4
Ya siyaad al-abiid,
sawwu daayman le abiidku al-cheyy al-waajib wa adiil.
Ma tanso kadar intu kula abiid wa siidku hu al-gaaʼid fi l-sama.
Al-sala wa l-bichaara
2 Ya akhwaanna,
inkarubu fi l-sala wa agoodu foogha waaʼiyiin wa asʼalo Allah be chukur.
3 Wa asʼalo Allah leena kula.
Asʼalooh achaan yaftah leena derib le l-bichaara achaan niballukhu al-naas be sirr Allah al-fi l-Masiih.
Wa be sabab al-bichaara di,
ana gaaʼid fi l-sijin.
4 Asʼalo Allah leyi achaan niballikhha le l-naas be kalaam waadih misil Allah bidoorah.
5 Iichu be fikir adiil fi ust al-naas al-ma muʼminiin.
Ayyi fursa al-ligiituuha,
achhado le l-Masiih.
6 Chiilu niiye achaan tihajju daayman be kalaam tayyib wa taaʼim.
Wa misil da,
taʼarfu kikkeef waajib turuddu le ayyi naadum.
Al-khabar wa l-salaam
7 Wa khalaas,
akhuuna Tichiikus yiʼooriiku be khabarna.
Hu akhuuna al-nihibbuuh wa yakhdim maʼaana le Rabbina be niiye mukhlisa.
8 Wa hu yikhabbirku be haalitna wa yichajjiʼku wa be sabab da bas rassaltah leeku.
9 Wa rassalt maʼaayah Alfaayid wa hu akhuuna al-amiin al-niriiduuh wa hu naadum min hillitku.
Al-naaseen dool yiʼooruuku be kulla cheyy al-bigi foogna hini.
10 Akhuuna Aristaarkus al-gaaʼid maʼaayi fi l-sijin yisallimku wa maʼaayah Markhus akhu Barnaaba.
Wa Markhus da,
kan ja leeku,
akurbuuh gawi misil wassooku beyah awwal.
11 Wa Yachuuʼa al-maʼruuf be Yustus yisallimku.
Al-talaata dool bas min al-Yahuud been al-akhwaan al-yakhdumu maʼaayi fi chaan Mamlakat Allah wa humman chajjaʼooni katiir.
12 Wa akhuuna Abfuraas al-hu khaddaam al-Masiih Isa wa min hillitku da,
hu kula yisallimku.
Hu gaaʼid yasʼal Allah daayman leeku be chidde achaan tagoodu saabtiin wa mutaʼakkidiin le muraadat Allah al-kaamile.
13 Wa ana nachhad leyah hu gaaʼid yatʼab katiir fi chaanku wa fi chaan al-akhwaan al-fi hillaal Laawdikiiya wa Hiraabulus.
14 Wa akhuuna Luukha al-daktoor al-nihibbuuh wa akhuuna Diimaas,
humman yisallumuuku.
15 Wa sallumu al-akhwaan al-fi Laawdikiiya wa akhutna Niimfa wa l-jamaaʼa al-yilimmu fi beetha.
16 Wa wakit garo leeku al-jawaab da khalaas,
khalli yagruuh le l-jamaaʼa al-fi Laawdikiiya kula.
Wa l-jawaab al-rassaltah le Laawdikiiya,
khalli yagruuh leeku kula.
17 Wa kallumu le Arkhibba wa guulu leyah «
Khutt baalak achaan titammim al-khidme al-Rabbina antaaha leek ».
18 Wa khalaas,
ana zaati chilt al-galam wa naktib «
Ana Buulus nisallimku ».
Ma tanso kadar ana gaaʼid fi l-sijin wa mujanzar.
Wa aleekum al-niʼma.