Israelitaarãpa ãchi eujã t'oodap'edaa
(2 Crónicas 10.1—11.4)
12
1 Salomón piuda t'êepai chi warra Reboán wãji Siquén p'uurudee israelitaarã mamaa wãdap'edaa perã iru rey papidait'ee. 2 Maapai Nabat warra Jeroboán Egipto eujãde bapachi, rey Salomón waidoopa. Mamîda k'awa atak'ãri Roboán wãda, iru auk'a wãji Siquendee awaraa israelitaarã ome. 3 Iru t'â pëidak'ãri, iru awaraa israelitaarã ome Roboanmaa wãjida mãik'aapa mãgajida:4 —Pù ak'õrepa tai k'achia iru bapachi ichi jua ek'ari. Tai audú mimiapiji. Tai ome pù mãgá ba–e pùrã, mãgara k'ãiwee p'anapataadait'eeda ajida, pù jua ek'ari.
5 Roboanpa p'anauji:
—Wåtù mùa parãpa jaradap'edaade k'îsia bù misa. Ewari õpee parumaa waya chedapáde aji, pedeede.
Wãjida irua jaradak'a. 6 Mãpai rey Roboanpa pedeeji chi ak'õre Salomón ek'ari padap'edaarã ome. Iidiji:
—¿K'ãata k'îsia p'anùma aji, parãpa? ¿Sãgá ma eperãarãmaa p'anauyama? aji.
7 P'anaujida:
—Idiweda pùa na p'uuru pidaarã k'aripa beeru pùrã mãik'aapa ãchimaa pedee pia jararu pùrã, t'ãri o–îa oo k'inia p'anadait'ee pùa jara bùk'a.
8 Mamîda Roboanpa ma ûraa ûriamaa baji. Ooi k'ãyaara ma chonaarãpa ûraadap'edaak'a, iidinaji ichi jua ek'ari p'anadap'edaa k'ûtrãarãmaa; auk'a waridap'edaa ichi ome. 9 Nãga iidiji:
—¿K'ãata k'îsia p'anùma aji, parãpa? ¿Sãgá ma eperãarãmaa p'anauyama? aji. K'inia p'anùda aji, mù t'ãri piara bapariimerã ãchi ome, mù ak'õre bada k'ãyaara.
10 Ma k'ûtrãarã, iru ome auk'a waridap'edaarãpa p'anaujida:
—Nãga p'anauipia bùda ajida, ma iidi p'anùùrã pù t'ãri piara bapariimerã: “Parãpa k'îsia p'anù pùrã mù ak'õrepa parã k'achia iru bapachi ichi jua ek'ari, mãgara mùa parã audupùara mãgá iru bapariit'ee. 11 Irua audú mimiapipachi pùrã parãpa jara p'anùk'a, mãgara mùa iru k'ãyaara audupùara mimiapiit'ee. Wùpipachi pùrã pak'urupa, mãgara mùa wùpiit'eeda ait'ee, soo, chi k'âde hierro iru bùpa.”
12 Ewari õpee parumaa Jeroboán awaraa israelitaarã ome waya chejida Roboán k'îrapite, irua jaradak'a. 13 Mamîda Roboanpa ãchimaa ik'achia pedee jaraji. Ma chonaarãpa ûraadap'edaak'a jara–e paji. 14 Ma k'ãyaara k'ûtrãarãpa ûraadap'edáak'ata jaraji: chi ak'õrepa audú mimiapipachi pùrã, ichia audupùara mimiapiit'ee; chi ak'õrepa wùpachi pùrã pak'urupa, ichia wùpiit'eeda aji, soo, chi k'âde hierro iru bùpa. 15 Roboanpa ûriamaa baji israelitaarãpa jaradap'edaa. Tachi Ak'õrepa iru mãgá k'ùùrù k'isua papiji p'asamerã ichia jaradak'a Nabat warra Jeroboanmaa mãgà Siló p'uurudepema Ak'õre pedee jarapari Ahías ideepa. 16 Israelitaarãpa ûridak'ãri Roboanpa pedee k'achia jarada mãik'aapa k'awaadak'ãri ãchia jaradap'edaa ûriamaa bada, nãga jarajida:
“¡Mãgara taipa David t'â waa ûri k'iniada–e! ¡P'ana k'iniada–e Isaideepa uchiadap'edaarã ome! ¡Israelitaarã, wãdáma tachi temaa! ¡Daviddeepa uchiadapa ichi ëreerã ak'ùyada!” ajida.
Aweda israelitaarã erreujida ãchi te chaa. 17 Judadeepa uchiadap'edaarã eujãde p'anapatap'edaarãpai p'aneejida Reboán jua ek'ari. 18 Ma t'êepai Roboanpa ichi ek'ari beerãdepema aba, Adonirán pëiji ma israelitaarãmaa mimiapide. Mamîda mãùrãpa iru mãupa bat'a peet'aajida. Mãga ûrik'ãri, Reboán chi carreta caballopa jidiupatade isapai bataup'eda, jirabodoji Jerusalendee. 19 Mãgá israelitaarãpa ak'ùpijida Daviddeepa uchiada jua ek'ari p'anadaamaa p'anajida. At'ãri mãga k'îsia p'anù.
20 Israelitaarãpa k'awaadak'ãri Jeroboán ãchi t'ãide bapari, t'â pëijida. Ãchi k'îrapite panak'ãri, ãchi rey papijida. Mãgá apida israelitaarã p'aneeda–e paji Daviddeepa uchiada jua ek'ari. Aba Judadeepa uchiadap'edaarã aupai mãga p'aneejida.
21 Israelitaarãpa mãga oo p'anùde Reboán Jerusalende panaji. Aramata soldaorã ciento ochenta mil p'e ataji. Jùrùt'eraji chi chõo k'awaara beerã Judadeepa uchiadap'edaarãdepema mãik'aapa Benjamindeepa uchiadap'edaarãdepema. Mãgùùrã jùrùt'eraji israelitaarã ome chõonadamerã mãik'aapa ãra waya bùdamerã ichi jua ek'ari. 22 Mamîda Tachi Ak'õrepa nãga jaraji eperã ichide ijãa bù Semaiamaa: 23 “Nãga jaráji Salomón warra, rey Roboanmaa, Judadeepa uchiadap'edaarã mãik'aapa Benjamindeepa uchiadap'edaarã iru jua ek'ari p'anùùrãmaa, awaraa eperãarã ãchi eere p'anùùrãmaa paara: 24 ‘Tachi Ak'õrepa nãga jara bù: Chõonaadapáde a bù, pãchi auk'aarã, israelitaarã ome. Ma k'ãyaara wãdapáde a bù, pãchi temaa mùa mãga k'inia bairã.” Mãga ûridak'ãri, ãpùtee wãjida ãchi temaa, Tachi Ak'õrepa jaradak'a.
Jeroboán Israel eujã norte eerepemaarã rey pada
25 Jeroboán israelitaarã rey bùde waya Siquén p'uuru chiwidi oopiji. Ma p'uuru Efraindeepa uchiadap'edaarã eujãde baji; ee jêra bùmãi. Iru mama bapachi. Maap'eda Penuel p'uuru ichiaba chiwidi oopiji. 26 Maapai ichia k'îsiaji: “Daviddeepa uchiadapa ichi trua waya oopii naaweda badak'a. 27 Nãpemaarã Jerusalendee wãruta pùrã ne–animalaarã paapide Tachi Ak'õre tede, Judadeepa uchiadap'edaarã rey Reboán pia ak'ù p'aneedai mãik'aapa ichi eere waya t'îu k'inia p'aneedai. Mãgara mù jùrùdai peedait'ee.”
28 Mãga k'îsiap'eda mãik'aapa pedeep'eda ichi ak'ùpataarã ome, rey Jeroboanpa p'ak'a chak'e k'îrak'a bù omé nêedee ooji. Mãpai nãga jaraji ichi jua ek'ari p'anapatap'edaarãmaa: “Israelitaarã, parã audú wãdooda Jerusalendee ùt'aa t'âde. Nama iru bùda aji, ak'õre waibùarã; parã chonaarã Egipto eujãdeepa uchiapidap'edaarã.” 29 Mãga jarap'eda, ma p'ak'a chak'e k'îrak'a bù aba bùji Betel p'uurude; chi apema bùji Dan p'uurude. 30 Mãgá Jeroboán k'aurepa israelitaarã k'achiade baaijida. P'ek'au k'achia oo p'aneejida Tachi Ak'õre k'îrapite Beteldee, Dandee wãdak'ãri ma p'ak'a k'îrak'a bù k'îrapite ùt'aa t'âdait'ee. 31 Ma awara ee nok'ode Jeroboanpa ùt'aa t'âpata te oopiji mãik'aapa Levideepa uchiadap'edaarã–eerã bùji aùde mimiapataadamerã. 32 Ichiaba Jeroboanpa fiesta ewate bùji ùadamerã atane ocho, ewari quince, Judadeepa uchiadap'edaarã eujãde oopatap'edaak'a. Mamîda made Jeroboanpa ne–animalaarã peep'eda, paaji ichi juadoopa. Mãga ooji altar Betel p'uurude badade. Ma ne–animalaarã peep'eda, paaji ma p'ak'a chak'e k'îrak'a bù ichia ooda–it'ee. Ma awara ichiata eperãarã jùrùji mama Betelde p'aareerã mimia oopataadamerã. 33 Mãgá atane ocho, ewari quince altar Betel p'uurude badade Jeroboanpa ne–animalaarã peep'eda, paaji mãik'aapa ne–inaa t'ûa bapari paaji ichi juadoopa. Ichi k'inia ma fiesta bùji año chaa israelitaarãpa ùadamerã.