Tachi Ak'õre pedee jaraparipa Jeroboán ùtrùada
13
1 Jeroboanpa mãgá ne–inaa t'ûa bapari paamaa bù misa, Judadeepa uchiadap'edaarã eujãdepema Ak'õre pedee jarapari Betelde pacheji. 2 Iru k'ap'ùa pari Tachi Ak'õrepa nãga jaraji mama bada altarmaa: “Altar, altar, Tachi Ak'õrepa pùmaa nãga jara bù: ‘Daviddeepa uchiait'ee ùmùk'îra warra aba, t'âjarapataadait'ee Josías. Mãgùpa ijãadak'aa beerã ùt'aa t'âpata tedepema p'aareerã, chi nama ne–inaa t'ûa bapari paapataarã peek'ooit'ee mãik'aapa paak'ooit'ee pù ârù. Mãgá eperãarã bùùrù paa jõit'eeda a bù, pù ârù.’ ”3 Ma ewateweda ma Ak'õre pedee jaraparipa ne–inaa ooji ak'ùpiit'ee wãara Tachi Ak'õre pedee baji iru k'ap'ùa pari. Mãgaji: “Nãga jara bù Tachi Ak'õrepa. Na altar ãridariit'ee mãik'aapa aù ârù it'abarre p'ora jîchooit'ee.”
4 Rey Jeroboanpa ûrik'ãri ma pedee k'achia jarada Beteldepema altarmaa, ichi jua ùaji altar bùmãiipa mãik'aapa mãgaji ichi jâapataarãmaa: “¡Chi mãga jarada jita atadapáde!’ aji. Mamîda aweda chi jua ùa bada eratù beeji. P'oyaa mimik'ak'aa paji. 5 Mãùmisa ma altar ãridachi mãik'aapa aù ârù it'abarre p'ora jîchoodachi ma Ak'õre pedee jaraparipa jaradak'a. 6 Mãpai rey Jeroboanpa mãgaji ma Ak'õre pedee jaraparimaa:
—Mù chupùria k'awáaji. Pù Ak'õre Waibùamaa ùt'aa iidipáde aji, mù pari, mù jua arajãa beemerã.
Mãga ooji ma Ak'õre pedee jaraparipa. Mãpai rey jua arajãgaa beeji naawedapemak'a. 7 Ma t'êepai reypa mãgaji ma Ak'õre pedee jaraparimaa:
—Mù ome temaa chepáde aji. Jãma nek'oi mãik'aapa mùa pùmaa ne–inaa pia teeyada aji.
8 Mamîda ma Ak'õre pedee jaraparipa p'anauji:
—Wã–eda aji. Pùa mùmaa pùchi palacio esa–auk'a teeru pùjida, mù pù ome wã–e mãik'aapa nama nek'o–e wa ne–inaa to–e. 9 Tachi Ak'õrepa mùmaa jaraji mãga oonaamerã. Mãgaji: ‘Mama bùde pan k'onáaji, mãik'aapa pania tonáaji. Awaraa ode ãpùtee chepáde’ aji.
10 Mãga jarap'eda, ma Ak'õre pedee jarapari Betel p'uurude o cheda awara ode ãpùtee wãji Tachi Ak'õrepa jaradak'a.
11 Maapai Betel p'uurude Tachi Ak'õre pedee jarapari chonaa chùta bapachi. Mãgà chonaa warrarãpa ûri p'anajida Judadepema Ak'õre pedee jarapari pedeek'ãri Jeroboán ome. Ma jõma nepùrù chejida ãchi ak'õremaa. 12 Mãga ûrik'ãri, ãchi ak'õrepa iidiji:
—¿Chisãgà ode wãjima? aji.
Chi warrarãpa ma Judadepema Ak'õre pedee jarapari wãda o ak'ùpijida ãchi ak'õremaa. 13 Mãpai ma chonaapa chi warrarãmaa mãgaji:
—Mù–it'ee burro atadapáde aji.
Mãga oojida. Mãpai ma Ak'õre pedee jarapari aù ârù bataup'eda, 14 wãji ma Judadepema Ak'õre pedee jarapari t'êe. Unu ataji su–ak'ù bù encina pak'uru ek'ari. Mãpai iidiji:
—¿Pùk'ã aji, ma Ak'õre pedee jarapari Judadeepa cheda?
—Mùda aji.
15 Mãpai ma chonaa chùpa mãgaji:
—Mù temaa chepáde aji, pan k'ode mù ome.
16 Mamîda ma Judadepema Ak'õre pedee jaraparipa p'anauji:
—P'oyaa–eda aji. Pù temaa mù wãik'araa bù. Ma awara nama pan k'oik'araa bù, pania paara toik'araa bù. 17 Tachi Ak'õrepa mùmaa jîp'a nãga jaraji: “Mama pan k'onaapáde aji, mãik'aapa pania tonaapáde aji. Ma awara o awaraade ãpùtee chepáde” aji.
18 Mamîda ma chonaa chùpa edek'a nâbeeji:
—Mù jida Tachi Ak'õre pedee jaraparida aji, pùk'a. Ùt'ariipa Tachi Ak'õrepa ángel pëiji mùmaa. Mãgùpa jaraji mùa pù ateemerã temaa pan k'ode mãik'aapa pania tode.
Ma chonaapa seewa baji. 19 Mamîda ma Judadepema Ak'õre pedee jaraparipa mãga k'awa–e pada perã, wãji iru ome. Mãgá nek'oji mãik'aapa ne–inaa toji ma chonaa temãi. 20 Mesade su–ak'ù p'anùde Tachi Ak'õrepa nãga jarapiji ma chonaa chùmaa: 21 Golpe mãgaji:
—Tachi Ak'õrepa nãga jara bù: “Pùa oo–e pada perã mùa jaradak'a 22 mãik'aapa ma k'ãyaara nama cheda perã nek'oit'ee mãik'aapa ne–inaa toit'ee, pù piuk'ãri, pù k'ap'ùa ùada–e pait'ee pùchi chonaarã ùadap'edaamãi.”
23 Nek'o aupadak'ãri, ma chonaapa chi burro atapiji ma Judadepema Ak'õre pedee jarapari aùde wãmerã. 24 Mãgá wãji. Mamîda ode wãde león ome unup'eda, ma leonpa iru peet'aaji mãik'aapa chi k'ap'ùa piuda atabëiji ma ode. Ma burro, león paara ma k'ap'ùa piuda k'ait'a bainâ p'aneejida. 25 Mãga nùde eperãarã wãyaa chejida. Unujida ma león iru k'ap'ùa piuda k'ait'a. Mapa p'uurude panadak'ãri, nepùrùnajida ma chonaa chùmaa. 26 Mãga ûrik'ãri, ma chonaapa mãgaji: “Mãgà Tachi Ak'õre pedee jaraparipù. Oo–e paji Tachi Ak'õrepa jaradak'a. Mapa Tachi Ak'õrepa leonmaa peepiji. Ak'õrepa ma eperã jõpiji ichia jaradak'a.”
27 Aramata ma chonaapa jaraji chi warrarãmaa ichi–it'ee burro atanadamerã. Mãga oojida. 28 Mãpai ma Ak'õre pedee jarapari chonaa chùta wãji chi apema k'ap'ùa piuda jùrùde. Unu atak'ãri, ma burro león ome at'ãri mama bainâ p'anajida. Leonpa ma eperã k'ap'ùa piuda k'o–e paji. Ma awara ma burro arii bada pee–e paji. 29 Mãpai ma chonaapa ma Judadepema Ak'õre pedee jarapari k'ap'ùa jira atap'eda, bùji chi burro ârù mãik'aapa ateeji ichi p'uurudee chi–ùait'ee mãik'aapa mama ùait'ee. 30 Ùaji ichi ùadait'ee padamãi. Jêeji ma Judadepema Ak'õre pedee jarapari–it'ee mãik'aapa mãgaji: “Aai, mù âpema.”
31 Ùada t'êepai mãgaji chi warrarãmaa:
—Mù jai–idaak'ãri, ùadapáde aji, mãgà Ak'õre mimiapari ik'aawa. 32 Wãara uchiait'eeda aji, irua jaradak'a Beteldepema altarmaa mãik'aapa ijãadak'aa beerã ùt'aa t'âpatamaa Samaria eujãdepema p'uurude p'anù.
33 Mãga jaraji mîda ma Ak'õre pedee jaraparipa, rey Jeroboanpa ichia ne–inaa k'achia oopata oo amaa k'inia–e paji. Ma k'ãyaara waya p'aareerã pariatua bùji ee nok'odepema ijãadak'aa beerã ùt'aa t'âpata tede mimiapataadamerã. 34 Ma k'aurépata Jeroboandeepa uchiadap'edaarãpa auk'a p'ek'au k'achia oopachida mãik'aapa k'iniik'oojida.