Tachi Ak'õre pedee jarapari Eliapa rey Acabmaa jarada
17
1 Elías Tachi Ak'õre pedee jarapari paji. Mãgà Tisbé p'uurudepema paji; Galaad eujãde bada. Eliapa mãgaji israelitaarã rey Acabmaa: “Mùa nãga juraaru mù chipari, israelitaarã Ak'õre Waibùa k'îrapite. Na año cherude k'oi che–e pait'eeda aji, sereno paara.”2 Rey Acabpa mãga ûrik'ãri, k'îrau beeji Elías ome. Mapa Tachi ak'õrepa Eliamaa mãgaji: 3 “Wåji oriente eeree. Mirunáji Querit apata to chak'e bùmãi Jordán to oriente eere. 4 Mãpema to chak'edeepa pania toyada aji. Ma awara mùa cuervoorã pëiit'eeda aji, chik'o ateedamerã pùmaa.”
5 Eliapa ooji Tachi Ak'õrepa jaradak'a. Banaji Querit apata to chak'e bùmãi Jordán to oriente eere. 6 Mama bùde tap'eda, k'ewara paara, cuervoorãpa pan, nechiara ome aneejida irua k'omerã. Ma to chak'edeepa pania joi ataji toit'ee. 7 Mamîda taarã–e nùde ma to chak'e p'oo beeji ma eujãde k'oi che–e pada perã.
Elías Sareptadepema p'êtrãa ome
8 Mãpai Tachi Ak'õrepa mãgaji Eliamaa: 9 “Banapáde aji, Sarepta p'uurude, Sidón p'uuru k'ait'a. Mama baparida aji, p'êtrãa, mùa jùrùt'erada pùmaa chik'o teemerã.”
10 Aramãgá Elías banaji Sarepta p'uurude. Ma p'uuru t'îupatamãi panak'ãri, unu ataji p'êtrãa k'ùrùpa t'ùpù p'emaa bù. T'â atap'eda, mãgaji:
—Mù chupùria k'awaapáde aji. Pania ma–ãri teepáde aji, mùa toit'ee.
11 Ma p'êtrãa wãit'ee bùde pania atade, Eliapa waya t'âji.
—Chupùria k'awaapáde aji, ichiaba pan ma–ãri aneemerã.
12 Ma wêrapa p'anauji:
—Tachi Ak'õre ichita chok'ai bù k'îrapite mùa juraa bù pan âpùda apida wêe bùda aji. Harina ma–ãripai iru bùda aji, aceite ma–ãri ome. Mùa t'ùpù p'e baji aùdee pan ooit'ee mù warra–it'ee, mù–it'ee paara. Waa wê–e perã, ma pan k'odap'eda, piudayada aji, jarrapa.
13 Mãpai Eliapa mãgaji:
—Waaweenáaji. Pan oonáji. Pan p'ep'edee ma–ãri óoji mãik'aapa chi naara âpùda mù–it'ee anéeji. Maap'eda awaraa âpàji pùa pù warra ome k'omerã. 14 Israelitaarã Ak'õre Waibùapa jaraji pù tede bù harina aceite ome jõ–e pait'ee irua waya k'oi chepirumaa na eujãde.
15 Ma p'êtrãapa oonaji Eliapa jaradak'a. Mãgá taarã nùde ichi, chi warra, Elías paara pan k'opachida. 16 Ma harina aceite ome jõ–e paji Tachi Ak'õrepa jaradak'a Elías ideepa.
17 Bùù ap'eda, ma p'êtrãa warra k'ayaadachi. Jua k'aya bap'eda, îyapa atuaji. 18 Mãpai ma p'êtrãapa Eliamaa mãgaji:
—Tachi Ak'õre pedee jarapari, ¿sãap'eda mùmaa chejima? aji. ¿Cheji–ek'ã aji, mùmaa k'irãpapiit'ee mùa p'ek'au k'achia ooda mãik'aapa mù warra piupiit'ee?
19 Mãpai Eliapa mãgaji:
—Pù warra mùmaa teepáde aji.
Ma p'êtrãa juadeepa chi warra atap'eda, ateeji ùt'ùpema pisode Elías k'ãipariidamaa. Ma warra jêra bùji ichi camade. 20 Mãpai golpe ùt'aa iidiji Tachi Ak'õremaa: “Mùchi Ak'õre Waibùa, ¿pùa na p'êtrãa auk'a chupùriapi k'inia bùk'ã? aji. Irua ichi tede mù auteebaiji mîda, mãga bùta ¿iru warra piupijima?” aji.
21 Aweda Elías jêra beeji ma warra k'ap'ùa piuda ârù. Jêra beema õpee mãgá jêra beeji golpe ùt'aa iidiru misa: “Mùchi Ak'õre Waibùa, ¡chupùria k'awáaji, mãik'aapa na warra waya chok'aipipáde!” aji.
22 Tachi Ak'õrepa ûriji Eliapa chupùria iidi nâbada. Ma warra chok'aipiji. 23 Aramata Eliapa ma warra ateeji chi edaik'a eerepema pisodee mãik'aapa teeji chi nawemaa. Mãga bùde mãgaji:
—¡Pùchá, ak'àji! ¡Pù warra chok'ai bùda! aji.
24 Mãpai ma wêrapa mãgaji:
—Ârara sí, mùa k'awa bù pù wãara Tachi Ak'õre pedee jarapari. Pùa wãara pedee jaraparida aji, Tachi Ak'õrepa jarapi bùk'a.