Saúl ichi warrarã ome piudap'edaa
(1 Samuel 31.1-13)
10
1 David ichi soldaorã ome amalecitaarã t'êe wã bù misa, filisteorã soldaorã israelitaarã ome chõode chejida. Mãùrã naa israelitaarã soldaorã jîchoo wãjida mîda, ma filisteorãpa ãra chok'ara peejida Guilboa eede. 2 Ma filisteorã Saúl mãik'aapa chi warrarã t'êe wãjida. Êp'e atanadak'ãri, Saúl warrarã Jonatán, Abinadab, Malquisúa, ãchi õpeeweda peek'oojida. 3 Maap'eda Saúl t'êe wãjida. Ãchi sia trùpataarãpa Saulmaa trùdak'ãri, oopijida. 4 Mãga nùde Saulpa mãgaji chi arma anipaparimaa:—Pù espada êt'a atáji mãik'aapa mù su peepáde aji. K'inia–e jãgà ijãadak'aa beerãpa mù peedamerã mù oo iru p'anù misa.
Mamîda chi k'aripaparipa iru pee k'inia–e paji, audú ãchobee–idaa bada perã. Maperã Saulpa ichi espada k'îrapite k'â ùt'aa bùp'eda, baaiji aù ârù. Mãgá ichi juadoopa piudachi. 5 Chi k'aripaparipa mãga unuk'ãri, auk'a ooji ichi espada ome. Mãgá piuji. 6 Ma ewateweda piuji Saúl, chi warrarã õpee. Mãgá ichi warrarã jõmaweda piujida. 7 Israelitaarã to idepema eujã jewedaade p'anapatap'edaarãpa unudak'ãri israelitaarã soldaorã jîchoo wãda mãik'aapa k'awaadak'ãri Saúl, ichi warrarã ome piudap'edaa, ãchi p'uuru atabëijida auk'a jîchoodait'ee. Maap'eda filisteorã ma p'uurude p'ana chepachida.
8 Aù norema filisteorãpa piudap'edaarã k'ap'ùade net'aa iru bada ata chedak'ãri, Guilboa eede unu atajida Saúl k'ap'ùa piuda mãik'aapa ichi warrarã õpee k'ap'ùa piuda. 9 Mãgá Saúl poro t'ùap'e atajida mãik'aapa iru arma anipada jita atajida. Mãpai jara pëijida Filistea eujã jõmaade mãdepemaarãpa jara pëidamerã ãchi ak'õre waibùa apatap'edaa te ak'ùpataarãmaa. 10 Ma t'êepai Saúl arma p'e bùjida ãchi ak'õre waibùa apatap'edaa tede. Jõdee chi poro t'ùap'eda baijira bùjida ãchi ak'õre waibùa apatap'edaa Dagón tede.
11 Israelitaarã Jabés de Galaadde p'anapatap'edaarãpa mãga k'awaa atadak'ãri, 12 chi sõcharra p'anadap'edaarã pedeeteedap'eda, wãjida Saúl k'ap'ùa atade. Saúl k'ap'ùa piuda mãik'aapa ichi warrarã k'ap'ùa piuda atanajida mãik'aapa aneejida Jabés p'uurudee. Mama ma k'ap'ùa piuda jau bùjida encina pak'uru k'ûrasaa ek'ari mãik'aapa k'ãima siete nek'oda–ee p'aneejida.