4
Ya akhwaani al-nihibbuku,
ana nagram leeku wa nafrah beeku wa fi chaanku intu narfaʼ raasi foog.
Ya l-mahbuubiin,
agoodu saabtiin foog Rabbina Isa.
2 Ya akhutna Afuudiiya,
ya akhutna Sintikha,
natlub minkan achaan intan tissaalahan ambeenaatkan wa titaabiʼan Rabbina sawa be fikir waahid.
3 Wa inta,
ya rafiigi al-amiin,
natlub minnak inta tisaaʼid al-awiin deel.
Saaʼidhin achaan hinna khadaman maʼaayi fi chaan bichaarat al-Masiih.
Hinna jaahadan sawa maʼa akhuuna Kileemaan wa l-aakhariin al-yakhdumu maʼaayi.
Al-naas dool,
Allah antaahum al-haya al-abadiiye wa sajjal asaameehum fi kitaabah.
Afraho
4 Afraho be Rabbina Isa daayman wa battaan nuguul leeku afraho.
5 Khalli ruuhku tabga tawiile giddaam kulla naadum.
Rabbina Isa gariib.
6 Ma tihimmu le ayyi cheyy laakin fi kulli haal achkuru Allah wa gaddumu leyah talabku be sala wa duʼa.
7 Wa Allah yantiiku salaamah al-gawi al-faayit kulla cheyy al-yafhamooh al-naas.
Wa salaam Allah yahfad guluubku wa afkaarku wa tagoodu saabtiin fi l-Masiih Isa.
Al-fikir al-waajib
8 Ya akhwaani,
diihi aakhir wasiiye al-nantiiha leeku.
Fakkuru fi ayyi cheyy al-sahiih wa ayyi cheyy al-chariif wa ayyi cheyy al-aadil wa ayyi cheyy al-taahir wa ayyi cheyy al-jamiil wa ayyi cheyy al-kariim wa ayyi cheyy al-afdal wa ayyi cheyy al-waajib leyah al-chukur.
Wa kulla cheyy al-misil da bas,
khuttu afkaarku foogah saabtiin.
9 Wa tabbugu daayman kulla cheyy al-allamtuuh minni wa ligiituuh minni,
kan min kalaami al-simiʼtuuh walla min haali al-chiftuuha.
Wa Allah Rabb al-salaam yukuun maʼaaku.
Radyaan fi kulli haal
10 Ana farhaan bilheen wa gaaʼid nachkur Rabbina kadar fi l-akhiir chiltu niiye achaan tisaaʼuduuni battaan.
Be l-sahiih,
awwal kula induku niiye laakin ma induku fursa.
11 Wa ana ma gaaʼid nachki leeku min al-maskana achaan ana allamt kikkeef niʼiich fi ayyi haal.
12 Naʼarif kikkeef niʼiich fi l-maskana wa fi l-khina.
Ana alʼallamt kikkeef nabga radyaan fi kulli bakaan wa fi kulli haal,
kan ana chabʼaan walla jiiʼaan wa kan indi katiir walla chiyya.
13 Wa nagdar nisawwi ayyi cheyy be l-Masiih al-yantiini gudra.
Al-Rasuul chakar al-Filibbiyiin
14 Laakin al-cheyy al-sawweetuuh leyi sameh bilheen.
Intu chaaraktu maʼaayi fi taʼabi.
15 Ya akhwaani al-Filibbiyiin,
intu taʼarfu kadar awwal marra jiit ballakht bichaarat al-Masiih leeku wa futt giddaam min balad Magiduuniya,
intu wiheedku bigiitu muchaarikiin maʼaayi.
Ma fi jamaaʼa aakhara al-awwal anteethum kalaam Allah wa baʼadeen humman antooni musaaʼada.
16 Wakit ana lissaaʼ ma khalleet Magiduuniya wa gaaʼid fi hillit Tasaluuniiki,
intu rassaltu leyi musaaʼada aktar min marra.
17 Gult al-kalaam da,
ma achaan nidoor minku musaaʼada battaan laakin achaan naʼarif kadar ayyi cheyy al-tantuuh fi chaan Rabbina,
hu yakhbalah wa yukhuttah fi khaziinat al-hasanaat wa yibaarikku be sababah.
Wa ana khatteet baali fi l-faayde al-intu talgooha min Allah.
18 Wa kulla cheyy al-ana nidoorah,
ligiitah khalaas wa ziyaada min al-nidoorah.
Akhuuku Abfariid jaab leyi al-musaaʼada al-rassaltuuha wa khalaas ana mabsuut bilheen.
Wa l-atiiye di samhe misil al-dahiiye al-awwal al-naas yantuuha le Allah wa Allah yuguul foogha hi makhbuula wa indaha riihe halwa wa hu yarda beeha.
19 Wa naʼarif kadar kulla cheyy al-tihtaaju leyah,
Allah yarzukhku beyah wa yantiiku min maalah al-majiid be l-Masiih Isa.
20 Wa khalli Allah Abuuna yimajjuduuh daayman wa ila l-abad.
Aamiin.
Nihaayat al-jawaab