Salomonpa Tachi Ak'õre te oopida
6
1 Israelitaarã Egipto eujãdeepa uchiadap'edaa cuatrocientos ochenta año iru p'anadak'ãri, Salomonpa Tachi Ak'õre te oomaa beeji. Mãga oopi beeji iru año k'îmari rey bùde, atane omé zif apatade. 2 Ma te Jõmaarã Ak'õre Waibùa–it'ee oopida nãga baji. Chi teesoo veinte siete metro baji; chi jet'ee nueve metro baji; chi ùt'ùa trece ap'eda esa–auk'a metro baji. 3 Ma tedepema puerta eere pórtico oojida. Ma–it'ee te k'iru metro k'îmari ap'eda esa–auk'a teesoora oojida. 4 Ma tede Salomonpa ventana oopiji reja ome. 5 Te taawaik'a eere pared ome cuarto k'aipee araa oojida. Ma k'îrapite chi te t'ùak'au bada muralla baji mãik'aapa ma cuarto, muralla esa–auk'a ewaraa k'obaji. 6 Edupema eere te k'ùdap'o jet'ee metro omé, veinticinco centímetro paji. Aù ùt'aik'a eerepema cuarto k'aipee te k'ùdap'o jet'ee metro omé, setenta centímetro paji. Aù ùt'aik'a eerepema te k'ùdap'o jet'ee metro õpee, quince centímetro paji. Chi te k'ùdap'o mãgá oojida ma cuartodepema te viga ma te k'ùdap'ode bùdamerã, te paredde uria oodai k'ãyaara. 7 Ma te mãudee oojida. Mãu choma pi–ia sîdap'edaa aupai t'ùmùùpa aneejida. Sîdak'aa paji te oodap'edaamãi. Mãgá ma te oopatap'edaamãi maarepida biuk'ada–e paji martillopa, picapa wa awaraa ne–inaa hierrodee oodapa. 8 Chi edupema eere te k'ùdap'ode puerta bùjida te sur eerepema paredde. Ma puerta k'ait'a tome oojida aùde wãdamerã ùt'ùpema pisodee.9 Salomonpa ma te aupa wãk'ãri, te k'iru cedro pak'urudee ooda bùpiji aù ârù. 10 Mãpai ma cuarto k'aipee oopiji te taawaik'a eere. Chi ùt'ùa metro omé, veinticinco centímetro paji. Ma cuarto k'aipee oodait'ee viga cedro pak'urudee ooda bùjida. 11 Ma te mãga beek'ãri, Tachi Ak'õrepa Salomonmaa mãgaji: 12 “Na te oop'eda, pùa ooru pùrã mùa jara bùk'a mãik'aapa mù ûraade jara bùk'a, mùa ooit'eeda aji, mùa jaradak'a pù ak'õre Davidmaa. Pù ome bapariit'eeda aji. 13 Ma awara israelitaarã t'ãide bapariit'ee. Mù p'uuru pidaarã, israelitaarã, atabëi–e pait'eeda” aji.
14 Ma t'êepai Salomonpa Tachi Ak'õre te aupaji. 15 Edaik'a eerepema paredde bùpiji tabla cedro pak'urudee ooda, te k'irudeepa te k'ùdap'o parumaa. Te k'ùdap'o ârù tabla pino pak'urudee ooda bùpiji. 16 Ichiaba chi te k'ùdap'o metro nueve chaa atap'eda, ma te jãde edupùara eere cuarto oopiji. Te k'irudeepa te k'ùdap'o parumaa pared oopiji cedro pak'urudee. Ma cuarto awara bùji Tachi Ak'õre–it'ee. 17 Ma cuarto k'îrapitepema te jã teesoo metro dieciocho paji. 18 Chi te edaik'a eerepema pared cedro pak'urudee ooda paji; t'êda nep'ono, nejõ k'îrak'a bee ome. Te edajãde jõma cedro pak'urudee ooda paji. Mãu apida unuda–e paji. 19 Salomonpa ma edupùara bù cuarto awara bùji Tachi Ak'õre baaltek'a bù aùde bamerã. 20 Ma edupùara bù cuarto teesoo nueve metro paji; chi jet'ee ichiaba nueve metro paji; chi ùt'ùa jida nueve metro paji. Salomonpa altar oopiji cedro pak'urudee mãik'aapa nêepa p'êepiji. Ma altar bùjida ma edupùara bù cuarto k'îrapite. 21 Ma te edajãdepema pak'uru jõmaweda nêepa p'êepiji, chi edupùara bù cuarto ichiaba. Ma cuarto k'îrapite cadena nêedee ooda bùpiji. 22 Mãgá ma te jã chi altar paara nêepa p'êe beeji.
23 Salomonpa ùt'aripemaarã k'îrak'a bee isia paraa omé oopiji bùdait'ee ma edupùara bù cuartode. Oopiji olivo pak'urudee. Chi ùt'ùa metro k'îmari ap'eda esa–auk'a paji. 24 Ma ùt'aripemaarã k'îrak'a bù isia chaa metro omé ap'eda veinticinco centímetro paji. Mãgá abaadepema isia k'â ma edupùara bù cuarto pared t'õbaiji; jõdee chi apema isia k'â apema k'îrak'a bù isia t'õbai baji ma cuarto esajîak'a. Mãgà k'îrak'a bù isia apema jõdee t'õbai baji aù k'îrapitepema pared ome. 25 Ma ùt'aripemaarã k'îrak'a bee omeeweda auk'a metro k'îmari ap'eda esa–auk'a p'anajida; isia aba k'âdeepa apema isia k'â parumaa. Ãra k'îra auk'a p'anajida. 26 Chi ùt'ùa ichiaba metro k'îmari ap'eda esa–auk'a baji. 27 Salomonpa ma ùt'aripemaarã k'îrak'a bee omé bùpiji edupùara bù cuartode. Bùpiji abaadepema isia k'â pared aba t'õbaimerã; chi apemade aù k'îrapite pared auk'a t'õbaimerã. Jõdee apema isia k'â ome t'õbai p'anajida ma cuarto esajîak'a. 28 Mãga bùdap'eda, Salomonpa omeeweda nêepa p'êepiji. 29 Ma edupùara bada cuartodepema pared, taawa eerepema cuartodepema pared jõmaade oopiji ùt'aripemaarã k'îrak'a bee isia paraa, palma pak'uru k'iru k'îrak'a bee mãik'aapa nep'ono k'îrak'a bee. 30 Ma edupùara bada cuarto k'ùdap'o, taawapema cuarto k'ùdap'o paara nêepa p'êepiji. 31 Ma edupùara bada cuartodepema puerta omé oopiji olivo pak'urudee. Ma puerta i chaadepema poste k'îra joisomaa iru baji. 32 Ma puerta chaa t'êpiji ùt'aripemaarã k'îrak'a bee isia paraa, palma pak'uru k'iru k'îrak'a bee mãik'aapa nep'ono k'îrak'a bee. Maap'eda jõma nêepa p'êepiji. 33 Tedepema puerta idepema poste olivo pak'urudee oopiji. Ma chaachaa k'îra k'îmari ooda paji. 34 Ma puerta k'îraichaa pino pak'urudee oopiji. Oopiji aùde bù tabla p'ùrrabaidamerã ma puertade t'îudak'ãri. 35 Ma puertade ichiaba t'êpiji ùt'aripemaarã k'îrak'a bee isia paraa, palma pak'uru k'îrak'a bee mãik'aapa nep'ono k'îrak'a bee. Maap'eda ma jõma nêepa p'êepiji. 36 Te ãuk'idaa patio t'ùak'aupiji mãu sîda erk'ama õpeepa mãik'aapa ùt'ùpùara erk'ama viga cedro pak'urudee oodapa.