Sabadepema reina rey Salomonmaa p'asiade cheda
(2 Crónicas 9.1-12)
10
1 Sabá eujãdepema reinapa ûrik'ãri chok'araarãpa Salomón t'o iru p'anù mãik'aapa Tachi Ak'õrepa iru pia ak'ù bapari, k'awa k'inia baji wãara wa seewa. Mapa wãji Jerusalendee Salomón k'awade. Iidida chaaree ateeji iidiit'ee Salomonmaa. 2 Ichi Jerusalende pacheji net'aa chok'ara ome. Camelloorã ârù k'era, nêe, mãu pi–ia aneejida. Salomón k'îrapite pak'ãri, ichia k'îsia iru bada iidiit'ee iidimaa beeji. 3 Salomonpa ma jõmaweda pia p'anauji. 4 Sabadepema reinapa mãga ûrik'ãri, k'awaaji wãara Salomonta jõmaarã k'ãyaara k'îsia k'awaara baji. Ma awara Salomón te pi–ia unuji. 5 Ak'ùji chik'ora mesade bù, Salomón ek'ari beerã su–ak'ù beepari pi–ia p'anù, chi mimiapataarã p'aru pi–ia jâ p'anù, chi vino topipataarã mãik'aapa irua ne–animalaarã Tachi Ak'õre–it'ee paa jõpida. Ma jõma ak'ùp'eda, p'era pùk'a beeji. 6 Mapa mãgaji Salomonmaa: “Mùchi eujãde bùde mùmaa nepùrùpachida pùa ooda mãik'aapa pù k'îsia k'awaara bù. Ârá k'awa bù wãarata nepùrùdap'edaa. 7 Ijãa bù mùchi taupa na jõma unu bairã. Mùmaa esa–auk'apai nepùrùda–e paji. Pù audupùara k'îsia k'awaa bapari ãrapa nepùrùdap'edaa k'ãyaara mãik'aapa net'aara waapùara iru bù. 8 ¡Pù jua ek'ari p'anùùrã o–îa p'anadaipia bù, pùchi mimiapataarã paara, pù k'îsia k'awaa pedee ichita ûripata perã! 9 ¡Wãara, pù Ak'õre Waibùa t'ãri pia bapari pù ome, pù pia ak'ùpari perã mãik'aapa pù israelitaarã rey nãgá papida perã! ¡Israelitaarã Ak'õre Waibùapa ãchi audú k'inia iru bapari perã, ãchi rey pia jua ek'ari bùjida!” aji.10 Mãga jarap'eda, ma Sabadepema reinapa Salomonmaa teeji mil, novecientos sesenta kilo nêe mãik'aapa k'era, mãu pi–ia. Aù naaweda Israel eujãde k'era waibùara wê–e paji ma k'era Sabadepema reinapa teeda k'ãyaara rey Salomonmaa.
11 Ma awara rey Hirampa barco pëida Ofirdee ãpùtee chedak'ãri, nêe ichiaba aneejida, sándalo pak'uru chok'ara ome, mãu pi–ia ome. 12 Ma sándalo pak'urudee Salomonpa baranda oopiji bùdamerã Tachi Ak'õre tede, ichi tede paara. Ichiaba madee oopiji arpa, salterio ome, aùde música chaadamerã. Aù naaweda, t'êepai paara, Israel eujãde sándalo pak'uru chok'araara unuda–e paji. 13 Salomonpa ichiaba net'aa teeji Sabadepema reinamaa; jõmaweda irua iididata, awaraa net'aa ichia tee k'inia bada ome. Salomonpa ma reinamaa net'aara teeji reinapa irumaa teeda k'ãyaara. Maap'eda ma reina ãpùtee wãji ichi eujãdee, ichi ome nipapatap'edaarã ome.
Salomonpa net'aara iru bada
(2 Crónicas 9.13-24)
14 Año chaa Salomonpa veintidós mil kilo nêe ataji, 15 juasia–ee impuesto ichia atada netopataarã juak'aawa; Arabiadepema reyrã juak'aawa; awaraa eujã ak'ùpataarã juak'aawa. 16 Mãgá nêe waibùa atap'eda, Salomonpa oopiji doscientos escudo tawara bee nêe sîdadee; nêe kilo seis ma chaachaa. 17 Ichiaba trescientos escudo k'aipee oopiji mãgee nêedee; kilo aba ap'eda, esa–auk'a waa ma chaachaa. Mãgà escudo bùji ichi te “Líbano pak'uru–idaa jêra bù” apatap'edaade.
18 Ma awara rey su–ak'ù beepari waibùa oopiji marfildee, nêepa p'êeda. 19 Ma rey su–ak'ù beeparimaa pait'ee seis escalón oojida. Ma escalón k'â chaachaa león k'îrak'a bù ak'ù nâbù oojida. Ma su–ak'ù beepari ãpùteik'a eere p'ùtrùa baji. 20 Ma su–ak'ù beepari juaraare, juabi eere jua âipari oojida mãik'aapa mãgà chaachaa ik'aawa león k'îrak'a bù ak'ù nâbù ichiaba oojida. Awaraa rey apidaapa rey su–ak'ù beepari pi–iara iru p'anada–e paji rey Salomonpa iru bada k'ãyaara. 21 Ma awara Salomonpa ichi copa, p'arat'u paara jõmaweda oopiji nêedee, bùit'ee ma “Líbano pak'uru–idaa jêra bù” tede. Ma tede net'aa apida p'arat'adee ooda–e paji, mãgaweda p'arat'a âpùa–e pada perã. 22 Año õpee chaa Tarsodepema barco Salomonpa pëida pajida rey Hirampa barco pëida ome. Rey Salomonmaa aneepachida nêe, p'arat'a, marfil, chûa, pavo real paara ichi–it'ee iru bamerã.
23 Na p'ek'au eujãde awaraa rey net'aara, k'îsia k'awaara wê–e paji Salomón k'ãyaara. 24 Jõmaarãpa Salomón unu k'inia p'anapachida mãik'aapa ûri k'inia p'anapachida irua pedee k'îsia k'awaa jarapida Tachi Ak'õrepa. 25 Año chaa eperãarãpa Salomonmaa regalo ateepachida: ne–inaa p'arat'adee ooda, nêedee ooda; p'aru pi–ia; arma; ne–inaa t'ûa bapari; caballoorã, mulaarã ome.
Salomonpa carreta caballoorã ome netopariida
(2 Crónicas 1.14-17; 9.25-28)
26 Salomón rey bùde p'e ata wãpachi carreta caballopa jidiupata mãik'aapa carreta p'erapataarã. Ma carreta mil cuatrocientos iru baji, caballoorã doce mil ome. Ûk'uru pëiji ma carreta ùapata tedee, p'uuru oopidade ma–it'ee. Ûk'uru aneepiji iru ome p'anadamerã Jerusalén p'uurude. 27 Jerusalén p'uurude Salomonpa audú p'arat'a iru baji. Mãu chok'ara badak'a ma eujãde, mãga pùk'a p'arat'a waibùa paraaji. Cedro pak'uru waibùa ichiaba paraaji. Cho–k'ara paraaji higuera k'arra cho–k'ara paraak'a eujã jewedaade. 28 Salomonpa ichi ek'ari beerãmaa caballo neto atapiji aneedamerã Egiptodeepa mãik'aapa Ciliciadeepa, chi caballoorã rey–it'ee netopataarãpa mama netopachida perã. 29 Egiptodepema carreta aba pari seiscientos p'arat'a tau p'arat'adee ooda p'aajida. Jõdee caballo aba pari ciento cincuenta p'arat'a tau p'aajida. Maapai hititaarã reyrãpa mãik'aapa siriorã reyrãpa carreta caballo ome neto atapachida rey Salomón juak'aawa.