Salomón chonaa pak'ãri, Tachi Ak'õrede ijãa amaada
11
1 Salomonpa wêraarã k'inia bapachi. Faraón k'au awara, awaraa eujãdepema wêraarã chok'ara ataji ichi wêraarã papiit'ee. Ataji Moabdepema wêraarã, Amondepema, Edomdepema, Sidondepema, hititaarã, mãùrãdepema wêraarã paara. 2 Pia jarait'eera, ataji wêraarã Tachi Ak'õrepa jarada israelitaarãpa atanaadamerã. Chonaarãweda Tachi Ak'õrepa jaraji israelitaarã miak'ãinaadamerã ma p'uurudepemaarã ome, ãchia ijãapidai perã ãchi ak'õre waibùa apatap'edaade. Tachi Ak'õrepa mãga jaraji mîda, Salomonpa mãgee wêraarã k'inia bap'eda, miak'ãiji ãchi ome. 3 Miak'ãiji setecientos wêraarã reyrãdeepa uchiadap'edaarã ome. Ma awara wêra k'ãipariirã trescientos ataji. Ma wêraarãpa Salomonmaa ijãapijida ãchi ak'õre waibùa apatap'edaade. 4 Mãga oo p'anùùpa Salomón chonaa pak'ãri, Tachi Ak'õrede waa ijãa–e paji. Ma k'ãyaara ijãapachi chi wêraarã ak'õre waibùa apatap'edaade. Wãara Tachi Ak'õrede ijãa–e paji chi ak'õre Davidpa oodak'a. 5 Salomonpa ùt'aa t'âpachi sidoniorã nawe waibùa Astartemaa. Ichiaba ùt'aa t'âpachi amonitaarã ne–inaa juapa oodamaa, aù k'îrapite ùt'aa t'âpatap'edaa, Milcón. 6 Mãga oopachi perã mãik'aapa Tachi Ak'õrede ijãa–e pada perã chi ak'õre ijãadak'a, Tachi Ak'õrepa Salomón pia–ee ak'ùpachi.7 Maapai Jerusalén oriente eere bada eede Salomonpa te oopiji moabitaarã ak'õre waibùa Quemo–it'ee mãik'aapa amonitaarã ak'õre waibùa Moloc–it'ee. Tachi Ak'õrepa mãgee ne–inaa ak'õre waibùa apatap'edaa k'îra unuamaa iru bapachi. 8 Awaraa eujãdepema wêraarã ak'õre waibùa apatap'edaa–it'ee ichiaba ùt'aa t'âpata te oopiji mama ne–inaa t'ûa bapari paadamerã mãik'aapa ne–animalaarã peedap'eda, paadamerã. 9 Maperã Tachi Ak'õre k'îraudachi Salomón ome. Salomón irude ijãa amaa beeji unupida omé unupiji mîda irumaa. 10 Tachi Ak'õrepa jaraji mîda israelitaarãpa awaraa ak'õre waibùa apatap'edaamaa ùt'aa t'ânaadamerã, ichi k'inia Salomonpa mãga ooji. 11 Maperã Tachi Ak'õrepa irumaa nãga jaraji: “Pùa mãga oo bairã, oo–e mùa jaradak'a mãik'aapa mù ley p'ãdade jara bùk'a. Maperã pù mimiapari rey papiit'ee pù k'ãyaara. 12 Mãga ooit'ee mîda, mùa pù ak'õre David k'inia iru bada k'aurepa, mãga oo–e pait'ee pù at'ãri chok'ai bù misa. Ma mimiaparipa pù warra juadépata pù trua jãri atait'ee. 13 Pù ak'õre k'aurepa ëreerã aba bëiit'ee pù warra jua ek'ari, Jerusalén, mùa jùrùt'erada p'uuru ome.”
14 Maap'eda Tachi Ak'õrepa Edom eujãdepema Hadad k'îraupiji Salomón ome. 15 Aù naaweda Davidpa Edom pidaarã p'oyaap'eda, chi soldaorã poro waibùa, Joab ãpùtee wãk'ãri piudap'edaarã ùade, t'ãri k'achiapa Edomdepema ùmùk'îraarã peek'ooji. 16 Atane seis wãyaaru misa, israelitaarãpa ma Edomdepema ùmùk'îraarã peek'oo wãjida. 17 Mamîda ma edomita pida Hadad at'ãri warra pada perã, mirunaji ûk'uru ichi auk'aarã, chi ak'õre jua ek'ari p'anadap'edaarã ome. 18 Madián eujãdeepa uchiadap'eda, panajida Parande. Mama jùrùjida ùmùk'îraarã ãchi eere t'îudamerã mãik'aapa wãjida Egiptodee. Egiptode panadak'ãri, rey Faraonmaa wãjida. Mãgùpa ãchimaa te, chik'o, eujã paara teeji.
19 Mãgá Hadad pia bapachi Faraón ome. Faraonpa chi wêra Tapenés âpewêra teeji Hadadmaa aù ome miak'ãimerã. 20 Maap'eda ma wêrapa warra t'oji. T'â bùjida Guenubat. Reina Tapenepa ma warra wariji Faraón tede ichi warrarã ome. 21 Mamîda Hadadpa k'awa atak'ãri rey David piuda, chi soldaorã poro waibùa Joab piuda ichiaba, mãgaji Faraonmaa:
—Mù wãpipáde aji, mùchi eujãdee.
22 Faraonpa p'anauji:
—¿Sãap'eda wã k'inia bùma? aji. ¿Mù ome nama ne–inaa falta bùma? aji.
Hadadpa mãgaji:
—Mãga–eda aji. Jîp'a mù wã k'inia bù. Wãpipáde aji.
23 Hadad awara Tachi Ak'õrepa eperã t'âpatap'edaa Rezón ichiaba k'îraupiji Salomón ome. Ma Rezón Eliadá warra paji. Eliadá Sobadepema rey Hadad Ezer mimiapari paji. Mamîda jirabodoji chipari juadeepa. 24 Ma t'êepai k'õp'ãyo nechù–idaa beerã ome t'îup'eda, made nipapachi. Mãga nùde David eere p'anapatap'edaarãpa ãchi ûk'uru peejida. Mamîda Rezón jirabodoji mãik'aapa Damasco p'uurude panap'eda, mãdepemaarã rey beeji. 25 Mãgá Rezón Siria eujãde rey beeji. Maap'eda Salomón rey bùde Rezonpa israelitaarã ome chõo jùrùpachi. Maperã irua, Hadad ome israelitaarã k'îra unuamaa iru p'aneejida.
26 Maapai Nabat warra Jeroboán ichiaba pia–ee beeji rey Salomón ome. Jeroboán Efraindeepa uchiada paji; Seredá p'uurudepema. Chi nawe p'êtrãa paji; t'âjarapachida Zerúa. Mãga nùde Jeroboán rey Salomón ak'ùpari paji. 27 Mamîda nãga perã pia–ee beeji Salomón ome. Salomonpa terraplén oopi bak'ãri mãik'aapa muralla Jerusalén t'ùak'au bù aupa wãk'ãri, 28 Jeroboán chi mimiapari piara unuji. Mapa bùji Josedeepa uchiadap'edaarã iru jua ek'ari, ãra ak'ù bamerã ma mimia oo p'anù misa.
29 Mãga bùde ewari aba Jeroboán Jerusalendeepa uchiaji. Ode wãde ununaji Tachi Ak'õre pedee jarapari Ahías ome. Mãgà Siló p'uurudepema paji. P'aru teesoo chiwidi jâ baji. Awaraa eperãarã wê–e paji mãgà ode. 30 Unudak'ãri, Ahiapa chi p'aru chiwidi êrat'aap'eda, jêt'aaji pite doce uchiamerã 31 mãik'aapa Jeroboanmaa mãgaji: “Pù–it'ee pite diez atapáde aji, israelitaarã Ak'õre Waibùapa pùmaa nãga jara bairã: ‘Mùa Salomón juadeepa Israeldeepa uchiadap'edaarã ëreerã diez pùmaa jãri atapiit'ee. 32 Salomón ëreerã abapai ome beeit'ee mùa p'uuru jùrùt'erada, Jerusalén ome. Ma ëreerã atabëiit'ee Salomón jua ek'ari chi ak'õre David k'aurepa. 33 Salomón mùde ijãa amaaji ùt'aa t'âit'ee sidoniorã nawe waibùa Astartemaa, moabitaarã ak'õre waibùa Quemomaa, amonitaarã ak'õre waibùa Molocmaa. Maperã mùa iru waa pia ak'ù–e. Irua oo k'inia–e bù mù ley p'ãdade jara bùk'a chi ak'õre Davidpa oodak'a. 34 Iru mãga bù mîda, jõmaweda israelitaarã iru jua ek'ari p'anù awaraarãmaa jãri atapi–e pait'ee. Chok'ai bù misa, Salomón at'ãri rey pait'ee. Mùa mãgá ichiak'au bùit'ee mù mimiapari pada, David k'aurepa. Mùa David jùrùt'erap'eda, irua oopachi mùa jaradak'a mãik'aapa mù ley p'ãdade jara bùk'a. 35 Mamîda chi warra Salomonta mãga–e. Mapa ëreerã diez p'anapiit'ee pù eere, pù jua ek'ari p'anapataadamerã. 36 Ëreerã abapai atabëiit'ee David warra jua ek'ari, chi ak'õre t'â k'îra atuanaadamerã mùa jùrùt'erada p'uuru, Jerusalende. Ma p'uuru jùrùt'eraji israelitaarãpa mù t'â k'îra atuanaadamerã. 37 Mùa pù israelitaarã rey papiit'ee. Maapai pùchia oo k'iniata ooi. 38 Mãgaweda mùa jara bùk'a ooru pùrã mãik'aapa mù ley p'ãdade jara bùk'a ooru pùrã mãik'aapa mù k'îrapite k'îra jîp'a niparu pùrã mù mimiapari pada Davidpa oodak'a, mãgara mù bapariit'ee pù ome. Pù trua pia ak'ù bapariit'ee mãik'aapa israelitaarã pia p'anapiit'ee pù jua ek'ari. 39 Mamîda Daviddeepa uchiadait'eerã pia–ee ak'ù bapariit'eeda aji, mù k'îrau wêparu misa.’ ”
40 Salomonpa k'awa atak'ãri Tachi Ak'õrepa ichi pedee jarapari ideepa mãga jarada Jeroboanmaa, jùrùji sãga Jeroboán peepii. Mamîda Jeroboán mirudachi Egipto eujãde. Maapai Sisac Egiptodepema Faraón paji. Jeroboán Egipto eujãde beeji Salomón piurumaa.
Salomón piuda
(2 Crónicas 9.29-31)