Rubendeepa uchiadap'edaarã
5
1 Rubén Israel warra naapema paji. Mamîda iru k'ãik'ãri chi ak'õre wêra k'ãiparii ome, chi ak'õrepa jaraji iru waa chi naapemak'a–e. Iru k'ãyaara Israelpa chi warra José bùji chi warra naapema pamerã. Maperã Rubén ichideerã ome t'â p'ãda–e paji naapema warrarã t'â p'ã jêra bùde. 2 Ma awara Judá apemaarã âpemaarã k'ãyaara #poro waibùara paji mîda mãik'aapa irudeepa reyrã uchiajida mîda, José chi warra naapemak'a beeji chi ak'õrepa jaradak'a. 3 Israel warra naapema Rubenpa nãgà warrarã ooji: Janoc, Falú, Jezrón mãik'aapa Carmí.4 Joeldeepa uchiadap'edaarã nãgùùrã paji. Joel warra Semaías paji. Semaías warra Gog paji. Gog warra Simí paji. 5 Simí warra Micaías paji. Micaías warra Reaías paji. Reaías warra Baal paji. 6 Baal warra Beerá paji. Beerá Rubendeepa uchiadap'edaarã poro waibùa paji Asiriadepema rey Tiglat Pileserpa ãra preso ateek'ãri ichi eujãdee.
7 Israeldeepa uchiadap'edaarã t'â p'ã jêra bùde jara bùk'a Beerá ëreerã paji: ãchi poro waibùa Jeyel, Zacarías 8 mãik'aapa Bela. Bela Azaz warra paji. Azaz Semá warra paji. Semá Joel warra paji. Bela bapachi Aroer todeepa Nebo mãik'aapa Baal Megón parumaa. 9 Iru, ichideerã ome oriente eere p'anapachida pania wêe bù eujã ideepa Éufrates to parumaa. Ma eujã waibùade p'anapachida, Galaad eujãde p'anapataadak'ãri, ãchi ne–animalaarã audú îwadap'edaa perã.
10 Saúl israelitaarã rey bak'ãri, Rubendeepa uchiadap'edaarã jura chõopachida agarenoorã ome mãik'aapa mãgùùrã p'oyaajida. Maap'eda Galaad eujã oriente eere p'anapachida.
Gaddeepa uchiadap'edaarã
11 Gaddeepa uchiadap'edaarã Rubendeepa uchiadap'edaarã k'îrapite p'anapachida Basán eujãde, Salcá p'uuru parumaa. 12 Ma Gaddeepa uchiadap'edaarã Basán eujãde p'anadak'ãri, ãchi poro waibùarã paji: naapùara Joel, aù eere Safán, aù eere Janay, aù eere Safat. 13 Ma Gaddeepa uchiadap'edaarã ëreerã siete paji: Micael ëreerã, Mesulán ëreerã, Sabá ëreerã, Joray ëreerã, Jacán ëreerã, Zía ëreerã mãik'aapa Éber ëreerã. 14 Ma ùmùk'îraarã siete Abijaíl warrarã paji. Abijaíl ak'õre Jurí paji. Jurí ak'õre Jaroa paji. Jaroa ak'õre Galaad paji. Galaad ak'õre Micael paji. Micael ak'õre Jesisay paji. Jesisay ak'õre Yadó paji. Yadó ak'õre Buz paji. 15 Ahí ma ëreerã siete poro waibùa paji. Iru ak'õre Abdiel paji. Chi ak'õchona Guní paji. 16 Ma jõmaarã Galaad eujãde mãik'aapa Basán eujãde p'anapachida. P'uuru k'aipeede p'anapachida maa–e pùrã p'uurudeepa taawa Sarón eujãde ãchi ne–animalaarãpa p'ûajara mama k'opataadamerã. 17 Judadepema Jotán rey bùde mãik'aapa Israeldepema Jeroboán rey bùde, ma eperãarã t'â p'ãpijida Israeldeepa uchiadap'edaarã t'â p'ã jêra bùde.
18 Rubendeepa uchiadap'edaarã, Gaddeepa uchiadap'edaarã mãik'aapa Manasedeepa uchiadap'edaarã esa–auk'a p'anadap'edaarã soldaorã sõcharra p'anapachida. Escudo, espada, ematrùma anipapachida chõode uchiadak'ãri. Chõo k'awaa p'anapachida. 19 Chõojida agarenoorã ome mãik'aapa Jetur, Nafis, Nodab p'uurudepemaarã ome. 20 Tachi Ak'õrepa ãra k'aripa bada perã, ma agarenoorã p'oyaajida, mãùrã eere p'anadap'edaarã paara. Chõo jõnùde chupùria iidijida Tachi Ak'õrepa ãchi k'aripamerã. Maperã irua ãra k'aripaji, irude ijãapatap'edaa perã. 21 Chõoda t'êepai ãrapa ma agarenoorã ne–animalaarã jãri ata wãjida. Mãgá atajida cincuenta mil camelloorã, doscientos cincuenta mil ovejaarã mãik'aapa dos mil burroorã, cien mil presoorã paara. 22 Ãra k'îra unuamaa iru p'anapatap'edaarã chok'ara piujida Tachi Ak'õrepa k'aripa bada perã. Mãgá mãùrã eujãde p'aneejida, awaraa k'îra unuamaa iru p'anapatap'edaarãpa israelitaarã ãchi eujãdee preso ateerutamaa.
23 Manasedeepa uchiadap'edaarã esa–auk'a p'anadap'edaarã p'anapachida Basán eujãdeepa Baal Hermón, Senir mãik'aapa Hermón ee parumaa. Ãra chok'ara paji. 24 Manasedeepa uchiadap'edaarã ëreerã poro waibùarã paji: Éfer, Isí, Eliel, Azriel, Jeremías, Hodavías mãik'aapa Yadiel. Mãgùùrã soldaorã sõcharra paji mãik'aapa ãchi ëreerã poro waibùarã paji. 25 Mamîda oodaamaa p'anapachida ãchi chonaarã Ak'õre Waibùapa k'inia bùk'a. Irumaa ùt'aa t'âdai k'ãyaara, ùt'aa t'âpachida awaraa eujãdepemaarã ak'õre waibùa apatap'edaarãmaa. Mãga oopachida ma ak'õre waibùa apatap'edaarã k'aurepa Tachi Ak'õrepa ma eujãdepemaarã jõpiji mîda. 26 Mãga oopatap'edaa perã, israelitaarã Ak'õre Waibùapa Asiriadepema rey Pulmaa k'îsiapiji chõonamerã ãra ome. (Mãgà Pul ichiaba t'âjarapachida Tiglat Piléser III.) Mãgùpa ma Rubendeepa uchiadap'edaarã, Gaddeepa uchiadap'edaarã mãik'aapa Manasedeepa uchiadap'edaarã esa–auk'a p'anadap'edaarãdeepa uchiadap'edaarã p'oyaap'eda, preso ateeji ichi eujãdee. P'anapiji Jalaj, Jabor, Hará p'uurude mãik'aapa Gozán to ide. Mama at'ãri p'anapata.