Salomón rey mimiade bada
4
1 Salomón israelitaarã jõmaarã rey paji. 2 Ãchi poro waibùarã iru jua ek'ari mimiadap'edaa nãgùùrã paji. P'aare Salomón jua ek'ari mimia bada Sadoc warra Azarías paji; 3 reypa ne–inaa oopata p'ãpariirã mimia oo p'anadap'edaa Sisá warrarã Elijoref, Ahías ome paji; rey secretario mimia bada Ajilud warra Josafat paji; 4 soldaorã poro waibùa mimia bada Joyadá warra Benaías paji; p'aareerã mimia oo p'anadap'edaa Sadoc, Abiatar ome paji; 5 rey jua ek'ari eujã ak'ùpataarã poro waibùa mimia bada Natán warra Azarías paji; rey ûraapari mimia bada p'aare Natán warra Zabud paji; 6 palacio ak'ùpataarã poro waibùa mimia bada Ajisar paji mãik'aapa awaraa mimiapataarã poro waibùa mimia bada Abdá warra Adonirán paji.7 Salomonpa ichiaba eujã ak'ùpataarã doce iru baji ichi jua ek'ari. Ãchia chik'o awaraa net'aa reypa iidida ome aneepachida reydeerã–it'ee. Atane chaa mãùrãdepema abaapa mãga oopachi. 8 Nãgùùrã paji.
Ben Jurpa Efraindeepa uchiadap'edaarã ee jêra bù eujãdepema ak'ùpachi. 9 Ben Decar Macaz, Salbín, Bet Semes, Elón Bet Janán p'uuru ak'ùpachi. 10 Ben Jesedpa Arubot, Soco p'uuru mãik'aapa Héfer eujã ak'ùpachi. 11 Ben Abinadabpa Dor eujã ak'ùpachi. Mãgà wêra Salomón k'au Tafat paji. 12 Ichiaba Ajilud warra Banapa ak'ùpachi Tanac, Meguido, Betseán, Saretán Jezrel p'uuru waawí bù, ma p'uuru mãik'aapa p'uuru jõmaweda Betseandeepa Abel Mejolá, Jocmeán p'uuru waawí paara. 13 Ichiaba Ramot de Galaaddepema Ben Gueberpa ichi jua ek'ari iru baji Galaad eujãdepema p'uuru k'aipee p'anadap'edaa Manasés warra Yaír iru bada ichi jua ek'ari; Argob eujã, Basán eujãde. Mama paraaji p'uuru waibùa sesenta, muralla t'ùak'au p'anadap'edaa puerta broncedee ooda ome. 14 Idó warra Ajinadabpa Majanayin p'uuru ak'ùpachi. 15 Ichiaba Ahimazpa Neftalideepa uchiadap'edaarã eujã ak'ùpachi. Iru miak'ãi baji Salomón k'au Basemat ome. 16 Husay warra Banapa Aserdeepa uchiadap'edaarã eujã mãik'aapa Alot p'uuru ak'ùpachi. 17 Parúaj warra Josafatpa Isacardeepa uchiadap'edaarã eujã ak'ùpachi. 18 Elá warra Simipa Benjamindeepa uchiadap'edaarã eujã ak'ùpachi. 19 Uri warra Gueberpa Gaddeepa uchiadap'edaarã eujã ak'ùpachi. Aù naaweda ma eujã amorreorã rey Sijón mãik'aapa Basán eujãdepema rey Og jua ek'ari baji.
Ma awara israelitaarã eujã jõmaweda ak'ùpari paraaji.
Salomón k'îsia k'awaa, p'arat'ara bada
20 Salomón rey bùde Judadeepa uchiadap'edaarã mãik'aapa israelitaarã cho–k'ara p'anajida. P'usa idepema ipu nãusaa tau p'oyaa juasiada–e bùk'a, audú chok'ara paraa perã, mãga pùk'a ãra cho–k'ara p'anajida. Maapai chik'o waibùa paraaji. Mãgá nek'odait'ee mãik'aapa ne–inaa todait'ee iru p'anadap'edaa perã, ãra o–îa p'anapachida. 21 Eujã Éufrates todeepa filisteorã p'anapatap'edaa eujã parumaa mãik'aapa Egipto eujã i parumaa, ma jõma Salomón jua ek'ari baji. Ma eujãdepema reyrã ichiaba Salomón jua ek'ari p'anapachida mãik'aapa iru chok'ai bù misa, irumaa impuesto p'aapachida. 22 Salomón te pidaarã–it'ee, ichi ek'ari beerã te pidaarã–it'ee ewari chaa eperãarãpa chik'o waibùa aneejida: seis mil seiscientos litro harina nãusaa bada waa trece mil doscientos litro harina jîp'aa. 23 Ma awara ewari chaa k'ojida p'ak'a ùmùk'îra poreera bee diez, p'ak'a ùmùk'îra veinte warida taawa p'ûajarade, ovejaarã cien; ma awara chivo warida mãik'aapa bigi, ipanaarã mêepema. 24 Ma chik'o waibùa p'oyaa atajida ma eujã Salomón jua ek'ari waibùa bada perã, Tisfadeepa Gaza parumaa. Ma eujãde p'anapatap'edaa reyrãpa irumaa teepachida. Iru jua ek'ari eujãdepemaarãpa, ma ik'aawa eujãdepemaarãpa ichiaba teepachida, chõoda–ee p'anapatap'edaa perã iru jua ek'ari beerã ome.
25 Salomón chok'ai bùde Judadeepa uchiadap'edaarã k'ãiwee p'anapachida israelitaarã ome; Dandeepa uchiadap'edaarã eujãdeepa Berseba parumaa. Te chaadepemaarãpa ãchi ne–uu iru p'anajida. 26 Salomonpa caballo k'ãipata te k'îmari mil iru baji caballo doce mil–it'ee. Carreta caballopa jidiupata chok'ara p'e iru baji ichiaba. 27 Iru jua ek'ari beerã ma eujã waibùadepemaarãpa chik'o aneepachida rey Salomon–it'ee, ichideerã–it'ee, p'asia nipapataarã–it'ee. 28 Atane chaa t'erabaijida ma chik'o aneedait'ee. Ichiaba cebada ewadap'edaa, p'ûajara ome aneepachida chi caballoorã–it'ee, awaraa ne–animalaarã–it'ee.
29 Tachi Ak'õrepa Salomón k'îsia k'awaara papiji jõmaarã k'ãyaara. Ipu tau paraak'a p'usa ide, mãga pùk'a Salomón audú k'îsia k'awaa bapachi. 30 Mãgá Salomón k'îsia k'awaara beeji Egipto eujãdepemaarã k'ãyaara mãik'aapa oriente eerepemaarã k'ãyaara. 31 K'îsia k'awaara baji jõmaweda eperãarã k'ãyaara, Zeradeepa uchiada k'îsia k'awaa bù Etán k'ãyaara, Majol warrarã k'îsia k'awaa beerã, Hemán, Calcol, Dardá, mãùrã k'ãyaara ichiaba. Awaraa eujãdepemaarã, ma eujã ik'aawa p'anapatap'edaarã jõmaarãpa Salomón t'o iru p'anajida. 32 Salomonpa ûraa pia õpee mil jaraji. Ma awara poesía mil ap'eda joisomaa p'ãji. 33 Pia k'awaji ne–inaa k'arra k'îra t'ãdoo, Líbano eujãdepema cedro pak'urudeepa p'ûajara jîp'aa parumaa. Auk'a pia k'awaji ne–animalaarã k'îra t'ãdoo p'anapata, ipanaarã jida, ne–animalaarã bipa urt'îu nîuteepata ichiaba, toidapema chik'o paara. 34 Ûridak'ãri Salomón mãgá k'îsia k'awaa bada, awaraa eujãdepemaarã t'ùmùùpa Salomonmaa chepachida irua ûraa jara bù ûride.