Jawaabaat al-Rasuul Buulus le Tasaluuniiki
Mugaddima
Al-hamdulillah wa subhaanahu, Allah rassal Isa al-Masiih achaan yinajji kulla al-naas. Wa khidmit al-Masiih ma kammalat. Hu gaaʼid yakhdim fi l-dunya be waasitat khaddaamiinah wa fi l-akhiir, hu yigabbil fi l-ard. Al-taʼliim al-fi l-jawaabaat dool bukhuss al-haal al-waajbe le l-muʼminiin al-yarjo jaytah wa l-sabur al-waajib fi l-taʼab. Wa yihajju fi l-yoom al-akhiir wa jayyit al-Dajjaal wa jayyit al-Masiih al-taaniye wa l-giyaama. Wa fi l-jawaabaat dool, nichiifu mahabbat al-Rasuul Buulus le talaamiizah. Wa da yiwassif leena al-haal al-waajbe le ayyi Masiihi al-indah masʼuuliiye fi akhwaanah.
Al-naas al-awwal ballakho bichaarat al-Masiih fi Tasaluuniiki, humman al-Rasuul Buulus wa akhwaanah Timuutaawus wa Siila. Wa Tasaluuniiki hi hille kabiire fi balad Magiduuniya. Hi gaaʼide lahaddi l-yoom wa haaliiyan hi fi balad al-Yuunaan al-usumha Grèce be faransaawi. Humman ballakho al-bichaara le l-Yahuud talaata usbuuʼ lahaddi al-Yahuud taradoohum min beet al-sala. Wa l-kalaam da gaaʼid fi Amal al-Rusul 17:1-4. Wa baʼad da, ballakho al-bichaara le l-Yuunaaniyiin wa naas katiiriin aamano be Isa al-Masiih. Laakin al-Yahuud al-ma aamano harracho naas al-hille wa sawwo fitna. Wa be da, al-muʼminiin zaathum gammo marago Buulus min al-hille.
Wa wakit Buulus fi madiinat Atiina, hu rassal Timuutaawus battaan fi Tasaluuniiki achaan yalga khabar hana l-muʼminiin. Wa Buulus macha giddaam wa lihig Kuruntus (Amal al-Rusul 18). Wa Timuutaawus gabbal min Tasaluuniiki wa jaab leyah khabar. Gaal kadar naas al-hille gaaʼidiin yitaʼʼubu al-muʼminiin laakin al-muʼminiin gaaʼidiin saabtiin fi iimaanhum. Wa fi l-wakit da bas, Buulus katab leehum be gudrat al-Ruuh al-Khudduus al-jawaab al-awwal achaan yichajjiʼhum wa yiʼallimhum. Wa baʼad wakit chiyya bas ligi minhum radd. Wa khalaas katab leehum al-jawaab al-taani.
Khalli ayyi naadum al-yagri al-jawaabaat dool yasʼal min Allah rahmatah wa niʼmatah achaan yafham al-kalaam al-maktuub fooghum wa yitabbigah adiil. Aamiin.