Rey Salomonpa Tachi Ak'õre baaltek'a bù ateepida iru temaa
(2 Crónicas 5.2-14)
8
1 Tachi Ak'õre te oo aupadak'ãri, Salomonpa t'â pëiji israelitaarã poro waibùarã, ëreerã chaadepema, te pidaarã chaadepema, chedamerã ichi k'îrapite Jerusalende. K'inia baji ãrapa k'aripadamerã Tachi Ak'õre baaltek'a bù aneedak'ãri David p'uuru Siondeepa Tachi Ak'õre temaa. 2 Etanim atane sietedepema fiesta ewate israelitaarã cheepurujida k'îrachuudait'ee Salomón ome Tachi Ak'õre baaltek'a bù badamãi. 3 Jõmaweda israelitaarã poro waibùarã pachedak'ãri, p'aareerãpa ma baaltek'a bù atajida. 4 P'aareerãpa mãik'aapa awaraa Levideepa uchiadap'edaarãpa Tachi Ak'õre ome unupata te ne–edee ooda ma baaltek'a bù ome ateejida, ma tedepema net'aa paara. 5 Tachi Ak'õre tede pachedak'ãri, rey Salomonpa mãik'aapa iru ome p'anadap'edaarãpa ne–animalaarã peejida paadait'ee ma baaltek'a bù k'îrapite te taawa bada altar chomade. Ovejaarã, p'ak'a ùmùk'îraarã cho–k'ara peejida Tachi Ak'õre–it'ee. P'oyaa juasiada–e paji audú chok'ara pada perã. 6 Ma t'êepai p'aareerãpa Tachi Ak'õre baaltek'a bù teedaa ateejida bùdait'ee edupùara bù cuartode, ma ùt'aripemaarã isia paraa k'îrak'a bee isia t'õbai bee ek'ari. 7 Mãgá ma ùt'aripemaarã isia paraa k'îrak'a bee isia wãk'ajida Tachi Ak'õre baaltek'a bù, chi pak'uru teesoo aù bide t'ù bùdap'edaa paara. 8 Ma pak'uru Tachi Ak'õre baaltek'a bù bide t'ù bùdap'edaa ãyaa ateedait'ee audú teesoo p'anadap'edaa perã, chi apema cuarto awara bùda Tachi Ak'õre net'aa–it'ee, ma cuartodeepa unujida. Mamîda ma cuarto taawaik'a eereepa p'oyaa unudak'aa paji. Mãga bù at'ãri. 9 Tachi Ak'õre baaltek'a bùde ùa baji Tachi Ak'õre ley Moisemaa mãu omeede p'ãpida. Israelitaarã Egipto eujãdeepa uchiadap'eda, Horeb eede p'anadak'ãri, Moisepa ma mãu p'ãda ome ma baaltek'a bùde ùa bùji israelitaarãpa k'irãpadamerã Ak'õre Waibùapa pacto ooda ãra ome.10 Ma p'aareerãpa Tachi Ak'õre baaltek'a bù edupùara bù cuartode bùdap'eda, ma cuarto awara bùda Tachi Ak'õre net'aa–it'ee, madeepa uchia p'anùde, jâararapa Tachi Ak'õre te ipurudachi. 11 Mãga beek'ãri, ma p'aareerãpa p'oyaa ooda–e paji ãchia oopatap'edaak'a Tachi Ak'õre tede, Tachi Ak'õre k'îra wãree âdaa p'oyaa chooda–e pada perã.
Salomonpa Tachi Ak'õre te awara bùda
(2 Crónicas 6.1—7.10)
12 Mãpai Salomonpa mãgaji:
“Tachi Waibùa, pùa jaraji pù jâarara t'ãmaa bùde bapari. 13 Mamîda pù–it'ee mùa te pi–ia ooji aùde ichita bapariimerã.”
14 T'êepai rey ak'ùnâ beeji israelitaarã bainâ p'anadap'edaa k'îrapite mãik'aapa ãramaa na pedee pia jaraji:
15 —Wãara Tachi Waibùa, israelitaarã Ak'õre Waibùa, t'ãri pia bapari tachi ome, irua ooda perã ichia jaradak'a mù ak'õre Davidmaa. Nãga jaraji: 16 “Mùa mù eperãarã, israelitaarã uchiapidak'ãriipa Egipto eujãdeepa, mùa jùrùk'aa paji bapariit'ee ëreerã apida eujãdepema p'uurude. Ma awara iidik'aa paji apidaapa mù–it'ee te oomerã. Mamîda Davidta jùrùt'erajida aji, mù p'uuru ak'ù bapariimerã.” 17 Ichiaba Salomonpa mãgaji:
—Mù ak'õre Davidpa audú te oo k'inia baji israelitaarã Ak'õre Waibùa–it'ee. 18 Mamîda Tachi Waibùapa mãgaji irumaa: “Pia bùda aji, pùa mù–it'ee te oo k'inia bairã. 19 Mamîda pùata ma te oo–e pait'ee. Pùdeepa uchiaru warrápata mù–it'ee te ooit'eeda” aji.
20 Ichiaba Salomonpa mãgaji:
—Unu p'anùda aji, Tachi Ak'õrepa jaradak'a uchiaji. Mù rey papiji mù ak'õre David pari. Ârá mù rey su–ak'ù beeparide su–ak'ù bapari mãik'aapa mùata te oopiji israelitaarã Ak'õre Waibùa–it'ee. 21 Ma awara ma te jãde mùa cuarto awara bùji Tachi Ak'õre baaltek'a bù–it'ee iru ley ome, tachi chonaarãpa iru p'anapatap'edaa, Egiptodeepa uchiadap'edaadeepa.”
22 Mãga jarap'eda, jõmaarã israelitaarã taide Salomón ak'ùnâ banaji Tachi Ak'õre altar choma bù k'îrapite. Jua ùt'aa ùap'eda, 23 nãga ùt'aa t'âji: “Tachi Waibùa, israelitaarã Ak'õre Waibùa, awaraa Ak'õre Waibùa pùk'a wê–e ùt'ari, na eujãde paara. Pùa oopari pùa jara bùk'a mãik'aapa t'ãri pia bapari pù leyde jara bùk'a t'ãripa oo k'inia p'anapataarã ome. 24 Pùa ooji pù mimiapari; mù ak'õre Davidmaa jaradak'a mãik'aapa mùmaa na te oopiji. 25 Ârá Tachi Waibùa, israelitaarã Ak'õre Waibùa, mùa chupùria iidi bù ne–inaa awara oomerã pù mimiapari, mù ak'õre Davidmaa jaradak'a. K'inia bù irudeepa uchiadait'eerã ichita israelitaarã rey papimerã. Mãga ooipù israelitaarã pùa k'inia bùk'a p'anaruta pùrã mù ak'õre badak'a. 26 Israelitaarã Ak'õre Waibùa, mùa mãga k'inia bùda aji, pùa oomerã, pù mimiapari mù ak'õremaa jaradak'a.
27 ’Mamîda ¿wãara Tachi Ak'õre na eujãde bapariik'ã? ¡Ùt'ari araa–e pùrã iru mama bapariimerã, audupùara na te mùa oopidade araa–e pai! 28 Mamîda, Jõmaarã Ak'õre Waibùa, chupùria k'awáaji ûriit'ee mù, pù mimiaparipa iidi bù. 29 Ichita na te pia ak'ù baparíiji, ãstaawa, p'ãrik'ua pida. Pùa jaradak'a nama baparíiji mãik'aapa ûríji mùa iidi bù. 30 Ûríji mùa ùt'aa iidi bù mãik'aapa nama israelitaarãpa chupùria iidi p'anù. Ùt'ari pù baparimãiipa ûríji mãik'aapa ãyaa bàji taipa p'ek'au k'achia oopata pùmaa jaradak'ãri.
31 ’Eperãpa chîaramaa ne–inaa k'achia oop'eda, aneedak'ãri nama pù k'îrapite, 32 ûríji mãik'aapa pù mimiapataarãmaa k'awapíji k'ãata oodaipia bù ma k'achia ooda ome. K'awapíji chisãgà ne–inaa k'achia oopataarã, ãchi miapidamerã. Ichiaba k'awapíji chi ne–inaa k'achia ooda–eerã, ãra ichiak'au bùdamerã.
33 ’Israelitaarã k'îra unuamaa iru p'anapataarãpa ãra p'oyaa cheruta pùrã pùde ijãa amaa p'anù perã, maap'eda ãrapa chupùria iidiruta pùrã pùmaa na tede, 34 ûríji mãik'aapa ãyaa bàji ãrapa k'achia oodap'edaa. Waya anéeji na eujãde, pùa eujã ãra chonaarãmaa atabëidadee.
35 ’Ichiaba p'oojara paru pùrã israelitaarãpa pùde ijãa amaa p'anù perã, maap'eda ãrapa chupùria iidiruta pùrã na tede, 36 ûríji mãik'aapa ãyaa bàji ãrapa k'achia oodap'edaa. Ãra pù mimiapataarã pù p'uurudepemaarã perã. Ãramaa pù o ak'ùpíji aùde nipapataadamerã. K'oi pïiji na eujãde pùa na eujã bëida perã pù p'uuru pidaarã–it'ee.
37 ’Ichiaba mãgá chupùria k'awáaji jarrajara paru pùrã maa–e pùrã k'ayaa k'achia bariru pùrã maa–e pùrã ne–uu uratùru pùrã ak'õrejîru wãsiapa maa–e pùrã hongopa ne–inaa k'arra ãrit'aaruta pùrã maa–e pùrã ne–animal chak'eerã sisik'a audú îwaruta pùrã maa–e pùrã pù p'uuru pidaarã k'îra unuamaa iru p'anapataarã tai p'uuru wap'ùra ata cheruta pùrã maa–e pùrã awaraa ne–inaa k'achia p'asaru pùrã. 38 Mãgee ne–inaa p'asaru pùrã mãik'aapa israelitaarãpa pùmaa chupùria iidiruta pùrã, ûríji. Pùa unuk'ãri ãrapa jua ùa p'anù chupùria iidi jõnù misa na tede, 39 ûríji pù ùt'ari baparimãiipa mãik'aapa ãrapa ne–inaa k'achia oopata ãyaa bàji. Wãara k'achia oodaamaa p'anùùrã chupùria k'awáaji. Pùata k'awa bù eperã k'îsia t'ãride iru bù. 40 Pùa pù p'uuru mãgá chupùria k'awaaru pùrã, ãrapa pùmaa ùt'aa t'âpataadait'ee na eujãde p'anù misa, pùa tai chonaarãmaa eujã bëidade.
41 ’Awaraa eujãdepemaarã pida, pù p'uuru pidaarã–e mîda, t'ùmùùpa cheruta pùrã ùt'aa t'âdait'ee nama pù te bùmãi ûripata perã 42 pù jõmaarã k'ãyaara waibùara bù, ãchia iidi p'anù ûríji. 43 Pù ùt'ari baparimãiipa ûríji ãrapa ùt'aa iidi p'anù mãik'aapa ãra k'aripáji. Mãgá na eujãdepema p'uuru jõmaarãpa pù k'awadait'ee mãik'aapa pùde ijãadait'ee tai israelitaarãpa ijãapatak'a. K'awadait'ee ùt'aa t'âdaipia bù na te mùa pù–it'ee oodade.
44 ’Pù p'uuru pidaarã chõonadak'ãri ãchi k'îra unuamaa iru p'anapataarã ome, ãchi chõo p'anùmãiipa ùt'aa iidiruta pùrã ak'ù p'anù misa nama pùa jùrùt'erada p'uurumaa mãik'aapa pù te mùa oodamaa, 45 ùt'ariipa ûríji mãik'aapa ãra k'aripáji.
46 ’Israelitaarãpa p'ek'au k'achia oodak'ãri tai eperãarã jõmaarãpa oopatak'a, pù k'îraupidait'ee. Mãga oodak'ãri, pùa ãra k'îra unuamaa iru p'anapataarã pëiit'ee ãra jita atadamerã mãik'aapa ãchi eujãdee ateedamerã, ma eujã k'ait'a bù mîda wa t'ùmà bù pùjida. 47 Mama p'anùde pùmaa chupùria iidiruta pùrã mãik'aapa ãchia p'ek'au k'achia oodap'edaa jararuta pùrã, ûríji. 48 Awaraarã eujãde p'anù misa, t'ãripa ãchia pùde waya ijãa k'inia p'aneeruta pùrã mãik'aapa pùmaa ùt'aa iidi p'aneeruta pùrã ak'ù p'anù misa na eujã pùa bëida ãchi chonaarãmaa mãik'aapa pùa jùrùt'erada p'uurumaa mãik'aapa na te mùa ooda bùmaa, 49 ûríji pù baparimãiipa ùt'ari mãik'aapa ãra k'aripáji. 50 Pù p'uurudepemaarãpa p'ek'au k'achia oopata ãyaa bàji mãik'aapa perdonáaji ãchia pùde ijãa amaa p'aneedak'ãri. Chupùria k'awaapíji ãchi atadap'edaarãmaa. 51 Mãga óoji ãra pù p'uuru pidaarã perã mãik'aapa përé perã. Pùata ãra uchiapiji Egipto eujãdeepa mãpemaarãpa ãra audú k'achia iru p'anadap'edaa perã.
52 ’Ûríji mùa ùt'aa iidi bù, mù pù mimiapari perã. Ûríji pù p'uurudepemaarãpa chupùria iidi jõnù. ¡Tachi Ak'õre, ûríji pùmaa chupùria iididak'ãri! 53 Pùa na eujãdepemaarã p'uuru pidaarã jõmaarãdeepa tai awara bùji përé padamerã. Pùa mãga jaraji pù mimiapari Moisés k'ap'ùa, tai chonaarã uchiapip'eda Egipto eujãdeepa.”
54 Salomonpa mãgá ùt'aa t'âk'ãri, bedabai baji ma altar k'îrapite. Maap'eda chi jua ùt'aa ùap'eda, 55 bainâ beeji mãik'aapa israelitaarã jõmaarãmaa na pedee pia golpe jaraji: 56 “Wãara Tachi Waibùa t'ãri pia bapari tachi israelitaarã ome, na eujãde k'ãiwee p'anapata perã. Irua jaradak'a iru mimiapari Moisés k'ap'ùa tachi pia ak'ùpachi mãik'aapa ne–inaa jõma oopachi tachi k'aripait'ee.
57 ’Ârá Tachi Ak'õre Waibùa tachi ome bapari tachi chonaarã ome badak'a. K'iniada–e p'anù irua tachi atabëimerã. 58 Ma k'ãyaara k'inia p'anù irua tachi k'aripamerã. Mãgá t'ãripa oodai irua oopi bùk'a mãik'aapa iru ley tachi chonaarãmaa p'ãpidade jara bùk'a. 59 Ichiaba k'inia p'anù irua ichita k'irãpamerã mùa nama chupùria iidimaa bù mãik'aapa ewari chaa mù, iru mimiapari, na p'uuru pidaarã paara ak'ù bapariimerã. 60 Irua mãga ooru pùrã, awaraa eujãdepemaarã jõmaarãpa k'awaadait'ee iruta jõmaarã Ak'õre Waibùa. Iruk'a awaraa wê–e. 61 Tachia ma jõma k'inia p'anadairã k'îra jîp'a nipapatáatù Tachi Ak'õre Waibùa k'îrapite. Ne–inaa jõmaweda oopatáatù irua oopi bùk'a mãik'aapa iru leyde jara bùk'a, idiweda oo p'anùk'a.”
62 Salomonpa mãga jarap'eda, iru, israelitaarã ome ne–animalaarã paapijida Tachi Ak'õre–it'ee. 63 Salomonpa veintidós mil p'ak'a ùmùk'îraarã, ciento veinte mil ovejaarã ome paaji ak'ùpiit'ee israelitaarãpa ãchi t'ãri auk'a bù k'inia p'anadap'edaa Tachi Ak'õre ome.
Mãgá reypa, israelitaarã ome Tachi Ak'õre te awara bùjida. 64 Ma ewateweda rey Salomonpa Tachi Ak'õre tedepema puerta taawa eerepema eujã awara bùji mama ma ne–animalaarã Tachi Ak'õre–it'ee paa jõdamerã mãik'aapa mama bùdamerã net'a tau aneedap'edaa teedait'ee Ak'õremaa mãik'aapa mama paadamerã ne–animalaarã traa ak'ùpidait'ee ãchi t'ãri auk'a bù k'inia p'anù Ak'õre ome. Salomonpa ma eujã mãgá awara bùji ma taawapema altar broncedee ooda audú ma–ãri bada perã ma jõma aùde paadamerã.
65 Ma fiesta oo p'anùde, israelitaarã cho–k'ara p'anajida Salomón ome. Chejida ãchi eujã norte eerepema i Jamatdeepa sur eerepema i parumaa, Egipto eujã ideepa. Tomia aba ma fiesta oojida Tachi Ak'õre–it'ee. Ma t'êepai Rancho Oopata fiesta oojida tomia awaraa wãyaaru misa. Mãgá ewari catorce fiesta oo p'anajida. 66 Ma Rancho Oopata fiesta aupadak'ãri, rey Salomonpa israelitaarã pëiji ãchi temaa. Rey Salomonmaa pedee pia jaradap'eda, erreu wãjida. T'ãri o–îa wãjida Tachi Ak'õrepa ãchi pia ak'ù bada perã chi mimiapari, rey David k'ap'ùa.