Ak'õre pedee jarapari Ahiapa jarada Jeroboán ãpùte
—P'aru jîp'aa jâ béeji apidaapa k'awanaadamerã pù mù wêra. Mãpai wåji Siló p'uurudee. Mama bapari Tachi Ak'õre pedee jarapari Ahías. Iruata mùmaa jaraji mù rey pait'ee. 3 Iru–it'ee pan diez atéeji ne–inaa p'ep'edee ome, miéle ome. Iidipáde aji, sãga p'asait'ee na warra ome.
4 Mãga ooji Jeroboán wêrapa. Ichi net'aa atap'eda, wãji Silodee. Panaji Ahías temaa. Maapai Ahías tau p'ãriu baji, audú chonaa chada perã. 5 Mamîda Tachi Ak'õrepa irumaa k'awapiji Jeroboán wêra merã ûraa jùrù cheit'ee bada chi warra k'ayaa bù k'ap'ùa pari. Ichiaba k'awapiji sãga p'anauipia bù ma wêrapa iidi chek'ãri.
6 Maperã Ahiapa ûrik'ãri ma wêra puertade t'îuru, mãgaji:
—T'ìuji Jeroboán wêra. ¿Sãap'eda pù nama merã chejima? aji. Tachi Ak'õrepa ùtrùa pedeeta jarait'ee pùmaa. 7 Wåji Jeroboanmaa nãgà pedee jarade: “Tachi Ak'õre, israelitaarã Ak'õre Waibùapa nãga jara bù: ‘Mù eperãarãdeepa mùa pù jùrùt'eraji mãik'aapa awara bùji ãra poro waibùa pamerã. 8 Mùa israelitaarã jãri ataji Daviddeepa uchiada Reboán juadeepa teeit'ee pùmaa. Mamîda pù uchia–e paji mù mimiapari Davidk'a. Iruata t'ãripa oopachi mùa jaradak'a mãik'aapa mù ley p'ãdade jara bùk'a. Pia nipapachi mù k'îrapite. 9 Mamîda pù k'achiara bapari naawedapema ne–inaa k'achia oopatap'edaarã k'ãyaara. Mù k'îraupiji ne–inaa hierrodee oopik'ãri, aù k'îrapite eperãarã ùt'aa t'âpataadamerã. Mãga ook'ãri, ak'ùpiji mù waawee–e bù. 10 Maperã mùa ne–inaa k'achia ooit'ee pùdeepa uchiadait'eerãmaa. Jõmaweda ùmùk'îra warrarã pùdeepa uchiadait'eerã Israelde piupiit'ee. Apida chok'ai uchiada–e pait'ee. Pùdeepa uchiadait'eerã wêpapiit'ee ã wêpapipatak'a escobapa barredak'ãri. 11 Pùchi ëreerã p'uurude piudait'eerã usaarãpa k'o atapëidait'ee. Jõdee p'uurudeepa taawa piudait'eerã ãkosoorãpa k'ok'oodait'ee. Mãgá piudait'ee mùa mãga jarada perã.’ ”
12 Mãpai Ahiapa mãgaji Jeroboán wêramaa: “Wãpáde aji, pùchi temaa. P'uurude t'îurude pù warra jai–idaait'ee. 13 Mãga k'awaadak'ãri, israelitaarã jõmaarã jêedait'ee iru–it'ee. Maap'eda iru ùadait'ee. Iru aupai ùadait'ee. Awaraa Jeroboandeepa uchiadait'eerã apida ùada–e pait'ee. Jeroboandeepa uchiadait'eerãdepema Tachi Ak'õrepa ma warra aupai pia ak'ùji. 14 Ewari cherude Tachi Ak'õrepa rey awaraa papiit'ee Israel eujãde. Mãgùpa Jeroboán ichi truadeepa jëret'aait'ee. 15 Tachi Ak'õrepa israelitaarã k'achiade baaipiit'ee. Na eujã piadeepa, ichia teeda pãchi chonaarãmaa, ãyaa pëiit'ee Éufrates to waawí parumaa. Mãga ooit'ee awaraa eujãdepemaarã nawe waibùa Astarté k'îrak'a bee oodap'edaa perã aù k'îrapite ùt'aa t'âdait'ee. Mãgapù iru k'îraupijida. 16 Jeroboanpa p'ek'au k'achia oopariida k'aurepa Tachi Ak'õrepa israelitaarã k'achia beerã juade baaipiit'ee. Iru k'aurépata israelitaarã k'achiade baaijidada aji.
17 Ahiapa mãga jarap'eda, Jeroboán wêra wãji ichi temaa. Tirsá p'uurude panak'ãri mãik'aapa ichi tede t'îuit'ee pak'ãri, chi warra jai–idaaji. 18 Israelitaarã jõmaweda wãjida ma warra ùade. Iru–it'ee jêe p'aneejida, ma Ak'õre pedee jarapari, Ahiapa jaradak'a.
19 Awaraa ne–inaa Jeroboanpa ooda mãik'aapa iru at'ãri rey bùde chõoda awaraa eujãdepemaarã ome p'ã bù libro Crónicas apatade. Ma librode israelitaarã reyrãpa oopatap'edaa p'ã bù. 20 Veintidós año wãyaarude Jeroboán israelitaarã rey paji. Piup'eda, chi warra Nadab rey paji.
Judadeepa uchiadap'edaarã eujãde Reboán rey pada
(2 Crónicas 12.1-16)
21 Salomón warra Reboán rey paji Judadeepa uchiadap'edaarã eujãde. Ichi cuarenta y un año iru baji rey pak'ãri. Diecisiete año wãyaarude ichia Judadeepa uchiadap'edaarã eujãdepemaarã ak'ùpachi. Mãga nùde Jerusalén p'uurude bapachi. Ma p'uuru Tachi Ak'õrepa jùrùt'eraji awaraa Israel eujãdepema p'uuru k'ãyaara, irua k'îsia iru bada perã mama bapariit'ee. Reboán nawe t'âjarapachida Noamá. Ma wêra amonita pida paji.
22 Reboán rey bùde ne–inaa k'achia oopachi Tachi Ak'õre k'îrapite. Ichi chonaarãpa ne–inaa k'achia oopatap'edaa k'ãyaara ichia k'achiara oopachi. 23 Ãrapa oodap'edaak'a ichi jua ek'ari p'anadap'edaarãpa pida ijãadak'aa beerã ùt'aa t'âpata te oojida ee nok'ode. Ma awara ee nok'ode mãik'aapa pak'uru ek'ari pak'uru bainâ bùjida maa–e pùrã mãu abaamaa p'e bùjida, mama ùt'aa t'âpataadait'ee ijãadak'aa beerã ak'õre waibùa apatap'edaamaa. 24 Ma awara ma eujãdepema ùmùk'îraarã ma ùt'aa t'âpatamãi p'anapachida chi ùt'aa t'â cherutaarãpa ãchi ãtau nodamerã. Mãgà ne–inaa k'achia ijãadak'aa beerãpa oopata awaraa ne–inaa k'achia oopata ome oopachida Reboán jua ek'ari p'anapatap'edaarãpa. Mãga oopachida ma ne–inaa k'achia oopatap'edaa k'aurépata Tachi Ak'õrepa ma eujãde naaweda p'anapatap'edaarã jërek'ooji mîda.
25 Reboán año joisomaa rey bùde Egipto eujãdepema rey, Sisac chõo cheji Jerusalende. 26 Mãgá chõo jõnùde ma Egiptodepemaarãpa atadachida nêe, awaraa ne–inaa pia ome Tachi Ak'õre tedeepa mãik'aapa rey palaciodeepa. Ne–inaa pia jõmaweda jãri ata wãjida; rey Salomonpa escudo nêedee oopida paara. 27 Ma t'êepai Roboanpa escudo awaraa oopiji ma pari. Mamîda ma escudo broncedee oopiji. Ma escudo bùji ichi palaciodepema puerta jâapataarã jua ek'ari, ãchia pia jâapataadamerã. 28 Rey wãda chaa Tachi Ak'õre tedee ma jâapataarãpa rey escudo auk'a ateepachida. T'êepai waya bùjida chi jâa paraa badamãi.
29 Awaraa ne–inaa Roboanpa ooda Crónicas apata librode p'ã bù, awaraa Judadepema reyrãpa oopatap'edaa ome.