Kalaam kidib fi l-zaman al-akhiir
4
Wa be kalaam waadih,
al-Ruuh al-Khudduus yuguul kadar fi l-zaman al-akhiir naas waahidiin yamurgu min derib al-iimaan.
Wa yitaabuʼu derib al-chawaatiin al-yiwadduruuhum wa yasmaʼo taʼliim cheetaani.
2 Wa l-naas al-yichattutu al-taʼliim dool munaafikhiin wa kaddaabiin guluubhum maytiin.
3 Yadharo al-naas min al-akhiide wa yiharrumu le l-naas achya waahidiin min al-akil.
Wa laakin al-akil da,
Allah khalagah achaan al-naas al-muʼminiin wa yaʼarfu al-hagg yakhbalooh be chukur.
4 Aywa,
kulla cheyy al-Allah khalagah sameh wa ma fi cheyy makruuh kan naakuluuh be chukur.
5 Achaan al-akil yabga taahir be kalaam Allah wa duʼa hana l-chukur.
Abga khaddaam adiil le l-Masiih
6 Kan tiʼallim al-akhwaan al-wasaaya dool,
tabga khaddaam adiil le l-Masiih Isa.
Wa kalaam al-iimaan wa l-taʼliim al-adiil al-titaabiʼah da,
yabga leek misil akil al-yantiik gudra.
7 Angariʼ marra waahid min al-gisas al-baatliin wa l-kalaam al-misil kalaam al-ajaayiz al-kharfaanaat.
Darrib nafsak achaan tabga naadum takhi.
8 Sahiih,
al-riyaada indaha faayde laakin al-takhwa faayditha ziyaada min kulla cheyy wa nalgo minha,
fi l-dunya wa fi l-aakhira,
al-haya al-Allah waaʼadaana beeha.
9 Al-kalaam da hagg wa waajib kulla l-naas yisaddukhu beyah.
10 Wa fi sabab al-waʼad da,
natʼabo wa nijaahudu.
Khatteena achamna saabit foog Allah al-Hayy al-hu bas Munajji hana kulla l-naas khaassatan al-muʼminiin.
Buulus chajjaʼ Timuutaawus
11 Aamurhum le l-naas achaan yitaabuʼu al-kalaam da wa allimhum leyah.
12 Ma tikhalli naadum yahgirak be sabab umrak al-sakhayyar.
Sawwi nafsak masal le l-muʼminiin fi kalaamak wa haalak.
Khalli yichiifu foogak al-mahabba wa l-iimaan wa l-tihaara.
13 Lahaddi najiik,
ankarib fi giraayit Kitaab Allah le l-naas wa ma tikhalli minnak al-bachchiriin wa l-allimiin.
14 Khutt baalak fi l-baraka al-Allah antaaha leek be l-kalaam al-naazil min Allah wakit jamaaʼat al-chuyuukh khatto iideenhum foogak.
15 Ankarib foog al-waajbaat dool wa jaahid fi chaanhum achaan kulla l-naas yichiifu najaahak.
16 Khutt baalak fi nafsak wa fi taʼliimak le l-naas.
Ankarib foogah wa be misil da,
tinajji nafsak wa tinajji al-naas al-yasmaʼo kalaamak.