Jawaabaat al-Rasuul Buulus le Tasaluuniiki
Al-jawaab al-taani
1
Jawaab minni ana Buulus wa akhwaani Siila wa Timuutaawus le ummat al-Masiih al-fi hillit Tasaluuniiki,
chaʼab hana Allah Abuuna wa Rabbina Isa al-Masiih.
2 Aleekum al-salaam wa l-rahma min Allah Abuuna wa Rabbina Isa al-Masiih.
Al-rasuul farhaan min iimaanhum
3 Ya akhwaanna,
waajib nachkuru Allah daayman fi chaanku.
Wa da waajib leena achaan guuwat iimaanku gaaʼide tiziid katiir wa l-mahabba al-kulluku tirraayado beeha gaaʼide tiziid bilheen.
4 Achaan da,
raasna foog wakit nihajju beeku fi ayyi bakaan le naas al-Allah ikhtaaraahum.
Nihajju be kikkeef tasburu wakit al-naas gaaʼidiin yitaʼʼubuuku wa be iimaanku al-saabit fi usut kulla l-suʼuubaat al-tahmalooha.
Adaalat Allah fi l-Hisaab
5 Wa da kulla ke yiwassif kadar Allah yahkim be l-adil.
Wa be l-taʼab da,
Allah yijahhizku achaan tadkhulu fi mamlakatah al-intu gaaʼidiin tatʼabo fi chaanha.
6 Fi adaalat Allah,
akiid hu yitaʼʼib al-naas al-yitaʼʼubuuku.
7 Wa hu yanti al-raaha leeku intu al-gaaʼidiin tatʼabo wa yantiiha leena kula maʼaaku.
Hu yantiiku al-raaha wakit al-Rabb Isa yibiin naazil min al-sama maʼa malaaʼikatah al-gaadriin.
8 Hu yaji be naar amm lahiib haamiye.
Wa hu yiʼazzib al-naas al-ma yidooru yaʼarfu Allah wa ma yitaabuʼu bichaarat Rabbina Isa.
9 Wa l-naas dool yahkim leehum be l-halaak al-abadi wa yifarrighum marra waahid min hadarat al-Rabb wa min gudurtah al-majiide.
10 Wa da yabga wakit hu yaji fi usut chaʼabah al-saalihiin achaan yimajjuduuh.
Fi l-yoom da,
hu yaji fi ust al-naas al-aamano beyah wa kulluhum yikarrumuuh be farha.
Wa intu kula tukuunu maʼaahum achaan wakit jiina leeku,
aamantu be sabab chahaaditna.
Duʼa al-Rasuul
11 Wa achaan da,
nasʼalo leeku Allah daayman achaan hu yijahhizku tamaam le mamlakatah al-naadaaku tadkhulu foogha.
Wa nasʼalooh leeku achaan ayyi niiye al-saalhe al-chiltuuha wa ayyi khidme al-badeetuuha be sabab iimaanku,
Allah yitammimha be gudurtah.
12 Wa misil da,
usum al-Rabb Isa yabga mukarram marra waahid fi usutku wa intu kula tichaaruku fi ikraamah be sabab al-niʼma al-ligiituuha min Allah wa Rabbina Isa al-Masiih.