Salomón miak'ãida Egiptodepema rey k'au ome
3
1 Salomón Egiptodepema Faraón k'au ome miak'ãiji. Mãgá Faraondeerã ome ëreerãk'a beeji. Chi wêra ateeji David p'uurude, ichi te mãik'aapa Tachi Ak'õre te, p'uuru t'ùak'au bù muralla paara oopiru misa Jerusalén p'uurude. 2 Maapai Tachi Ak'õre te at'ãri aupada–e p'anadap'edaa perã, israelitaarãpa ne–animalaarã paapipachida ee nok'ode ijãadak'aa beerãpa oopatap'edaak'a.Salomonpa Tachi Ak'õremaa iidida k'îsia k'awaapimerã
(2 Crónicas 1.1-13)
3 Salomonpa Tachi Ak'õre k'inia iru bapachi mãik'aapa oopachi rey Davidpa ley p'ã bëidade jaradak'a israelitaarãpa oodamerã. Mãga bapachi mîda, ne–animalaarã paapipachi mãik'aapa ne–inaa t'ûa bapari paapipachi ee nok'ode, ijãadak'aa beerã ùt'aa t'âpatap'edaamãi. 4 Ma awara iru Gabaondee wãpachi ne–animalaarã Tachi Ak'õre–it'ee paapiit'ee, mama audú mãga oopatap'edaa perã. Salomón mama bùde ne–animalaarã mil Tachi Ak'õre–it'ee paa jõpiji.
5 Mama bùde p'ãrik'ua k'ãimok'araade Tachi Ak'õrepa ichi unupiji Salomonmaa mãik'aapa iidiji:
—¿K'ãata audú k'inia bùma aji, awaraa ne–inaa k'ãyaara? Mùa pùmaa teeit'eeda aji.
6 Salomonpa p'anauji:
—Pùa mù ak'õre, pù mimiapari David, pia ak'ù bapachi iru pù k'îrapite pia nipapachi perã mãik'aapa pùa oopi badak'a oo k'inia bapachi perã. Mãgá pia nipapachi perã, pùa mù, iru warra, rey papiji. 7 Ak'õre Waibùa, pùata mù rey bùji mù ak'õre David k'ap'ùa pari. Mãga ooji mù mak'ùara chonaa–e bù mîda mãik'aapa pia ne–inaa waide oo k'awa–e bù mîda. 8 Ârá mù pùa jùrùt'erada p'uuru pidaarã rey. Ma p'uuru pidaarã audú chok'ara p'anadairã, apidaapa juasiada–e pai. 9 Ãra mãgá audú chok'ara p'anadairã, ¿sãgá mùa ãra pia ak'ù baima mùchi k'îradoopa? P'oyaa–e bairã mùa nãga iidi bù. K'îsia k'awaa papipáde aji, t'ãripa mùa na p'uuru pidaarã k'aripamerã mãik'aapa k'awamerã k'ãare ne–inaa pia, k'ãare ne–inaa k'achia.
—Pùa mãga iidida perã iidii k'ãyaara ewari teesoo bapariit'ee maa–e pùrã p'arat'ara bapariit'ee maa–e pùrã pù k'îra unuamaa iru p'anapataarã jõpiit'ee, 12 mùa ooit'ee pùa iididak'a. Pù audupùara poro wêsaa, k'îsia k'awaa papiit'ee na eujãdepema jõmaarã k'ãyaara, na eujã oodadeepaweda chi jõrumaa. 13 Ma awara pùa iidi–e paji mîda, mùa p'arat'ara bapiit'ee, net'aara iru bapiit'ee, mùa pù mãga bapipariit'ee apemaarã reyrã k'ãyaara. 14 Pùa ooru pùrã mùa oopi bùk'a mãik'aapa pù ak'õre Davidpa oodak'a, mùa ichiaba pù ewari teesoo bapipariit'eeda” aji.
15 Mãgá k'ãimok'araa bap'eda, Salomón ârùmak'ãri, k'irãpaji ichia k'ãimok'araada.
Maap'eda Jerusalende waya pak'ãri, wãji Tachi Ak'õre ome unupata tedee iru baaltek'a bù badamãi. Ma baaltek'a bùde Tachi Ak'õre ley p'ãda ùa baji israelitaarãpa ma ley k'irãpadamerã. Mama bùde ne–animalaarã Tachi Ak'õre–it'ee paa jõpiji mãik'aapa awaraa ne–animalaarã paapiji ichi t'ãri auk'a bù k'inia bada perã Tachi Ak'õre ome. T'êepai fiesta ooji ichi ak'ùpataarã ome.
16 Salomón rey bùde ewari aba prostitutaarã omé chejida iru k'îrapite ãchi nepùra ak'ùmerã. 17 Abaapa mãgaji: “Tachi rey waibùa, na wêra mù ome te abaade bapari. Mama p'anùde mùa warra chai t'oji. 18 K'ãima õpee parumaa irua warra t'oji ichiaba. Tai omeepai p'anajida ma tede; awaraa eperã wê–e paji. 19 Mãga nùde p'ãrik'ua k'ãi bùde, ichi pùrak'ãri chi warra ârù, piudachi. 20 Mãga unuk'ãri, juajîa p'irabaip'eda, ichi warra t'erabaiji mëré ome, mù k'ãi bù misa. 21 Aù norema âdatùpodopa mù warra jutopiit'ee pak'ãri, ma warra piuda unu ataji. Mamîda tap'eweda pia ak'ùk'ãri, k'awa ataji ma warra chai piuda mùa t'oda–e paji.
22 Mãga ûrik'ãri, chi apema wêrapa mãgaji:
—Mãga–eda aji. Mëré chok'ai bùda aji. Përeta piuji.
Mamîda chi nepùrù badapa p'anauji:
—Mãga–eda aji. Përeta piuji. Mëré chi chok'ai bùda aji.
Mãgá aupedee p'aneejida rey k'îrapite. 23 Mãpai rey Salomonpa nãga k'îsia beeji ichi t'ãridepai. “Nãgùpa jara bù ichi warrata chok'ai bù mãik'aapa chi piuda apemade. ¡Mamîda chi apemapa auk'a jara bù!” 24 K'îsiap'eda, reypa mãgaji chi ak'ùpataarãmaa:
—¡Espada aneedapáde! aji.
—Chi warra chok'ai bùta t'oop'epáde aji, esa–auk'a teeit'ee ãchi chaachaa.
26 Mamîda mãga ûrik'ãri, chi warra chok'ai bù nawepa chi warrade audú k'îsia nâbeeji. Maperã chupùria iidiji reymaa:
—Tachi rey waibùa, ¡mãga oopinaapáde! aji. ¡Piara bak'aji jã wêrapa mù warra atamerã piupii k'ãyaara!
Mamîda chi apema wêrapa mãgaji:
—¡T'oop'epipáde! aji. ¡Mãgá apidaapa warra chok'ai iru ba–e pait'ee!
27 Mãga ûrik'ãri, reypa mãgaji:
—Teepáde aji, chi peepiamaa badamaa. Jãta ma warra naweda aji.
28 Israelitaarãpa ûridak'ãri sãgá reypa ma nepùra ak'ùda, iru pia ak'ù p'aneejida. K'awajida Tachi Ak'õrépata k'îsia k'awaapiji eperãarã nepùra ak'ùmerã mãik'aapa jaramerã chisãgà pia, chisãgà k'achia.