo jõnùde David banaji filisteorã p'uurude. Mãga nùde Manasedeepa uchiadap'edaarã soldaorã ichiaba iru eere t'îujida. Mamîda filisteorã eere chõoda–e paji, mãùrã poro waibùarãpa k'îsiadap'edaa perã Davidpa ichi auk'aarã k'aripai. Mãgajida: “Irua ichi rey Saúl k'ariparu pùrã mãik'aapa mãgá tai k'ûraru pùrã, tai k'iniidariit'eeda ajida.” 20 Ma Manasedeepa uchiadap'edaarã ëreerãdepemaarã Siclag p'uurude David eere t'îudap'edaa soldaorã milmil poro waibùarã nãgùùrã paji: Adnás, Jozabad, Jediael, Micael, Jozabad, Eliú, Ziletay. 21 Mãùrãpa David k'aripajida ichi soldaorã naa wãk'ãri. Jõmaarã chõo k'awaa, sõcharra p'anajida. Maperã soldaorã poro waibùarã p'anajida. 22 Ewari chaa awaraarã chejida David eere t'îudait'ee; soldaorã chok'ara p'anarutamaa.
23 Saúl piuda t'êepai David rey beeji Hebrón p'uurude, Tachi Ak'õrepa jaradak'a. Mama bùde irua nãgà soldaorã p'e ataji: 24 Judadeepa uchiadap'edaarã ëreerãdepemaarã seis mil ochocientos soldaorã escudo panau, miasu panau; 25 Simeondeepa uchiadap'edaarã ëreerãdepemaarã siete mil cien soldaorã chõo k'awaa, sõcharra beerã, ichiaba arma panau; 26 Levideepa uchiadap'edaarã ëreerãdepemaarã cuatro mil seiscientos; 27 waa tres mil Aarondeepa uchiadap'edaarã. Joyadá mãùrã poro waibùa paji. 28 Mãùrã ome nipaji k'ûtrãa chõo k'awaa, sõcharra Sadoc Levideepa uchiadap'edaarã ëreerãdepemaarã poro waibùarã veintidós ome. 29 Saúl ëreerã, Benjamindeepa uchiadap'edaarã õpee mil ùmùk'îraarã cheepurujida. Aù naaweda ma Benjamindeepa uchiadap'edaarã soldaorãpa Saúl eerepemaarã audú k'aripapachida. 30 Efraindeepa uchiadap'edaarã ëreerãdepemaarã veinte mil ochocientos soldaorã sõcharra cheepurujida. Ãchi ëreerãdepemaarãpa ãra t'o iru p'anapachida. 31 Manasedeepa uchiadap'edaarã esa–auk'a p'anadap'edaarãdepema dieciocho mil soldaorã cheepurujida. Awaraarãpa mãùrã jùrùt'erajida David bùdamerã rey mimiade. 32 Isacardeepa uchiadap'edaarã ëreerãdepemaarã cheepurujida soldaorã poro waibùarã doscientos jõmaweda ma ëreerãdepema ùmùk'îraarã ome. Ma ùmùk'îraarãpa k'îsia k'awaa p'anajida. Mapa israelitaarã pia ûraapachida k'awadamerã k'ãata oodaipia bù. 33 Zabulondeepa uchiadap'edaarã ëreerãdepemaarã cincuenta mil soldaorã cheepurujida. Mãùrãpa arma k'îra t'ãdoo ome chõo k'awaa p'anapachida. Ãrapa t'ãripa David k'aripa k'inia p'anajida. 34 Neftalideepa uchiadap'edaarã ëreerãdepemaarã soldaorã poro waibùarã mil paji. Mãùrã cheepurujida soldaorã jîp'aarã treinta y siete mil ome; escudo, miasu panau. 35 Dandeepa uchiadap'edaarã ëreerãdepemaarã veintiocho mil seiscientos cheepurujida. Mãùrã jõmaweda chõo k'awaa p'anajida. 36 Aserdeepa uchiadap'edaarã ëreerãdepemaarã cuarenta mil soldaorã cheepurujida. Mãùrã jõmaweda chõo k'awaa p'anajida. 37 Ma soldaorã awara, Jordán to oriente eere ciento veinte mil ùmùk'îraarã paji: Rubendeepa uchiadap'edaarã ëreerãdepemaarã, Gaddeepa uchiadap'edaarã ëreerãdepemaarã mãik'aapa Manasedeepa uchiadap'edaarã ëreerã esa–auk'a p'anadap'edaarãdepema. Ma jõmaarã arma k'îra t'ãdoo anipapachida.
38 Ma soldaorã jõmaweda jura chõo jõnùk'a erk'a wãjida Hebrón p'uurudee David israelitaarã rey papide. Awaraa israelitaarãpa auk'a oo k'inia p'anajida. 39 Ma jõmaarã mama, Hebronde, David ome p'anajida k'ãima õpee wãyaarude. David ome nek'ojida mãik'aapa ne–inaa tojida ãchi auk'aarãpa tee chedap'edaa. 40 Ma k'ait'a p'anapatap'edaarã: Isacardeepa uchiadap'edaarãpa, Zabulondeepa uchiadap'edaarãpa, Neftalideepa uchiadap'edaarãpa paara chik'o waibùa aneejida ãrapa k'odamerã. Ma chik'o aneejida burro ârù, camello ârù, mula ârù mãik'aapa p'ak'a ârù. Ne–inaa k'îra t'ãdoo aneejida: harina; ne–inaa p'ep'edee higojõdee ooda; uva p'ooda; vino; aceite; p'ak'a ùmùk'îraarã mãik'aapa ovejaarã ome. Waibùa aneejida Israel eujãde jõmaarã o–îa p'anadap'edaa perã ãchi rey ome.