9
1 Israeldeepa uchiadap'edaarã t'â jõmaweda p'ã bëijida reyrãpa oopatap'edaa p'ãdap'edaa librode.Babilonia eujãdeepa chedap'edaarã
(Nehemías 11.3-19)
Babilonia eujãdepemaarã Judá eujãdepemaarã ome chõo chejida. Mãùrãpa ãra p'oyaadak'ãri, preso ateejida ãchi eujãdee. Tachi Ak'õrepa mãga oopiji ma israelitaarãpa oodaamaa p'anadap'edaa perã irua oopi bùk'a.
2 Taarã pak'ãri, ma ateedap'edaarã ãpùtee chejida ãchi eujãdee mãik'aapa ãchi p'uurudee. Chi naarapùara chedap'edaarã paji p'aareerã mãik'aapa Levideepa uchiadap'edaarã Tachi Ak'õre tede mimiapatap'edaarã. 3 Jerusalén p'uurude nãgùùrã p'ana chejida: Judadeepa uchiadap'edaarã, Benjamindeepa uchiadap'edaarã, Efraindeepa uchiadap'edaarã mãik'aapa Manasedeepa uchiadap'edaarã.
4 Nãgà Judadeepa uchiadap'edaarã chejida: Utay, Asaías mãik'aapa Jeuel. Utay ëreerãdepemaarã nãgùùrã paji. Utay ak'õre Amiud paji. Amiud ak'õre Omrí paji. Omrí ak'õre Imrí paji. Imrí ak'õre Baní paji. Ma Baní Judá warra Faredeepa uchiada paji. 5 Silonitaarãdepema Asaías, Judá warra Selá warra naapema paji. Iru ichi warrarã ome cheji. 6 Zeraitaarãdepema Jeuel, Judá warra Zeradeepa uchiada, cheji ichideerã ome. Ma Judadeepa uchiadap'edaarã jõmaweda juasiadak'ãri, seiscientos noventa paji.
7 Na Benjamindeepa uchiadap'edaarã chejida: Salú, Ibneías, Elá mãik'aapa Mesulán. Salú ak'õre Mesulán paji. Mesulán ak'õre Hodavías paji. Hodavías ak'õre Senuáa paji. 8 Ibneías ak'õre Jeroán paji. Jõdee Elá ak'õre Uzi paji. Uzi ak'õre Micri paji. Jõdee Mesulán ak'õre Sefatías paji. Sefatías ak'õre Reuel paji. Reuel ak'õre Ibnías paji. 9 Mãùrã chejida ãchideerã ome. Israeldeepa uchiadap'edaarã t'â p'ã jêra bùde jara bùk'a ma Benjamindeepa uchiadap'edaarã jõmaweda juasiadak'ãri, novecientos cincuenta y seis paji. Ma ùmùk'îraarã ãchi ëreerãdepemaarã poro waibùarã paji.
10 P'aareerã chedap'edaa nãgùùrã paji: Jedaías, Joyarib, Jaquín, 11 mãik'aapa Azarías. Azarías ak'õre Jilquías paji. Jilquías ak'õre Mesulán paji. Mesulán ak'õre Sadoc paji. Sadoc ak'õre Merayot paji. Merayot ak'õre Ajitob paji. Ma Ajitob Tachi Ak'õre tede mimiapatap'edaarã jõmaweda poro waibùa paji. 12 Awaraa p'aare Adaías ichiaba cheji. Iru ak'õre Jeroán paji. Jeroán ak'õre Pasur paji. Pasur ak'õre Malquías paji. Awaraa p'aare Masay cheji. Iru ak'õre Adiel paji. Adiel ak'õre Jazera paji. Jazera ak'õre Mesulán paji. Mesulán ak'õre Mesilemit paji. Mesilemit ak'õre Imer paji. 13 Ma p'aareerã ãchideerã ome mil setecientos sesenta paji. Ãra jõmaweda Levideepa uchiadap'edaarã ëreerãdepemaarã poro waibùarã paji mãik'aapa Tachi Ak'õre tede p'aareerã mimia pia oopachida.
14 P'aareerã awara na Levideepa uchiadap'edaarã chejida: Semaías ak'õre Jasub paji. Jasub ak'õre Azricán paji. Azricán ak'õre Jasabías paji. Jasabías uchiaji Merari. Merarideepa uchiajida: 15 Bacbacar, Heres, Galal, Matanías. Matanías ak'õre Micaías paji. Micaías ak'õre Zicrí paji. Zicrí ak'õre Asaf paji. 16 Abdías ak'õre Semaías paji. Semaías ak'õre Galal paji. Galal ak'õre Jedutún paji. Jõdee Berequías ak'õre Asá paji. Asá ak'õre Elcaná paji. Ma Elcaná netofatitaarã p'uuru k'aipeede bapachi.
17 Ichiaba chejida na Tachi Ak'õre tedepema puerta jâapataarã: Salún, Acub, Talmón, Ajimán, ãchi ëreerã paara. Salún ãchi poro waibùa paji. 18 Mãùrãpa jâapachida Tachi Ak'õre te oriente eerepema Rey T'îupata puerta apatap'edaa. At'ãri ma Levideepa uchiadap'edaarãpa ma puerta jâapata.
19 Ma Salún ak'õre Coré paji. Coré ak'õre Ebiasaf paji. Ebiasaf ak'õre Coré paji. Ma Levideepa uchiadap'edaarã, coreitaarã apatap'edaarãpa Tachi Ak'õre ome unupata te ne–edee ooda t'îupata jâapachida, ãchi chonaarãpa israelitaarã k'ãipata oopatap'edaamãi t'îupata jâapatap'edaak'a.
20 Aù naaweda Eleazar warra Finés mãùrã poro waibùa paji. Maapai Tachi Ak'õrepa Fenés pia ak'ùpachi. 21 Zacarías ak'õre Meselemías paji. Ichi Tachi Ak'õre ome unupata te ne–edee ooda t'îupata jâapari paji.
22 Ma Levideepa uchiadap'edaarã jùrùt'eradap'edaa Tachi Ak'õre tedepema puerta jâapataadamerã doscientos doce paji. Ãchi t'â p'ã p'anajida ãchi p'uuru bee chaa. Rey Davidpa mãik'aapa Samuel, chi ne–inaa p'asait'ee bù unuparipa mãùrã bùjida ma mimia oopataadamerã. 23 Ma Ak'õre ome unupata te t'îupata jâapataarã ãchi warrarã ome ma mimia oopachida Tachi Ak'õre ome unupata te ne–edee oodade, maapai ma te Tachi Ak'õre tek'a iru p'anadap'edaa perã. 24 Jâapachida Tachi Ak'õre ome unupata tedepema t'îupata bee oriente eere, occidente eere, norte eere mãik'aapa sur eere. 25 Tomia chaa ãchi ëreerãdepemaarã, ãchi p'uurude p'anapatap'edaarã t'erabai chejida ãra k'aripade. 26 Mamîda ma Levideepa uchiadap'edaarã k'îmari et'ewa jaradaarãpab edajãdepema cuarto mãik'aapa Ak'õre tedepema net'aa pi–ia jâapachida. 27 P'ãrik'ua, Ak'õre te ãuk'idaa jâa paraa bùpachida mãik'aapa tap'eda pak'ãri, ma te t'îupata ewapachida.
28 Mãùrã ûk'uruurãpa jâapachida Ak'õre tedepema net'aa iru p'anadap'edaa p'aareerãpa ãchi mimia oodamerã. Ma net'aa te taawaa ateedak'ãri, ãrapa juasiajida mãik'aapa waya teedaa aneedak'ãri, auk'a oojida. 29 Awaraarãpa jâapachida nãgee net'aa awara bùdap'edaa Ak'õre–it'ee: harina, vino, aceite, ne–inaa t'ûa bapari mãik'aapa perfume. 30 P'aareerã ûk'uruurãpa ne–inaa t'ûa bapari p'oirapachida perfume ome. 31 Coreita Salún warra naapema, Matatiapa ne–inaa p'ep'edee harina aceite ome p'oiradadee ooda âpùpachi Tachi Ak'õre–it'ee awara bùdamerã. 32 Awaraa coreitaarãpa pan âpùpachida âipata ewari chaa awara bùdamerã Ak'õre tedepema mesade. 33 Awaraa Levideepa uchiadap'edaarã ëreerãdepemaarã poro waibùarãpa k'aripachida Tachi Ak'õre–it'ee. Mãùrã Tachi Ak'õre te ik'aawa bee cuartode p'anapachida ãstaawa, p'ãrik'ua pida mimiapatap'edaa perã. Mapa awaraa mimia oodak'aa paji.
34 Israeldeepa uchiadap'edaarã t'â p'ã jêra bùde jara bùk'a mãgùùrã Levideepa uchiadap'edaarã ëreerãdepemaarã poro waibùarã paji mãik'aapa Jerusalende p'anapachida.
Saúl ëreerã
35 Gabaón p'uurude Gabaón ak'õre, Jehiel bapachi. Chi wêra t'âjarapachida Macá. 36 Chi warrarã paji: chi naapema Abdón, Zur, Quis, Baal, Ner, Nadab, 37 Guedor, Ajío, Zacarías mãik'aapa Miclot. 38 Miclot warra Simán paji. Mãùrã ichiaba Jerusalende p'anapachida ãchi ëreerã ome.
39 Ner warra Quis paji. Quis warra Saúl paji. Saúl warrarã paji: Jonatán, Malquisúa, Abinadab mãik'aapa Esbaal.c 40 Jonatán warra Meribaald paji. Meribaal warra Micaías paji. 41 Micaías warrarã paji: Pitón, Mélec, Tarea mãik'aapa Acaz. 42 Acaz warra Jará paji. Jará warrarã paji: Alemet, Azmávet mãik'aapa Zimri. Zimri warra Mosá paji. 43 Mosá warra Biná paji. Biná warra Refaías paji. Refaías warra Elasá paji. Elasá warra Azel paji.
44 Azelpa seis warrarã iru baji: Azricán, Bocrú, Ismael, Searías, Abdías mãik'aapa Janán. Mãùrã Azel warrarã paji.