Talab al-Rasuul
3
Wa aakhar cheyy ya akhwaanna,
asʼalo leena Allah achaan kalaam al-Rabb yichattit ajala fi l-naas wa yikarrumuuh misil intu karramtuuh.
2 Wa asʼalo Allah achaan yinajjiina min al-naas al-chariiriin wa l-fasliin.
Akiid ma kulla l-naas yiʼaamunu.
3 Laakin Rabbina hu saadikh wa hu yigawwiiku wa yahfadku min al-Chariir.
4 Wa fi l-cheyy al-bukhussuku intu,
Rabbina antaana damaan wa irifna kadar intu gaaʼidiin titaabuʼu wasaayaana wa ma tikhalluuhum minku.
5 Khalli al-Rabb yukhutt guluubku fi mahabbit Allah wa yantiiku sabur al-Masiih al-gawi.
Wasiiye le l-aatiliin
6 Wa battaan ya akhwaanna,
niwassuuku be usum al-Rabb Isa al-Masiih.
Angarʼu min al-muʼminiin al-daayman aatiliin wa ma yitaabuʼu al-taʼliim al-allamtuuh minnina.
7 Achaan intu zaatku taʼarfu kadar waajib tisawwu misil aniina sawweena.
Wakit aniina gaaʼidiin maʼaaku,
chiftu aniina ma aatiliin.
8 Ma akalna akil hana ayyi naadum saakit.
Tiʼibna wa khadamna be duraaʼna leel wa nahaar achaan ma nikallufu naadum minku.
9 Wa sawweena misil da ma achaan ma indina hagg natlubu minku cheyy,
laakin achaan nabgo leeku masal al-titaabuʼuuh.
10 Wa wakit aniina gaaʼidiin maʼaaku,
wasseenaaku gulna kan naadum ma yidoor yakhdim,
khalli yaaba al-akil kula.
11 Wa simiʼna khabar buguul waahidiin minku abo al-khidme wa gaaʼidiin yindasso fi chuʼuun al-naas.
12 Al-naas al-misil dool natlubu minhum wa naamuruuhum be usum Rabbina Isa al-Masiih achaan yakhdumu be l-salaam wa yaksabo rizighum.
13 Ya akhwaanna,
sawwu daayman al-kheer wa abadan ma taksalo minnah.
14 Ooru kulla l-akhwaan ayyi naadum al-ma yitaabiʼ al-kalaam al-gulnaah fi l-jawaab da,
agtaʼo al-alaakha maʼaayah achaan tiʼayyubuuh.
15 Ma tahsubuuh aduuku laakin hazzuruuh achaan hu akhuuku.
Nihaayat al-jawaab
16 Wa hassaʼ khalli Rabb al-salaam zaatah yantiiku al-salaam fi kulla wakit wa fi kulla cheyy.
Al-Rabb maʼaaku kulluku.
17 Ana Buulus chilt al-galam fi iidi wa gaaʼid naktib al-salaam da.
Di bas al-alaama fi ayyi jawaab al-ana naktibah.
Di bas kitaabti.
18 Aleeku kulluku niʼmat Rabbina Isa al-Masiih.