Jawaab al-Rasuul Buulus le Kuluusi
Mugaddima
Al-hamdulillah, Allah bas siid al-naja wa l-gudra wa l-nuur wa l-baraka. Wa hu rassal Ibnah Isa al-Masiih achaan yinajji al-naas wa yiwaddiihum fi mamlakatah al-majiide.
Wa l-jawaab da, al-Rasuul Buulus katabah le l-muʼminiin al-fi hillit Kuluusi. Al-hille di gaaʼide fi turaab hana Afasus laakin al-Rasuul Buulus abadan ma macha foogha. Al-naadum al-ballakh foogha al-bichaara usmah Abfuraas. Hu simiʼ kalaam Allah min khachum Buulus wa bigi tilmiizah. Wa ballakh al-bichaara fi hillit Kuluusi wa fi l-hillaal al-gaaʼidiin gariib leeha, asaameehum Laawdikiiya wa Hiraabulus. Wa awwal al-naas dool ma irfo cheyy fi kalaam Allah.
Wa fi l-hillaal dool, naas waahidiin dawwaro yikhalbutu kalaam al-Masiih maʼa kalaam falsafithum. Wa humman gaaʼidiin yilimmu fi falsafithum di kalaam kunuushum wa gool al-Yahuud wa kalaam min al-ruʼya al-buguulu bichiifuuha. Buguulu al-naas waajib yaʼabudu al-khuwwaat al-samaawiiye misil al-malaaʼika wa l-junuun. Wa l-naas dool buguulu al-Masiih hu waahid min al-jamaaʼa dool. Wa taʼliim al-naas dool gaaʼid yibarjil al-muʼminiin. Wa achaan da, Abfuraas saafar wa macha le Buulus fi l-sijin be khabar hana Kuluusi. Wa fi l-bakaan da, al-Rasuul katab leehum al-jawaab da be gudrat al-Ruuh al-Khudduus wa zakkaraahum kadar al-Masiih akbar min ayyi cheyy al-Allah khalagah wa barakat Allah kullaha ke tinlagi fi l-Masiih. Wa zakkaraahum battaan be l-haal al-waajbe le l-naas al-dakhalo fi mamlakat al-nuur.
Khalli ayyi naadum al-yagri al-jawaab da yalga al-baraka al-kaamile al-jaat be l-Masiih. Aamiin.