Judá eujãde Abías rey pada
(2 Crónicas 13.1-22)
15
1 Nabat warra Jeroboán dieciocho año rey bùde Abías rey beeji Judá eujãde. 2 Año õpee wãyaarude Abías rey paji. Bapachi Jerusalén p'uurude. Chi nawe t'âjarapachida Macá. Mãgà Absalón k'au paji. 3 Abiapa p'ek'au k'achia oopachi Tachi Ak'õre k'îrapite, chi ak'õrepa oodak'a. T'ãripa ijãak'aa paji Tachi Ak'õrede, chi chonaa Davidpa ijãadak'a. 4 Mãga bapachi mîda, Tachi Ak'õrepa Abías ichiak'au bùji rey pamerã Jerusalende. Mãga ooji Davidmaa jarada perã irudeepa uchiadait'eerã rey ichita padait'ee. Ma k'aurepa Tachi Ak'õrepa Abías warra ichiaba rey papiji. 5 Tachi Ak'õrepa David pia ak'ùpachi, irua ooda perã ichia jaradak'a. Ichita oopachi Ak'õrepa oopidak'a. Aba hitita pida Uriamaa oodata ooji, Tachi Ak'õrepa jara–eeta.6 Reboán chok'ai bùde chõopachida ichi eere p'anadap'edaarã, Jeroboán eere p'anadap'edaarã ome. 7 Mãga paji ichiaba Abías rey pak'ãri. Awaraa ne–inaa Abiapa ooda Crónicas apata librode p'ã bù, awaraa Judadepema reyrãpa oopatap'edaa ome. 8 Abías piuk'ãri, ùajida David p'uurude. Chi warra, Asá, rey beeji ichi pari.
Judá eujãde Asá rey pada
(2 Crónicas 14.1-5; 15.16-19)
9 Jeroboán veinte año rey bùde Israel eujãde, Asá rey beeji Judadeepa uchiadap'edaarã eujãde. 10 Año cuarenta wãyaarude Asá rey paji. Mãga nùde bapachi Jerusalén p'uurude. Chi awela t'âjarapachida Macá. Mãgà Absalón k'au paji.
11 Asá rey bùde ne–inaa pia oopachi Tachi Ak'õre k'îrapite. Oopachi chi chonaa Davidpa oodak'a. 12 Ma ùmùk'îraarã p'anapatap'edaa ùt'aa t'âpatamãi chedap'edaarãpa ãchi ãtau nodamerã jõmaweda jërek'ooji eujã ichi jua ek'ari bùdeepa. Ichiaba ne–inaa juapa ooda aù k'îrapite ùt'aa t'âpata jõmaweda ãripiji. 13 Ma awara Asapa chi awela, Macá, reina nawe apatap'edaa, ichi puestodeepa jëret'aaji, ichia oopida perã ijãadak'aa beerã ak'õre waibùa Aserá k'îrak'a bù. Rey Asapa ma k'îrak'a bù ãrit'aaji mãik'aapa paa pëiji to chak'e p'oo bada Cedronde. 14 Ee nok'ode p'anadap'edaa ijãadak'aa beerã ùt'aa t'âpatamãi ãripi–e paji mîda, Asapa Tachi Ak'õrede ijãapachi. 15 Tachi Ak'õre tede bùji jõmaweda nêe, p'arat'a ome ichia p'eda, chi ak'õrepa p'eda paara teedait'ee Tachi Ak'õre–it'ee.
Asá pedeeteeda Ben Adad ome
(2 Crónicas 16.1-10)
16 Asá rey bùde ichi eere p'anadap'edaarã chõopachida Israeldepema rey Basá eere p'anadap'edaarã ome. 17 Chõoda abaade Basá Judadeepa uchiadap'edaarã eujãde chõo cheji mãik'aapa soldaorã chok'ara bùji Ramá p'uurude, mama eperãarã t'îunaadamerã Asá jua ek'ari bada eujãde. 18 Mãga nùde Asapa Tachi Ak'õre tede mãik'aapa ichi tede bada nêe, p'arat'a ome tee pëiji ichi ek'ari beerã ome Siria eujãdee, ãchi rey Ben Adadmaa. Ma rey Tabrimón warra mãik'aapa Hezión ãichak'e paji. Damasco p'uurude bapachi. Ma nêe, p'arat'a ome Asapa nãgà pedee jara pëiji Ben Adadmaa: 19 “Pedeedáma chõoda–ee p'anapataadait'ee, tai ak'õreerãpa oodap'edaak'a. Na k'art'a ome mùa pëiru pù–it'ee nêe, p'arat'a ome. K'awa bù pùa pedeeda Israeldepema rey Basá ome chõoda–ee p'anapataadait'ee. Mamîda mùa k'inia bù pùa ma pedee wêpamerã. Mãgá Basapa mù ichiak'au bëiit'eeda” aji.
20 Rey Ben Adadpa ijãaji Asapa jara pëida. Pëiji ichi soldaorã poroorã ãchi jua ek'ari soldaorã ome chõonadamerã israelitaarã ome. Mãgá nãgà p'uuru p'oyaajida: Iyón, Dan, Abel Betmacá mãik'aapa ne–inaa ùapata p'uuru Neftalideepa uchiadap'edaarã eujãde p'anadap'edaa. 21 Basapa mãga k'awaa atak'ãri, ichi soldaorã ãyaa pëiji Ramá p'uurudeepa. Mãpai ãpùtee wãji Tirsadee. 22 Maapai rey Asapa jara pëiji Judadeepa uchiadap'edaarã eujãdepemaarã jõmaarã chip'edaidamerã Ramade. Mãpai Basapa pak'uru, mãu ome bëidap'edaa soldaorã aùde p'anadamerã jõmaweda wãra atajida mãik'aapa ateejida Gueba p'uurudee, Benjamín eujãde bù mãik'aapa Mizpa p'uurudee. Mama soldaorã te chiwidi oojida.
Asá jai–idaada
(2 Crónicas 16.11-14)
23 Ne–inaa awaraa ooda Asapa; ichiaba p'uuru chiwidi ooda, Crónicas apata librode p'ã bù, awaraa Judadepema reyrãpa oopatap'edaa ome.
Chonaa chak'ãri, Asá bùùrù k'ayaadachi. 24 Jai–idaak'ãri, ùajida ichi chonaarã ùadap'edaamãi David p'uurude. T'êepai chi warra Josafat rey beeji ichi pari.
Israel eujãde Nadab rey pada
25 Judadeepa uchiadap'edaarã eujãde Asá año omé rey bùde, Jeroboán warra Nadab rey beeji Israelde. Año omé wãyaarude Nadab israelitaarã rey paji. 26 Nadab p'ek'au k'achia oopachi Tachi Ak'õre k'îrapite. Ne–inaa k'achia oopachi chi ak'õrepa oodak'a. Mãgá ichia jida israelitaarã k'achiade baaipiji. 27 Mamîda Nadab rey bùde Isacardeepa uchiada Ahías warra Basá, awaraa israelitaarã ome pedeeteejida Nadab peet'aadait'ee. Mãgá pedeeteedap'eda, rey Nadab peejida Gibetón p'uurude. Ma p'uuru filisteorã eujãde baji. Mama Nadab eerepemaarã chõomaa p'anajida Israeldepema soldaorã ome.
28 Judá eujãde Asá año õpee rey bùde Basapa rey Nadab peeji. Mãgá Basá rey beeji Nadab pari. 29 Rey mimiade ewaa t'îup'eda, Basapa Jeroboandeerã jõmaweda peepiji. Tachi Ak'õrepa jaradak'a Siló p'uurudepema Ak'õre pedee jarapari Ahías ideepa, jõmaweda Jeroboandeepa uchiadap'edaarã peek'oojida. Apida chok'ai uchia–e paji Basá juadeepa. 30 Mãga paji Jeroboanpa p'ek'au k'achia oopariida k'aurepa. Irua israelitaarã k'achiade baaipiji mãik'aapa mãgá israelitaarã Ak'õre Waibùa k'îraupiji.
31 Awaraa ne–inaa Nadabpa ooda Crónicas apata librode p'ã bù apema Israeldepema reyrãpa oopatap'edaa ome.
32 Judadepema rey Asá eere p'anadap'edaarã, Israeldepema rey Basá eere p'anadap'edaarã ome chõo p'anapachida.
Israel eujãde Basá rey pada
33 Judá eujãde Asá año õpee rey bùde, Ahías warra Basá, rey beeji Israelde. Tirsá p'uurude bapachi. Veinticuatro año wãyaarude Basá israelitaarã rey paji. 34 Mamîda Basapa p'ek'au k'achia oopachi Tachi Ak'õre k'îrapite. Auk'a ne–inaa k'achia oopachi Jeroboanpa oopariidak'a. Mãgá ichia jida israelitaarã k'achiade baaipipachi.