Rey Salomonpa pacto ooda Tirodepema rey ome
(2 Crónicas 2.1-14)
5
1 David rey pak'ãri, Tirodepema rey Hirampa iru t'o iru bapachi. Mapa k'awa atak'ãri Salomón rey pada chi ak'õre David pari, ichi ek'ari beerã pëiji Salomonmaa pedee pia jaradamerã ichi pari. 2 Maap'eda Salomonpa nãga jara pëiji rey Hirammaa: 3 “Pùa k'awa bùda aji, mù ak'õre Davidpa te p'oyaa oo–e paji ichi Ak'õre Waibùa–it'ee, awaraarã ome audú chõo bapachi perã. Iru k'ãiwee bak'aa paji Jõmaarã Ak'õre Waibùapa ichimaa iru k'îra unuamaa iru p'anapatap'edaarã p'oyaaru misa. 4 Mamîda ârá, Tachi Ak'õrepa k'aripap'eda, k'ãiwee p'anapata, tai ik'aawa p'anapataarãpa chõo jùrùda–e p'anadairã tai ome. 5 Maperã mùa te oo k'inia bù mùchi Ak'õre Waibùa–it'ee, irua jaradak'a mù ak'õre Davidmaa. Jaraji iru warrata, iru t'êe rey pait'ee bùpa ma te ichi–it'ee ooit'ee paji. 6 Maperã mùa iidi bùda aji, pùa Libanodepema cedro pak'uru t'upeepimerã pëiit'ee namaa. Mùa mimiapataarã pëiit'ee përeerã k'aripadamerã mãik'aapa pùa jararuk'a p'aait'ee ãra mimiapata pari. Pùa k'awa bùda aji, tai nãpemaarãpa mak'ùara k'awada–e pak'uru t'upeedait'ee, parã sidoniorãpa k'awapatak'a.”7 Rey Hirampa ma jara pëida ûrik'ãri, o–îadachi mãik'aapa mãgaji: “Wãara Jõmaarã Ak'õre Waibùa t'ãri pia baparida aji, Daviddeepa uchiapida perã warra k'îsia k'awaa bù ichi p'uuru ak'ù bapariimerã.”
8 T'êepai Hirampa nãga jara pëiji Salomonmaa: “Leejida aji, pùa jara pëida. Ooit'ee pùa iididak'a. Cedro pak'uru pino pak'uru ome t'upeepiit'ee mù mimiapataarãmaa. 9 Mùa jaraji ãrapa ma pak'uru jõmaweda p'e ateedamerã Libanodeepa p'usa idee. Mamãik'aapa balsade ateedai pùa jararumaa. Pùa, jõdee, chik'o bùyada aji, mùchi tedepemaarã–it'ee.”
10 Mãga oojida. Hirampa pëiji cedro pak'uru pino pak'uru ome, Salomonpa iidi pëidak'a. 11 Jõdee Salomonpa chik'o pëiji Hiram tedepemaarã–it'ee; k'îmari millón cuatrocientos mil litro trigo mãik'aapa k'îmari mil cuatrocientos litro aceite olivodee ooda. Año chaa mãgá waibùa pëiji Hirammaa. 12 Tachi Ak'õrepa Salomón k'îsia k'awaapiji ichia jaradak'a. Rey Hiram rey Salomón ome pacto oojida chõo–ee p'anapataadait'ee.
13 Maapai rey Salomonpa mimiapataarã jùrùpiji ma mimia–it'ee. Treinta mil ùmùk'îraarã p'e atajida. 14 Atane chaa Líbano eujãdee diez mil pëijida. Mãgá ma mimiapataarã treinta mil t'erabaijida. Mãgá mãùrã atane aba Libanode mimiadap'eda, atane omé p'anajida ãchi temãi. Adonirán ma mimiapataarã poro waibùa paji. 15 Ma treinta mil awara Salomonpa mêe mimiapiji ne–inaa uapataarã setenta mil, mãu sî k'awapataarã ochenta mil ome. 16 Salomonpa ma mimiapataarã jõmaarã bùji õpee mil ap'eda trescientos poro waibùarã jua ek'ari. 17 Rey Salomonpa ma mimiapataarã ûk'uru pëiji mãu choma atanadamerã Tachi Ak'õre te pared basa–it'ee. Iidiji aneedamerã mãu pi–ia sîda aupai. 18 Rey Hiram jua ek'ari p'anadap'edaa te k'arawapataarã Guebal p'uurudepemaarã ome, Salomón mimiapataarãpa paara pak'uru t'êjida mãik'aapa mãu sîjida aùdee chi te oodamerã.