Wasaaya fi l-adab
5
Ma tikichch le ayyi chaayib laakin hajji leyah be adab misil hu abuuk.
Wa hajji le l-subyaan misil humman akhwaanak.
2 Wa hajji le kulli ajuuz misil hi ammak wa hajji le kulli bineeye be niiye taahire marra waahid misil hi akhtak.
Al-awiin al-rujaalhin maytiin
3 Al-awiin al-rujaalhin maytiin waajib tikarrimhin kan sahiih ma indihin naadum al-yifakkir fooghin.
4 Kan ayyi mara al-raajilha mayyit indaha iyaal walla iyaal iyaalha,
khalli yaʼarfu kikkeef yabgo takhiyiin maʼa naas beethum wa yantu le waaldeenhum huguughum misil Allah yarda beyah.
5 Laakin al-mara al-raajilha mayyit wa ma yifaddil leeha naadum al-yifakkir foogha,
hi tukhutt achamha saabit foog Allah wa tinkarib fi duʼaaha wa salaawaatha,
leel wa nahaar.
6 Wa laakin al-mara al-raajilha mayyit al-tiriid halaat al-dunya bas,
kan hi lissaaʼ hayye kula,
hi mayte.
7 Aamurhum le jamaaʼat al-muʼminiin be l-wasaaya dool achaan yabgo naas ma induhum eeb.
8 Wa ayyi naadum al-yaaba ma yirayyis ahalah wa khaassatan naas beetah,
hu nakar al-iimaan khalaas.
Naadum kaafir akheer minnah.
9 Ma tisajjil ayyi mara al-raajilha mayyit fi Majmuuʼat al-Araamil* illa kan umurha sittiin sana walla ziyaada wa abadan ma khaanat raajilha
10 wa kan hi maʼruufa be l-amal al-saalih.
Waajib tabga mara al-rabbat iyaalha adiil wa kariime le l-diifaan wa sallamat nafisha achaan takhdim le l-naas al-saalihiin wa saaʼadat al-taʼbaaniin wa misil da hi ankarabat fi kulla amal al-kheer.
11 Aaba ma tisajjil fi Majmuuʼat al-Araamil ayyi mara sabiiye al-raajilha maat achaan wakit chahwaatha yilizzuuha,
hi taaba khidmit al-Masiih wa tidoor taakhud battaan.
12 Wa misil da,
hi tabga khaatiye achaan tikhaalif al-waʼad al-awwal sawwatah maʼaayah.
13 Wa awiin misil deel yabgan kamaan aatilaat wa yugumman yuruukhan min beet le beet.
Wa ma yabgan aatilaat bas laakin yabgan gawwaalaat wa yindassan fi l-cheyy al-ma bukhussihin wa yihajjan be kalaam al-ma bichaabih.
14 Achaan da,
nidoor ayyi mara sabiiye al-raajilha maat taakhud wa talda iyaal wa tirayyis naas beetha wa khalaas ma tanti fursa le naas hana Ibliis achaan yuguulu foogna kalaam cheen.
15 Wa gult al-kalaam da achaan awiin waahdaat maragan min al-derib wa taabaʼan al-Cheetaan.
16 Wa khalaas ayyi muʼmine al-indaha fi ahalha awiin al-rujaalhin maytiin,
khalliiha tisaaʼidhin.
Khalli ma tikallif beehin jamaaʼat al-muʼminiin.
Wa be misil da,
al-muʼminiin yisaaʼudu al-awiin al-sahiih ke ma indihin naadum al-yifakkir fooghin.
Al-chuyuukh
17 Al-chuyuukh al-chaayliin masʼuuliiyit al-kaniisa adiil,
khalli al-akhwaan yihtarumuuhum bilheen wa yantuuhum al-musaaʼada,
khaassatan al-chuyuukh al-munkaribiin fi l-bachchiriin wa l-allimiin.
18 Wa da yiwaafig be l-masal al-maktuub fi l-Kitaab al-buguul <Wakit al-toor gaaʼid yifajjikh leek al-khalla fi l-madagg,
ma tarbut khachmah.
Khalli yaakul>.
Wa be masal taani <Ujrat al-khaddaam al-bakhdim hi waajbe leyah>.
19 Wa kan al-naas yukhuttu tuhma foog ayyi cheekh,
ma takhbal kalaamhum illa kan chuhuud itneen aw talaata yisabbutuuh.
20 Wa kan naadum min al-chuyuukh yaznib,
aharjah giddaam al-jamaaʼa achaan al-aakhariin yakhaafo.
21 Asmaʼ kalaami.
Ana niwassiik giddaam Allah wa l-Masiih Isa wa l-malaaʼika al-mugarrabiin.
Taabiʼ al-wasaaya al-anteethum leek dool wa ma tifannid al-naas wa ma tichiif ayyi naadum akheer min al-aakhariin.
22 Ma tistaʼjal wakit tidoor tidarrij cheekh wa ma tichaarik fi zunuub hana naadum aakhar.
Angariʼ ma titallif haalak al-saalhe.
23 Wa min al-yoom wa giddaam,
ma tachrab almi wiheedah bas.
Ziid leyah khamar chiyya achaan tidaawi batnak min amraadha al-katiiriin.