Tachi Ak'õrepa Salomonmaa jarada
(2 Crónicas 7.11-22)
9
1 Salomonpa ichia k'îsia badak'a Tachi Ak'õre te, ichi te ome oo aupap'eda, 2 Tachi Ak'õrepa irumaa waya unupiji, aù naaweda Gabaonde unupidak'a. 3 Mãgaji: “Mùa pù ùt'aa t'âda ûriji. Mùa na te awara bùji aùde bapariit'ee. Na te pia ak'ù bapariit'ee mãik'aapa ma k'aurepa parã k'irãpait'ee.4 ’T'ãripa pù mùde ijãaru pùrã pù ak'õre David ijãadak'a mãik'aapa mù leyde jara bùk'a ooru pùrã irua oodak'a, 5 mãgara pù, pùdeepa uchiadait'eerã ome ichita rey padait'ee Israelde. Mùa pù ak'õre Davidmaa mãga jaraji mãik'aapa ârá pùmaa mãga jara bù. Pùdeepa uchiadait'eerã ichita rey padait'ee Israelde.
6 ’Mamîda pù maa–e pùrã pùdeepa uchiadait'eerã mùde ijãa amaadaruta pùrã mãik'aapa oo amaadaruta pùrã mù leyde jara bùk'a awaraa ak'õre waibùa apatade ijãadait'ee, 7 mãgara mùa israelitaarã t'ùmà pëiit'ee ãra eujãdeepa mãik'aapa na te atabaibëiit'ee, mù–it'ee awara bùji mîda. Mãpai jõmaarãpa israelitaarã oo iru p'anadait'ee. 8 Mãga p'asaru pùrã, na te t'eeit'ee; na te badamãi mãu pëidapai beeit'ee. Eperãarãpa mãga unudak'ãri, ak'ùtrua para beeit'ee mãik'aapa iidi para beeit'ee: “¿Sãap'eda Tachi Ak'õrepa ichi p'uuru ichi te paara k'achia oojima?” adait'ee. 9 Mãga iididak'ãri, awaraarãpa p'anaudait'ee: “Tachi Ak'õrepa mãga ooji irude ijãa amaa p'aneedap'edaa perã, irua parã chonaarã Egipto eujãdeepa uchiapiji mîda. Ichiaba mãga oojida, adait'ee, ãrapa awaraa ak'õre waibùa apata jùrùdap'edaa perã aù k'îrapite ùt'aa t'âdait'ee. Maperã Tachi Ak'õrepa ãra k'achia oojida” adait'ee.
Awaraa ne–inaa Salomonpa ooda
(2 Crónicas 8.1-18)
10 Veinte año wãyaarude Salomonpa Tachi Ak'õre te, ichi te ome oomaa baji. 11 Mãga oo bùde Tiro p'uurudepema rey Hirampa cedro pak'uru, pino pak'uru ome pëipachi nêe waibùa ome, aùdee ma te oodamerã. Ma pari rey Salomonpa bùji veinte p'uuru, Galilea eujãde p'anadap'edaa rey Hiram jua ek'ari. 12 Mamîda Hiram wãk'ãri ma p'uuru ak'ùde, ma p'uuru pia–ee unuji. Maperã Salomonmaa nãga jara pëiji: 13 “Achà, pùa p'uuru teeda mùmaa k'achia pùk'a p'anùda” aji. Hirampa ma p'uuru p'anadap'edaa eujã t'â bùji Cabul, jara k'inia bù ‘algo–eeta’. At'ãri mãga t'âjarapata. 14 Hirampa mãga jaraji aù naaweda Salomonmaa nêe waibùa pëida perã; nêe tres mil novecientos kilo.
15 Rey Salomonpa mimiapataarã chok'ara p'e atapiji oodamerã Tachi Ak'õre te, ichi te, chi terraza ome, muralla Jerusalén p'uuru t'ùak'au bù, nãgà p'uuru ome: Jazor, Meguido, Guézer. Nãgá ma mimiapataarã ataji. 16 Aù naaweda Egiptodepema rey Faraonpa chõo cheji Guézer p'uurude. Ma p'uuru pidaarã p'oyaap'eda, ma p'uuru paak'ooji mãik'aapa cananeorã aùde p'anapatap'edaa peepik'ooji. Maap'eda ma p'uuru teeji chi k'aumaa, mãgà miak'ãi bada Salomón ome. 17 T'êepai Salomonpa ma Guézer p'uuru chiwidi oopiji. Ma awara Bet Jorón p'uuru basí bù, 18 Balat p'uuru, Tadmor p'uuru ome oopiji eujã pania wêe bùde Judá eujãde. 19 Ichiaba p'uuru chok'ara oopiji aùde net'a tau ùadamerã, carreta caballo jidiupata ùapata te ome, caballoorã ùapata te paara. Irua oopi k'iniata oopiji Jerusalende, Líbano eujãde mãik'aapa jõma ichi jua ek'ari bada eujãde. 20 Ma eujã naawedapema p'anapatap'edaarã israelitaarã–e paji. Nãgà p'uuru pidaarã paji: amorreorã, hititaarã, ferezeorã, heveorã, jebuseorã. 21 Pia jarait'eera, israelitaarãpa ma eujã jãri atadap'eda, mãgà p'uuru pidaarãdeepa uchiadap'edaarã ma eujãde p'aneedap'edaarãmaa Salomonpa mimiapiji esclavoorãk'a. At'ãri mãga p'anù. 22 Mamîda Salomonpa israelitaarã apida mimiapi–e paji esclavoorãk'a. Ma k'ãyaara israelitaarã nãgà mimiade bùji: soldaorã, mimiapataarã ak'ùpataarã mãik'aapa carretade wãpatap'edaarã poro waibùarã. 23 Ma te, p'uuru oodap'edaarã mimia ak'ùdamerã Salomonpa quinientos cincuenta poro waibùarã bùji.
24 Salomonpa te oopida Faraón k'au–it'ee aupadak'ãri, Faraón k'au aneepiji David p'uurudeepa ichi palaciodee. Ma te ãuk'idaa terraza auk'a oopiji.
25 Tachi Ak'õre te oo p'anùde año abaade Salomonpa paada õpee ne–animalaarã Tachi Ak'õre–it'ee paa jõpiji iru tedepema altarde. Ichiaba awaraa ne–animalaarã paaji ak'ùpiit'ee ichi t'ãri auk'a bù k'inia bù Tachi Ak'õre ome. Mama bùde ichiaba ne–inaa t'ûa bapari paaji Tachi Ak'õre–it'ee. Mãga ooji ak'ùpiit'ee israelitaarãpa ãchi t'ãri auk'a bù k'inia p'anù Tachi Ak'õre ome.
26 Ichiaba rey Salomonpa barco oopiji. Ma mimia oopiji Ezión Gueberde, Elat k'ait'a, p'usa Mar Rojo apata ide, Edom eujãde bù. 27 Ma barcode mimiapataadamerã Tirodepema rey Hirampa pëiji barco p'era k'awapataarã auk'a mimiadamerã Salomonpa bùdaarã ome. 28 Barcode wãjida Ofirdee. Mamaa atanajida perá catorce mil kilo nêe rey Salomon–it'ee.