Jawaab al-Rasuul Buulus le Filibbi
Mugaddima
Kalaam Allah yiwassifna kadar fi l-dunya di, al-muʼminiin daayman yalgo taʼab. Wa l-jawaab da, al-Rasuul Buulus katabah wakit hu makruub fi l-sijin. Wa katabah le talaamiizah al-gaaʼidiin yatʼabo fi hillit Filibbi. Laakin ma indah chakwa wa la zaʼal. Hu chajjaʼaahum wa gaal khalli yafraho misil hu kula yafrah.
Wa hillit Filibbi gaaʼide fi balad Magiduuniya wa Allah rassal fiiha al-Rasuul Buulus maʼa jamaaʼtah Siila wa Luukha wa Timuutaawus. Wa l-rasuul Buulus ballakh foogha al-bichaara wa naas waahidiin aamano wa bigo kaniisa, maʼanaatah majmuuʼa Masiihiiye. Laakin fi l-wakit daak, tujjaar waahidiin khaalafo Buulus wa harracho kubaaraat al-hille achaan yitaʼʼubuuh taʼab chadiid. Wa kulla l-kalaam da maktuub fi Amal al-Rusul 16.
Al-muʼminiin al-fi hillit Filibbi dool, al-Rasuul Buulus yaʼarifhum tamaam. Wa humman rassalo leyah waahid min akhwaanhum usmah Abfariid achaan yiwaddi leyah khabarhum wa yisaaʼidah fi l-sijin. Wa be da, Buulus simiʼ kadar kubaaraat al-hille gaaʼidiin yitaʼʼubu al-muʼminiin battaan. Wa hu kula simiʼ khabar hana mukhaasama ambeen waahidiin min al-muʼminiin. Wa achaan da, hu katab leehum al-jawaab da be gudrat al-Ruuh al-Khudduus wa rassalah be iid Abfariid. Wa fi l-jawaab da, hu ooraahum kadar Allah yisaaʼidhum fi l-taʼab wa waajib yasburu wa yafraho fi Rabbuhum al-Masiih. Wa allamaahum kadar ayyi muʼmin waajib yitaabiʼ masal hana Isa al-Masiih wa yabga sakhi le akhwaanah wa yabga daluul wa ma yisawwi nafsah aali. Wa ooraahum kikkeef yiʼiichu be l-mahabba wa be l-farah wa be l-salaam.
Al-naadum al-yagri al-jawaab da, khalli yaʼarif salaam Allah al-faayit kulla cheyy. Aamiin.