Awaraa te Salomonpa oopida
7
1 Salomonpa ichiaba palacio oopiji ichi–it'ee. Ma palacio oojida trece año wãyaarude. 2 Ma palacio t'â bùji ‘Líbano pak'uru jêra bùdepema palacio.’ Mãgà palacio teesoo cuarenta y cinco metro baji; chi jet'ee veintidós ap'eda esa–auk'a metro baji; chi ùt'ùa trece metro ap'eda esa–auk'a baji. Chi bùùrù cedro pak'urudee ooda erk'a bùjida hilera k'îmari. Ma ârù bùjida viga cedro pak'urudee ooda. 3 Cuarenta y cinco vigas te bùùrù ârù bùjida, quincequincee erk'a bù chaa. 4 Ventana paredde ùt'à õpee–õpee oojida k'îrapite. 5 Chi ventana, puerta ome kuadria oojida mãik'aapa k'îrapite bùjida hilera õpee. 6 Tedepema puerta k'îrapite cuarto waibùa oojida; veintidós ap'eda esa–auk'a metro chi teesoo; trece ap'eda esa–auk'a chi jet'ee. Ma k'îrapite pórtico oojida columna ome, te k'iru ome. 7 Ma cuarto waibùa edupema eere Salomonpa awaraa cuarto waibùa oopiji. Mama ichi rey su–ak'ù beeparide su–ak'ù beeji eperãarã nepùra ûriit'ee. Ma cuarto waibùa t'â bùji ‘Nepùra Ak'ùparimãi.’ Ma cuarto cedro pak'urupa p'êepiji te k'ùdap'odeepa ùt'aa.8 Salomón bapariida palacio ma cuarto waibùa ãpùteik'a eere ichiaba mãgá oopiji. Te awaraa ichiaba mãgá oopiji Egiptodepema rey k'au–it'ee Salomón ma wêra ome miak'ãi bada perã. 9 Ma te jõmaweda oojida mãu pia sîdadee, t'ùùda serruchopa k'îrapite eere, ãpùteik'a eere. Te basa, chi pared, chi t'ùak'auda jõma oojida mãgee mãudee. 10 Chi mãu pia sîda basadepema ûk'uru metro k'îmari ap'eda esa–auk'a kuadria t'ùùjida; ûk'uru metro õpee ap'eda sesenta centímetro kuadria t'ùùjida. 11 Pared paara oojida mãgee mãudee viga cedro pak'urudee ooda ome. 12 Ma te ãpùte t'ùak'au baji mãu sîda hilera õpee, cedro pak'uru ome aù ârù. Tachi Ak'õre tedepema pórtico, edupema patio ome mãgá ichiaba oojida.
Salomonpa mimiapari pia unu atada
(2 Crónicas 2.13-14; 3.15-17)
13 Rey Salomonpa t'â pëiji Tirodepema eperã t'âjarapatap'edaa Hiram. 14 Mãgà nawe Neftalideepa uchiada paji. P'êtrãa pak'ãri, miak'ãiji Tirodepema ùmùk'îra ome. Ma ùmùk'îrapa ne–inaa oo k'awaa baji broncedee. Chi warra Hirammaa jarateeji auk'a ne–inaa oo k'awaamerã broncedee. Hiram poro wêsaa baji mãik'aapa ichi juapa ne–inaa k'îra t'ãdoo oopachi broncedee. Maperã Salomonpa t'â pëik'ãri, iru cheji mimiait'ee Tachi Ak'õre te oomaa p'anùde. 15 Hirampa te bùùrùk'a columna omé ooji broncedee. Ma teesoo metro ocho baji; chi i p'ùtrùa metro joisomaa ap'eda esa–auk'a baji. 16 Ma columna chaa–it'ee t'ap'a ichiaba ooji broncedee. Ma t'ap'a ùt'ùa metro omé ap'eda veinticinco centímetro baji. 17 Ma chaachaade cadena k'îrak'a bee ooji adorno–it'ee. 18 Ichiaba ma chaachaa granadajõ k'îrak'a bee erk'a jirabee omeede bùji. 19 Ma t'ap'a chaachaa perá metro omé teesoo baji mãik'aapa chi forma lirio p'onok'a baji. 20 Ma t'ap'a chaa ùt'aik'a eere jet'eera baji. Mama ichiaba granadajõ k'îrak'a bù doscientos bùji, erk'a jirabee omeede.
21 Salomonpa ma columna omé bùpiji Tachi Ak'õre tedepema puerta pórtico badamãi. Chi sur eerepema columna t'â bùji Jaquín; jõdee norte eerepema t'â bùji Boaz. 22 Ma columna t'ap'a jõree baji lirio apata nep'onok'a. Mãga beeji ma columna Tachi Ak'õre te t'îupatamãi.
Net'aa awaraa ooda bùdamerã Tachi Ak'õre te bùmãi
(2 Crónicas 4.1—5.1)
23 Ma t'êepai broncedee Hirampa ooji pailak'a bù choma, aùde pania ùadamerã. P'ùtrùa baji. I abaadeepa aù k'îrapite i parumaa metro k'îmari ap'eda esa–auk'a paji. Ma i p'ùtrùa jõmaweda metro trece ap'eda esa–auk'a paji. Chi pailak'a bù ùt'ùa metro omé ap'eda veinticinco centímetro paji. 24 Ma pailak'a i edaik'a eere jiatau k'îrak'a bù ooji aù broncedee. Ma jiatau k'îrak'a bù diez ooji cuarenta ap'eda joisomaa centímetro chaachaa. 25 Ma pailak'a bù bùjida p'ak'a ùmùk'îra k'îrak'a bù broncedee ooda doce ârù. Ma p'ak'a ùmùk'îra k'îrak'a bù taawaa ak'ù p'anajida: õpee norte eere; õpee sur eere; õpee oriente eere; õpee chi occidente eere. Ma pailak'a bù bùjida p'ak'a k'îrak'a bù ek'arra ârù; ãpùteik'a eere jîru ârù. 26 Ma pailak'a bù padaa ocho centímetro paji. Chi i jõree baji lirio apata nep'ono ik'a. Ma pailak'a bùde pania cuarenta y cuatro mil litro araaji.
27 Hirampa ichiaba basa diez ooji broncedee. Ma chaachaa teesoo metro aba ap'eda ochenta centímetro, chi jet'ee auk'a. Chi ùt'ùa metro aba, treinta y cinco centímetro paji. 28 Ma basa ârù kuadria oojida paredk'a k'îmari poste ome. 29 Ma paredk'a beede oojida león k'îrak'a bee, p'ak'a ùmùk'îra k'îrak'a bee mãik'aapa ùt'aripemaarã isia paraa k'îrak'a bee. Ma nonoree ùt'aik'a eere, edaik'a eere paara awaraa nonoree oojida. 30 Ma basa chaachaa rueda eje ome broncedee ooda bùjida ãyaa ateedait'ee. Ma basa chaachaa bùjida pailak'a bù k'aipee, pak'uru k'ak'at'ua ârù, p'êeda broncepa nonoree ome. 31 Ma basa edajãde esquina chaa ne–inaa pak'uruk'a iru baji, sesenta y ocho centímetro chi ùt'ùa. Aù ârù ne–inaa p'ùtrùa baji. Made chi paila bùjida. Ma paila ùt'ùa cuarenta y cinco centímetro baji. Mãgá ma paila ide bada nonoree unujida. Chi basa k'îra chaa kuadria baji. 32 Ma basa edaik'a eere eje bùjida chi rueda broncedee ooda–it'ee. Ma rueda ùt'ùa sesenta y ocho centímetro baji. 33 Carrok'a bù ruedak'a baji. Chi eje, aro, radio, cubo paara broncedee ooda paji. 34 Ma basa taawaik'a eerepema esquina chaa k'uk'uk'a uchiajida. 35 Ma basa ùt'aik'a eere chi k'îra chaa k'arada baji ma paila i ome. Ma paila i ùt'ùa veintidós y medio centímetro baji. 36 Ma basa k'îra chaade Hirampa nonoree ooji ùt'aripemaarã isia paraa p'anù k'îrak'a bee, león k'îrak'a bee mãik'aapa palma k'îrak'a bee. Jõdee chi ide nonoree ooji trenza k'îrak'a bù. 37 Ma basa diez auk'a ooji broncedee; chi ùt'ùa, jet'ee, mãgá.
38 Ma basade bùdamerã Hirampa pailak'a bù k'aipeera diez ooji broncedee. Ma chaachaa i abaadeepa aù k'îrap'e i parumaa metro aba, ochenta centímetro paji. Aùde pania ochocientos ochenta litro araaji. 39 Ma basa chi paila k'aipee ome nãga bùjida: joisomaa Tachi Ak'õre tedepema puerta sur eere; joisomaa norte eere. Jõdee ma pailak'a bù choma bùjida Tachi Ak'õre tedepema puerta juaraare, sureste eere, tachi uchiak'ãri tedeepa.
40 Ma net'aa awara Hirampa ooji k'uuru, pala, taza. Mãgá aupaji Salomonpa mimia oopida Tachi Ak'õre tede. 41 Ooji ma columna omé mãik'aapa ma columna k'â chaa ùt'aik'a eere awaraa columna chak'e p'ùtrùa ooji. Ma ârù cadena k'îrak'a bee ooji. 42 Ooji granadajõ k'îrak'a bù erk'a jirabee omeede bùit'ee ma ùt'aik'a eerepema columna chak'e p'ùtrùa beede. Ma–it'ee cuatrocientos granadajõ k'îrak'a bù ooji (doscientos bùit'ee ma columna chak'e chaa). 43 Ooji ma basa diez mãik'aapa diez pailak'a bee ma basa chaachaa ârù bùit'ee. 44 Ooji chi pailak'a bù choma, chi basa ome mãik'aapa ma basadepema p'ak'a k'îrak'a bù doce ome, 45 ma jõmaweda k'uuru, pala, taza awara.
Ma jõma Hirampa broncedee ooji rey Salomonpa oopidak'a Tachi Ak'õre tede bùdait'ee. 46 Aù naaweda reypa molde oopiji ipu nãusaadee Jordán to k'ait'a, Sucot p'uuru Saretán p'uuru esajîak'a. 47 Ma ne–inaa audú chok'ara p'anadap'edaa perã, Salomonpa chi chùk'ùa chaapi–e paji.
48 Salomonpa ichiaba awaraa ne–inaa oopiji bùdait'ee Tachi Ak'õre tede. Nãgà paji: altar k'aipee p'êeda nêepa; mesa p'êeda nêepa aù ârù bùdait'ee pan awara bùda Tachi Ak'õre–it'ee; 49 lámpara bùpata bùdait'ee cuarto edupùara bù k'îrapite. Mãgà oopiji nêedee aupai, lámpara joisomaa juaraare mãik'aapa joisomaa juabi eere. Aùde nonoree oopiji nep'ono k'îrak'a bee. Ichiaba lámpara nêedee oopiji bùdait'ee ma lámpara bùpatade mãik'aapa pinza oopiji iru p'anadait'ee mecha jitadait'ee. 50 Ichiaba nêedee aupai oopiji ne–inaa k'îra t'ãdoo iru p'anadait'ee ma tede: copa, taza, pinza, k'usarra, brasero mãik'aapa visagra cuarto edupùara bù puertadepema mãik'aapa te puertadepema.
51 Ma mimia jõmaweda oodap'eda Salomonpa oopidak'a Tachi Ak'õre te–it'ee, Salomonpa ne–inaa nêedee ooda mãik'aapa p'arat'adee ooda Davidpa awara bùda Tachi Ak'õre–it'ee ateeji ma tede mama ùa bùit'ee.