Jawaabaat al-Rasuul Buulus le Timuutaawus
Mugaddima
Al-hamdulillah, Rabbina yaʼarif al-cheyy al-yiʼaawinna wa nalgo minnah faayde wa chajaaʼa. Wa achaan da, hu antaana fi l-Kitaab kalaam rusulah al-katabooh le waahidiin min talaamiizhum.
Al-Rasuul Buulus katab jawaabaat itneen le tilmiizah Timuutaawus. Wa l-jawaab al-awwal yiwassifna kikkeef waajib ninazzumu al-muʼminiin. Wa indah taʼliim katiir foog muchkilat al-naas al-yichattutu fi l-muʼminiin kalaam al-ma indah faayde. Wa l-jawaab al-taani yiwassif kikkeef al-naadum al-yakhdim le Allah waajib yukhutt baalah fi amalah.
Al-Rasuul Buulus katab al-jawaabaat al-itneen dool be gudrat al-Ruuh al-Khudduus wa be izin Allah. Timuutaawus hu tilmiiz hana al-Rasuul Buulus min wakit tawiil wa saafar katiir maʼaayah wa chaarak fi khidimtah fi hillaal katiiriin. Wa Timuutaawus hu min hille waahide usumha Listara al-gaaʼide fi balad Turkiya. Al-naadum al-awwal ballakh foogha bichaarat al-Masiih, hu al-Rasuul Buulus. Wa l-kalaam da maktuub fi Amal al-Rasuul 14:6-23. Wa fi Listara naas waahidiin aamano be l-Masiih. Wa baʼadeen al-Rasuul gabbal le Listara achaan yichajjiʼ al-akhwaan wa naada Timuutaawus achaan yuruukh maʼaayah wa yakhdim le l-Masiih. Wa l-kalaam da, binlagi fi Amal al-Rasuul 16:1-5. Min al-wakit da, Timuutaawus gaaʼid yiʼaawin Buulus fi kulla khidimtah fi Magiduuniya wa l-Yuunaan wa Afasus wa bakaanaat aakhariin. Wa bigi le Buulus misil wileedah.
Amal al-Rasuul yiʼooriina be khidmit Buulus lahaddi wisil fi madiinat Rooma. Wa fi l-wakit daak, hu masjuun wa gaaʼid yarja fursa le yidaafiʼ le nafsah giddaam sultaan al-Roomaaniyiin. Wa l-hamdulillah, fi l-akhiir talagooh min al-sijin wa da bigi baʼad ma Amal al-Rusul ankatab khalaas. Wa l-Rasuul gamma yuruukh battaan yiballikh bichaarat al-Masiih. Wa fi ruwaakhtah, hu wadda Timuutaawus fi hillit Afasus wa khallaah foogha achaan yiʼallim al-Masiihiyiin al-gaaʼidiin hinaak. Wa Buulus zaatah macha giddaam fi Magiduuniya. Wa wakit wisil fi Magiduuniya, hu katab al-jawaab al-awwal le Timuutaawus achaan yichajjiʼah fi amalah wa yizakkirah be l-wasaaya al-awwal antaahum leyah.
Wa fi l-zaman daak, siyaasit al-Roomaaniyiin khayyarat wa bado yikhaalufu al-Masiihiiya. Al-Rasuul Buulus karabooh battaan wa waddooh makruub fi Rooma. Wa Buulus irif mootah gariib. Wa fi l-bakaan da, hu katab al-jawaab al-taani. Wa fi l-jawaab da, hu wassa Timuutaawus achaan yagood saabit wa ma yakhaaf min al-taʼab. Wa wassaah achaan yaji leyah ajala fi Rooma.
Wa taʼliim al-jawaabaat dool yiwassifna kadar al-muhimm fi derib al-iimaan hi al-mahabba wa l-niiye al-mukhlisa. Wa fi l-jawaab al-taani, al-Rasuul katab al-aayaat al-machhuura fi faaydit al-Kitaab. Al-aayaat dool binlagu fi 3:16-17 wa buguulu <Al-Kitaab kulla ke hu kalaam min Allah wa indah faayde achaan yiʼallim al-hagg wa yiwassif al-naas khataahum wa yigabbilhum fi l-derib al-adiil wa yidarribhum fi l-haal al-saalhe. Wa beyah khaddaam Allah yabga gaadir wa jaahiz achaan yisawwi ayyi amal al-kheer>. Wa nagdaro nuguulu nafs al-kalaam be l-jawaabaat dool kula. Khalli ayyi naadum al-yagri al-jawaabaat dool yasʼal Allah achaan Allah yisabbit kalaamhum fi galbah. Aamiin.