Davidpa pedee t'êe jarada chi warra Salomonmaa
2
1 Davidpa k'awak'ãri ichi jai–idaait'ee, chi warra Salomonmaa nãga jaraji:2 —Taarã–e bùde jõmaarã eperãarãk'a mù piuit'ee. Sõcharra bapáde aji, mãik'aapa k'îra jîp'a nipaparíiji. 3 Ooparíiji Tachi Ak'õrepa Moisemaa ley p'ãpidade jara bùk'a. Ne–inaa jõmaweda ooparíiji Tachi Ak'õrepa pùmaa oopi bùk'a. Mãga ooru pùrã, pia bapariit'ee Tachi Ak'õrepa pù k'aripait'ee perã. 4 Ma awara mãga ooru pùrã, Tachi Ak'õrepa ooit'ee ichia mùmaa jaradak'a. Jaraji mùdeepa uchiadait'eerã mãgá t'ãripa irude ijãaruta pùrã, ãra ichita israelitaarã reyrã padait'ee.
5 ‘Pùa k'awa bù Sarvia warra Joabpa mùmaa ooda. Peeji israelitaarã poro waibùarã, Ner warra Abner mãik'aapa Jéter warra Amasá. Irua mãùrã peeji jura chõoda–e p'anùde, k'îra jõ–ee bada perã ãra ome. Iru k'aurépata eperãarãpa mù ãpùte ik'achia pedeepachida. 6 Óoji pùchia k'îsia bùk'a iru ome. Mamîda ichiak'au bùik'araa bù chonaa bùta piumerã. 7 Jõdee mùa k'inia bù Galaaddepema Barzilay warrarãmaa ne–inaa pia oomerã mãik'aapa nek'opimerã pùchi mesade, ãrapa mù jâadap'edaa perã mù jirabodok'ãri pù âpema Absalón waidoopa. 8 Benjamindeepa uchiada Gera warra, Simei at'ãri bapari Bajurín p'uurude. Mãgùpa mùmaa ik'achia jaraji tachi wãyaadak'ãri Majanayinde. Mãpai ãpùtee chedak'ãri Jerusalendee, iru uchiaji mù ome k'îrachuude Jordán to sîarutade. Iru chupùria k'awaap'eda, mùa jaraji iru pee–e pait'ee ma pedee k'achia jarada k'aurepa. 9 Mamîda pùa iru chupùria k'awaaik'araa bù. Pù k'îsia k'awaa bairã, k'îsiait'ee k'ãata ooipia bù irumaa. Ne–inaa oopáde aji, k'ãiwee piunaamerã.
David jai–idaada
(1 Crónicas 29.26-30)
10 Maap'eda David jai–idaaji. Ùajida ichi p'uuru Jerusalende ichideerã ùadap'edaamãi. 11 Cuarenta año wãyaarude David israelitaarã rey paji. Mãgá rey bùde siete año bapachi Hebrón p'uurude. Apema treinta y tres año Jerusalende bapachi. 12 David warra Salomón rey beeji iru pari. Israelitaarã k'ãiwee p'anapachida Salomón jua ek'ari.
Adonías ichi eere p'anadap'edaarã ome jõdap'edaa
13 Maap'eda Jaguit warra Adonías wãji Salomón nawe Betsabemaa p'asiade. Betsabepa iidiji:
—¿Pù t'ãri pia cheruk'ã? aji.
—Mùa pùmaa ne–inaa jara chejida aji.
Betsabepa mãgaji:
—Jarapáde aji.
15 Adoniapa mãgaji:
—Pùa k'awa bù mù rey pait'ee pada, israelitaarãpa k'îsia p'anadap'edaak'a. Mamîda Tachi Ak'õrepa k'îsia awara iru baji. Mapa mù âpema rey beeji mù k'ãyaara. 16 Ârá mùa chupùria iidi nâbù pùa mù k'aripamerã. Oo–eda anaapáde aji.
Betsabepa p'anauji:
—Jarapáde aji, pùa mùmaa oopi k'inia bù.
17 Mãpai Adoniapa mãgaji:
—K'inia bùda aji, mù pari pù wãmerã rey Salomonmaa sunamita awêra Abisag iidide mùchi wêra–it'ee. Pùata iidiru pùrã, irua **wãak'a–e pait'eeda aji. 18 Betsabepa p'anauji:
—Pùa iidi bùk'a ooit'eeda aji. 19 Aù t'êepai Betsabé wãji rey Salomonmaa pedeede Adonías pari. Salomonpa unuk'ãri chi nawe cheru, bainâ beeji mãik'aapa âjaabaiji iru k'îrapite. Mãpai waya su–ak'ù beeji rey su–ak'ù beeparide mãik'aapa iidiji chi ak'ùpataarãpa su–ak'ù beepari aneedamerã chi nawe–it'ee. Aneedap'eda, Betsabé su–ak'ù beeji Salomón juaraare. 20 Mãpai mãgaji:
—Mù chupùria iidi k'inia bùda aji, pùa ne–inaa oomerã. Oo–eda anaapáde aji.
Salomonpa p'anauji:
—Nawe, iidipáde aji. Mùa pùmaa oo–eda a–e pait'eeda aji.
21 Mãpai Betsabepa mãgaji:
—Sunamita awêra Abisag miak'ãipipáde aji, pù âpema Adonías ome.
22 Mãga ûrik'ãri, rey Salomonpa chi nawemaa iidiji:
—¿Sãap'eda pùa sunamita Abisag iidimaa bùma aji, Adonias–it'ee? ¿K'inia bùk'ã iru rey pamerã mù pari, iru mù naapema perã maa–e pùrã p'aare Abiatar, Sarvia warra Joab ome iru eere p'anadairã?
23 Mãga jarap'eda, Tachi Ak'õre k'îrapite rey Salomonpa nãga juraaji: “¡Tachi Ak'õrepa mùmaa ne–inaa k'achia ooipia bù mùa Adonías pee–e pùrã ma iidipida k'aurepa! 24 Tachi Ak'õrépata mù rey papiji mù ak'õre David pari. Mù jua ek'arita eperãarã bùji. Iru k'îrapite mùa juraa bù idiweda Adonías piuit'eeda” aji.
25 Aramata Salomonpa Joyadá warra Benaías pëiji Adonías peede. Mãga ooji. 26 Ma awara p'aare Abiatarmaa rey Salomonpa mãgaji: “¡Wåji, pùchi p'uuru Anatotdee! Mùa pù peepiipia bù. Mamîda mãga oo–e pait'ee pùa Tachi Ak'õre baaltek'a bù ateepachi perã mù ak'õre David naa mãik'aapa pù auk'a nepùrade nipapachi perã iru ome.” 27 Mãgá Salomonpa Abiatar p'aare mimiadeepa jëreji. Mãga ook'ãri, uchiaji Tachi Ak'õrepa jaradak'a Siló p'uurude, mama jarak'ãri Elideepa uchiadap'edaarã p'aareerã waa p'anada–e pait'ee.
28 Joab Absalón ome t'îu–e paji mîda, t'îuji Adonías eere. Maperã ichia ûrik'ãri Salomonpa ooda Adonías ome mãik'aapa Abiatar ome, Joab jirabodoji Tachi Ak'õre ome unupata tedee altar k'âdepema cachok'a bee jitade, Salomonpa iru chupùria k'awaamerã. 29 Mamîda mãga jaradak'ãri rey Salomonmaa, chupùria k'awa–e paji. Ma k'ãyaara Joyadá warra Benaías mamaa pëiji Joab peede. 30 Benaías Tachi Ak'õre ome unupata tede panak'ãri, mãgaji Joabmaa:
—Reypa jara bùda aji, pù uchiamerã namãik'aapa.
Mamîda Joabpa p'anauji:
—Mãga–eda aji. Nãpai piuit'eeda aji.
—Ichia k'inia bùk'a óoji. Mama peet'áaji, k'îra jõ–eepa irua **eperãarã ne–inaa k'achia irumaa ooda–e padap'edaarã* peeda perã. Iru ùadapáde aji, irua k'achia ooda mù ak'õre k'aurepa wa mù k'aurepa anaadamerã. 32 Tachi Ak'õrepa iru piupiit'ee irua k'achia ooda k'aurepa, mù ak'õre ãpùte eperãarã omé ichi k'ãyaara pipùara beerã peeda perã loweropa. Mãgá peeji Israeldepema soldaorã poro waibùa, Ner warra, Abner mãik'aapa Judadeepa uchiadap'edaarã soldaorã poro waibùa, Jéter warra, Amasá. 33 Ãra piuda ichita Joab k'aurepa, ichideepa uchiadap'edaarã k'aurepa pait'ee. Jõdee David, ichideepa uchiadap'edaarã reyrã paara ichita k'ãiwee p'anapataadait'ee Tachi Ak'õre k'îrapite.
34 Maap'eda Benaías wãji Joab peede. Joab ùajida ichi te k'ait'a, eujã pania wêe bùde. 35 Ma t'êepai rey Salomonpa Benaías bùji soldaorã poro waibùa Joab pari. Jõdee p'aare Sadoc bùji Abiatar pari. 36 Maap'eda Salomonpa ma eperã chi Davidmaa ik'achia jaradapa, Simei, t'ù pëip'eda, mãgaji:
—Nama Jerusalén p'uurude te óoji pù aùde bapariimerã. Ãyaa wãnáaji. 37 Pù Cedrón to chak'e sîaru pùrã ãyaa wãit'ee, ma ewateweda piuyada aji, pùchi k'aurepa.
38 Simipa reymaa p'anauji:
—Pia bùda aji. Pùa jara bùk'a ooit'eeda aji.
Te oop'eda, Simí Jerusalende taarã bapachi. 39 Mamîda año õpee wãyaap'eda, ichi esclavoorã omé jirabodojida p'ananadait'ee Gatdepema eperã Macá warra Aquis ome. Simipa k'awaa atak'ãri chi esclavoorã Gat p'uurude p'anù, 40 wãji ichi burrode ãra atade. Aquimaa panap'eda mãik'aapa chi esclavoorã atap'eda, ãpùtee cheji Jerusalendee. 41 Mamîda Salomonpa k'awaa ataji iru wãda Jerusalendeepa Gatdee. 42 K'awaak'ãri iru ãpùtee cheru, nãga jara pëiji:
—¿Tachi Ak'õre k'îrapite mùa jara–e pajik'ã aji, pù piuit'ee Jerusalendeepa uchiaru pùrã? ¿Mùa mãgak'ãri, pùa pia bùda a–e pajik'ã? 43 ¿Sãap'eda oo–e pajima mùa jaradak'a? 44 Pùa k'awa bù ne–inaa k'achia ooda mù ak'õre Davidmaa. Maperã ârá Tachi Ak'õrepa pùmaa ne–inaa k'achia ooit'ee. 45 Mamîda irua pia ooit'eeda aji, rey Salomonmaa, Daviddeepa uchiadait'eerã ichita reyrã padait'ee perã Tachi Ak'õre k'îrapite.
46 Maap'eda reypa Joyadá warra Benaías pëiji Simei peede. Mãgá Salomonpa ichi k'îra unuamaa iru p'anapatap'edaarã jõpiji.