David Judadepemaarã mãik'aapa israelitaarã rey pada
(2 Samuel 5.1-3)
11
1 Ma t'êepai Israeldeepa uchiadap'edaarã ëreerã chaadepemaarã wãjida Hebrón p'uurudee David ome pedeede. Mãgajida: “Tachi rey waibùa, pù tai auk'aarã. 2 Saúl tachi rey paji mîda, pùta soldaorã ome wãpachi awaraa eujãdepemaarã ome chõode tai k'ap'ùa pari. Ma awara Tachi Ak'õrépata jarajida ajida, pùa israelitaarã ak'ùpariit'ee.”3 Mãgá jõmaweda israelitaarã poro waibùarã pedeejida David ome Hebronde. Mãpai Tachi Ak'õre k'îrapite Davidpa pacto ooji ãra ome. T'êepai ãrapa aceite weejida David poro ârù ak'ùpidait'ee iru awara bù p'anù israelitaarã reyk'a. Oojida Tachi Ak'õrepa aù naaweda jarapidak'a ichi pedee jarapari Samuelmaa.
David ichi soldaorã ome Jerusalén p'uuru p'oyaajida
4 Mãgá David israelitaarã soldaorã jõmaweda ome wãjida Jerusalén p'uuru, ichiaba Jebús apatap'edaa, jãri atade jebuseorã juadeepa. 5 Mama panadak'ãri, ma jebuseorãpa Davidmaa mãgajida: “Pù na p'uurude p'oyaa t'îu–eda” ajida. Mamîda chõomaa p'anù misa, Davidpa Sión soldaorã p'anapatap'edaamãi murallapa t'ùak'au bada jãri ataji. Ârá ma soldaorã p'anapatap'edaamãi David p'uuru apata. 6 Ma p'uurude chõonadai naaweda, Davidpa ichi soldaorãmaa mãgaji: “Chi naapùara uchiaru jebuseorã ome chõode mùa soldaorã jõmaweda poro waibùa bùit'eeda” aji. Mãgá Sarvia warra Joab naapùara chõode uchiak'ãri, Davidpa ichi soldaorã poro waibùa bùji. 7 Ma chõoda t'êepai David ichi soldaorã ome ma soldaorã p'anapatap'edaamãi p'aneejida. Mapa ma soldaorã p'anapatap'edaamãi David p'uuru apata. 8 Mama p'anùde Davidpa ma p'uuru chiwidi oopiji terraplén badamãiipa p'uuru t'ùak'au bada muralla parumaa. Joabpa ichiaba ma p'uuru ûk'uru chiwidi oopiji. 9 David rey waibùa pa wãji Tachi Ak'õre Waibùapa iru k'aripa bada perã.
Rey David soldaorã waibùara p'anadap'edaa
10 Rey David ome nipapatap'edaa soldaorã israelitaarã soldaorã ome Judadeepa uchiada David rey bùjida, Tachi Ak'õrepa israelitaarãmaa jaradak'a. 11 Nãgà soldaorã David ome nipapatap'edaarã waibùara paji.
Chi soldaorã waibùara õpeedepema Jacmoní warra Yasobeán ãchi poro waibùa paji. Ichi juadoopa eperãarã trescientos peek'ooji miasupa. 12 Ma õpeedepema Yasobeán eere paji ajojita t'âjarapatap'edaa Dodó warra, Eleazar. 13 Mãgà David ome nipa baji Pasdamín puntode filisteorã chõode chedak'ãri ãchi ome. Mama cebada net'a tau uu baji mãik'aapa israelitaarã filisteorã naa jirabododak'ãri, ma ne–uude wãyaajida. 14 Mãga nùde ma waibùarã õpeeweda ak'ùnâ p'aneejida ma ne–uu esajîak'a mãik'aapa chõomaa p'aneejida ma filisteorã ome ãchi p'oyaarutamaa. Mãgá Tachi Ak'õrepa filisteorã p'oyaapiji israelitaarãmaa.
15 Ewari aba soldaorã treinta poro waibùarãdepema õpee wãjida David ome unude mãu–idaa badamãi Adulán mãu tede. Maapai filisteorã soldaorã ãchi k'ãipata oo iru p'anajida Refayin eujã jewedaade. 16 David ichi soldaorã ome ãchi soldaorã p'anadap'edaamãi p'anajida. Mamîda filisteorãpa soldaorã chok'ara p'e iru p'anajida Belén p'uurude. 17 Mama bùde ichi soldaorã ome David opisiadachi mãik'aapa mãgaji: “¡Pia bak'aji abaapa mùmaa tee cheda paara pania Belén p'uurudepema puerta k'ait'a bù pozodepema!”
18 Ma t'êepai ichi soldaorã waibùarã õpeeweda wãjida ma pozo Belén k'ait'a badadee. Chõodap'eda mama p'anadap'edaa filisteorã ome, ma pozomaa wãjida mãik'aapa pania joi atajida David–it'ee. Mamîda tee chedak'ãri, Davidpa toamaa baji. Toi k'ãyaara weet'aaji Tachi Ak'õre–it'ee. 19 Mãga bùde mãgaji: “¡Tachi Ak'õrepa mùmaa na pania topi–e! ¡Na pania nãgà soldaorã waak'a bùda aji, ãchi piuk'ajida perã nãgà atade wãdade! Mùa p'oyaa to–eda” aji.
Mãga oojida ma soldaorã waibùarã õpeerãpa.
20 Joab âpema, Abisay, ma soldaorã waibùarã õpee poro waibùa paji. Chõoda abaade ichi eperãarã trescientos ârù wãp'eda, peek'ooji ichi juadoopa. Ma k'aurepa soldaorãpa iru t'o iru p'anajida ma soldaorã waibùarã õpee t'o iru p'anadap'edaak'a. 21 Mãgá iru awara bùjida ãchi poro waibùa pamerã. Mamîda ma soldaorã waibùarã õpee ome auk'a–e paji.
22 Cabsel p'uurudepema Joyadá warra Benaías ichiaba soldao sõcharra baji. Ne–inaa chok'ara ooji israelitaarã k'aripait'ee. Ichia Moabdepema Ariel warrarã omé peek'ooji. Ichiaba ewari aba pajãdeepa nieve baai chek'ãri, ichi t'îuji yooro te uriade mãik'aapa mama león unuk'ãri, peet'aaji ichi juadoopa. 23 Ichi Egiptodepema gigante ome chõoji mãik'aapa peet'aaji. Ma gigante metro omé ap'eda esa–auk'a pait'ee paji. Chi anipada miasu nêchoma baji; p'aru k'aat'ùpari pak'uruk'a. Mamîda Benaías ma gigante ârù wãji pak'uru ome. Ma gigante anipada miasu jãri atap'eda, peet'aaji iru miasupa. 24 Ma k'aurepa apema soldaorãpa Joyadá warra Benaías ichiaba t'o iru p'anajida ma soldaorã waibùarã õpee t'o iru p'anadap'edaak'a. 25 Iru piara ak'ùpachida ma treinta soldaorã poro waibùarã k'ãyaara. Mamîda iru auk'a–e paji ma soldaorã waibùarã õpee ome. Davidpa Benaías awara bùji ichi jâapataarã poro waibùa pamerã.
26 Ma soldaorã waibùara p'anadap'edaa nãgùùrã paji: Joab âpema Asael; Belendepema Dodó warra Eljanán; 27 harorita t'âjarapatap'edaa Samot; pelonita t'âjarapatap'edaa Heles; 28 tecoíta t'âjarapatap'edaa Iqués; mãgà warra Irá; anatotita t'âjarapatap'edaa Abiezer; 29 jusatita t'âjarapatap'edaa Sibecay; ajojita t'âjarapatap'edaa Ilay; 30 netofatita t'âjarapatap'edaa Maray; awaraa netofatita Baná warra Jéled; 31 Benjamindeepa uchiadap'edaarã eujãde bù p'uuru Guibeadepema Ribay warra Itay; piratonita t'âjarapatap'edaa Benaías; 32 to chak'e p'ooda Gaadepema Juray; arbatita t'âjarapatap'edaa Abiel; 33 bajurinita t'âjarapatap'edaa Azmávet; salbonita t'âjarapatap'edaa Elijaba; 34 guizonita t'âjarapatap'edaa Jasén warrarã omé; ararita t'âjarapatap'edaa Sague warra Jonatán; 35 ararita t'âjarapatap'edaa Sacar warra Ahián; Ur warra Elifal; 36 mequeratita t'âjarapatap'edaa Héfer; pelonita t'âjarapatap'edaa Ahías; 37 Carmel p'uurudepema Jezró; Ezbay warra Naray; 38 Natán âpema Joel; Hagrí warra Mibar; 39 amonita t'âjarapatap'edaa Sélec; berotita t'âjarapatap'edaa Najaray. Mãgùpa Sarvia warra Joab arma anipapachi; 40 itrita t'âjarapatap'edaa Irá; awaraa itrita, Gareb; 41 hitita t'âjarapatap'edaa Urías; Ajlay warra Zabad; 42 Rubendeepa uchiada Sizá warra Adiná ichi ome nipapatap'edaa soldaorã treinta ome. Iru awaraa Rubendeepa uchiadap'edaa soldaorã poro waibùa paji. 43 Macá warra Janán; mitnita t'âjarapatap'edaa Josafat; 44 astarotita t'âjarapatap'edaa Uzías; aroerita t'âjarapatap'edaa Jotán warrarã Sama mãik'aapa Jehiel; 45 Simri warra Jediael mãik'aapa chi âpema, tizita t'âjarapatap'edaa Yojá; 46 majavita t'âjarapatap'edaa Eliel; Elnán warrarã Jerebay mãik'aapa Josavía; moabita t'âjarapatap'edaa Itmá; 47 Sobá eujãdepemaarã Eliel, Obed mãik'aapa Jasiel.