16
1 Maapai Tachi Ak'õrepa Jananí warra, t'âpatap'edaa Jehú, pëiji Basamaa nãgà pedee jarade:2 “Pù ek'ariara baji awaraa israelitaarã k'ãyaara. Yooro p'orak'a baji. Mamîda mùa pù israelitaarã poro waibùa papiji. Mãga ooji mîda, pùa mù eperãarãmaa ne–inaa k'achia oopipachi, Jeroboanpa oodak'a. Mãga oo bùpa mù k'îraupiji.3 Maperãpù mùa pù, pùchideerã ome jõpiit'ee. Ooit'ee pùchideerã ome mùa oodak'a Nabat warra, Jeroboandeerã ome.4 Pù ëreerã p'uurude piudait'eerã usaarãpa k'ok'oodait'ee. Jõdee chi p'uurudeepa taawa piudait'eerã ãkosoorãpa k'ok'oodait'ee.”
5 Awaraa ne–inaa Basapa ooda mãik'aapa iru bapariida p'ã bù Crónicas apata librode apema Israeldepema reyrãpa oopatap'edaa ome. 6 Basá piuk'ãri, ùajida Tirsá p'uurude. Chi warra Elá rey beeji ichi pari.
7 Tachi Ak'õrepa pedee k'achia jaraji Basamaa, ichideerãmaa ichi pedee jarapari Jananí warra Jehú ideepa. Mãga jaraji mãgùpa p'ek'au k'achia oopachi perã Tachi Ak'õre k'îrapite. Basapa Tachi Ak'õre k'îraupiji ne–inaa k'achia oopariida perã Jeroboán, ichi warrarã ome oopatap'edaak'a. Maperã Tachi Ak'õrepa ãchi jõpiji.
Elá mãik'aapa Zimri rey pada Israelde
8 Asá Judá eujãde veintiséis año rey bùde, Basá warra Elá rey beeji Israelde. Bapachi Tirsá p'uurude. Año omé wãyaarude Elá rey paji. 9 Mãga nùde ichi ek'ari beerãdepema aba Zimri, pedee beeji ichi ãpùte. Mãgà eperãpa rey jura chõopari carreta ûk'uru iru baji ichi jua ek'ari. Ewari aba rey Elá, Tirsá p'uurude bùde chi mimiapataarã poro waibùa, Arsá temaa wãji. To bap'eda, piu beeji. 10 Mãga nùde Zimri pacheji mãik'aapa Elá pee atapëiji. Mãgá Zimri rey beeji Elá pari. Mãga p'asaji rey Asá veintisiete año rey bùde Judá eujãde.
11 Zimri ewaa rey mimiade t'îup'eda, Basá ëreerã jõmaweda peepiji. Ùmùk'îra apida chok'ai uchia–e paji ichi juadeepa Basá ëreerã, chi k'õp'ãyoorã paara. 12 Mãgá Zimripa Basadeerã jõmaweda jõpiji, Tachi Ak'õrepa Basamaa jaradak'a ichi pedee jarapari Jehú ideepa. 13 Tachi Ak'õrepa mãga oopiji Basá, chi warra Elá ome audú p'ek'au k'achia oopatap'edaa perã. Mãgá ne–inaa k'achia oo p'anadak'ãri, israelitaarã k'achiade baaipijida ùt'aa t'âpidap'edaa perã ne–inaa juapa ooda k'îrapite. Mãgapù israelitaarã Ak'õre Waibùa k'îraupijida.
14 Awaraa ne–inaa Elapa ooda mãik'aapa ichi bapariida p'ã bù Crónicas apata librode, awaraa Israeldepema reyrãpa oopatap'edaa ome.
15 Asá veintisiete año rey bùde Judá eujãde, Zimri rey beeji Tirsá p'uurude. Mamîda ewari sietepai rey paji. Maapai Israeldepema soldaorã p'anajida Filistea eujãde Gibetón p'uuru pidaarã ome chõodait'ee p'anadap'edaa perã. 16 Mamîda ûridak'ãri Zimripa rey Elá peep'eda, ichi rey papida, ma soldaorã jõmaarãpa ãchi poro waibùa Omrí, rey bùjida. 17 Mãpai Omrí, ichi soldaorã ome ma p'uuru Guibetón ichiak'au bùjida mãik'aapa jîp'a chõode wãjida Tirsá p'uurudee.
18 Zimripa k'awak'ãri ãrapa Tirsá p'uuru p'oyaa wãda, t'îuji palaciodepema torrede mãik'aapa t'ùpùtaupa paa atapëiji. Mãgá Zimri piuji. 19 Mãga p'asaji Zimripa p'ek'au k'achia oopachi perã Tachi Ak'õre k'îrapite. Auk'a ne–inaa k'achia oopachi Jeroboanpa oodak'a, israelitaarã k'achiade baaipik'ãri.
20 Awaraa ne–inaa Zimripa ooda mãik'aapa ichia ooda rey Elá peeit'ee; ma jõma p'ã bù Crónicas apata librode, awaraa Israeldepema reyrãpa oopatap'edaa ome.
Israel eujãde Omrí rey pada
21 Zimri piuda t'êepai israelitaarã k'îsia awara–awaraa p'aneejida. Ûk'uru t'îujida Guinat warra Tibni eere, k'inia p'anadap'edaa perã iru rey pamerã. Awaraarã p'aneejida Omrí eere. 22 Maperã Omrí eere p'anadap'edaarã chõomaa p'aneejida Tibni eere p'anadap'edaarã ome. Made Tibni piuji. Mãgá Omrí rey beeji.
23 Asá treinta y un año rey bùde Judá eujãde, Omrí rey beeji Israelde. Doce año wãyaarude Omrí israelitaarã rey paji. Madepema seis año bapachi Tirsá p'uurude. 24 Eperã Sémer juak'aawa Omripa ee neto ataji. P'arat'a kilo seis p'aaji ma ee, Samaria apatap'edaa, pari. Mama p'uuru chiwidi, jâa paraa, oopiji. T'â bùji Samaria, chi naawedapema chipari Sémer mãga t'âjarapatap'edaa perã.
25 Mamîda Omripa ichiaba p'ek'au k'achia oopachi Tachi Ak'õre k'îrapite. Apemaarã Israeldepema reyrãpa ne–inaa k'achia oopatap'edaa k'ãyaara ne–inaa k'achiara oopachi. 26 Oopachi Nabat warra, Jeroboanpa oopariidak'a mãik'aapa auk'a israelitaarã k'achiade baaipipachi ùt'aa t'âpataadamerã ne–inaa juapa oodamaa. Mãgá israelitaarãpa Ak'õre Waibùa k'îraupijida.
27 Awaraa ne–inaa Omripa ooda ichia bapariida ome p'ã bù Crónicas apata librode awaraa Israeldepema reyrãpa oopatap'edaa ome. 28 Omrí piuk'ãri, ùajida Samaria p'uurude. Chi warra Acab rey beeji ichi pari.
Israel eujãde Acab rey pada
29 Asá treinta y ocho año rey bùde Judá eujãde, Omrí warra Acab rey beeji Israelde. Veintidós año wãyaarude israelitaarã rey paji. Samaria p'uurude bapachi. 30 Acabpa ichiaba p'ek'au k'achia oopachi Tachi Ak'õre k'îrapite. Apemaarã reyrã k'ãyaara ne–inaa k'achiara oopachi. 31 K'îra nejasia–e paji auk'a ooit'ee ne–inaa k'achia Nabat warra Jeroboanpa oopariidak'a. Ma awara nãgà ne–inaa audú k'achia ooji. Miak'ãiji Sidondepema rey Et Baal k'au Jezabel ome. Ma wêra k'aurepa ùt'aa t'â k'awaaji ak'õre waibùa apatap'edaa Baalmaa. 32 Ichiaba Samaria p'uurude ùt'aa t'âpata te, altar ome oopiji Baal–it'ee. 33 Ma awara awaraa ak'õre waibùa apatap'edaa Aserá k'îrak'a bù oopiji. Maperãpù Acabpa Tachi Ak'õre k'îraupiji. Audupùara k'îraupiji aù naawedapema Israeldepema reyrãpa k'îraupidap'edaa k'ãyaara.
34 Acab rey bùde Betel p'uurudepema Hielpa Jericó p'uurude muralla chiwidi ooji. Mamîda mãga oo bùpa chi warra naapema Abirán piuji. Ma awara ma muralladepema puerta oo bùpa chi warra t'êepema Segub ichiaba piuji. Mãga p'asaji Tachi Ak'õrepa naaweda jaradak'a Nun warra Josué ideepa.