Al-tahuura al-sahiihe
3
Wa khalaas,
ya akhwaani,
afraho be Rabbina Isa.
Ma gaasi leyi naktib leeku nafs al-cheyy al-awwal ooreetku beyah wa nikarrirah battaan achaan tagoodu fi l-amaan.
2 Awʼu baalku min al-naas al-buguulu kadar al-ma Yahuud kulaab.
Be l-sahiih humman bas al-kulaab.
Awʼu baalku minhum,
humman yisawwu al-charr.
Yafraho min gattiʼiin jilid al-naas wa nuguul leeku battaan awʼu baalku minhum.
3 Buguulu humman al-mutahhariin laakin aniina bas al-naas al-mutahhariin be l-sahiih,
aniina al-naʼabudu Allah be gudrat al-Ruuh al-Khudduus wa nifaachuru be l-Masiih Isa wa abadan ma nukhuttu achamna fi jilidna.
4 Wa hasab kalaamhum,
ana indi hagg nukhutt achami fi jildi.
Ayyi naadum al-yuguul hu indah hagg yukhutt achamah fi jildah,
ana indi hagg be ziyaada minnah.
5 Ana tahharooni fi l-yoom al-taamin* min yoom waaluudti.
Wa ana mawluud min Bani Israaʼiil wa min gabiilat Banyaamiin.
Ana Ibraani miya fi l-miya.
Wa fi l-cheyy al-bukhuss tabbigiin churuut al-Tawraat,
ana min al-Fariisiiya*.
6 Wa ana bigiit munkarib bilheen fi diini lahaddi haawalt nidammir ummat al-Masiih.
Wa hasab kalaamhum fi churuut al-Tawraat,
ana bigiit naadum saalih wa ma indi eeb.
Irfat al-Masiih akheer min kulla cheyy
7 Laakin kulla cheyy al-awwal jaʼaltah hu indah faayde da,
ana khalleetah minni wa jaʼaltah misil cheyy saakit fi chaan al-Masiih.
8 Aywa,
wa ziyaada min da,
irfat al-Masiih Isa Rabbi bigat leyi akheer min kulla cheyy wa najʼal kulla cheyy aakhar saakit.
Fi chaan al-Masiih,
ana khalleet kulla cheyy al-indi.
Wa kulla cheyy al-awwal indah leyi faayde,
jaʼaltah misil wasakh achaan nalga al-faayde al-kabiire wa hi al-alaakha maʼa l-Masiih.
9 Wa nidoor alaakhti maʼaayah tabga kaamile.
Wa be misil da,
ma najʼal nafsi saalih be tabbigiin churuut al-Tawraat laakin nabga saalih be iimaani be l-Masiih achaan al-derib al-Allah yisawwi beyah al-naas saalihiin,
hu derib al-iimaan.
10 Wa nijaahid achaan naʼarif al-Masiih tamaam wa niʼiich be gudrat buʼaasah wa nichaarik maʼaayah fi taʼabah.
Wa nidoor nabga misil hu bigi fi mootah
11 wa khalaas be ayyi daliil,
nalhag fi l-akhiir buʼaas al-maytiin.
12 Wa ma nuguul tammeet makhsuudi khalaas wa bigiit naadum tamaam.
Laakin ana nijaahid le namlukah achaan al-Masiih Isa mallakaani le namluk al-makhsuud da.
Masal fi haal Buulus
13 Ya akhwaani,
abadan ma nukhutt fi fikri kadar ana malakt al-makhsuud khalaas.
Laakin nisawwi cheyy waahid bas,
nansa al-wara wa nifakkir fi l-giddaam.
14 Wa nijaahid achaan nitammim al-makhsuud wa nalga al-jaaʼiza wa hi al-baraka al-Allah yidoor yantiiha le l-naas al-naadaahum fi majdah be l-Masiih Isa.
15 Wa khalaas,
khalli kullina al-bigiina gawiiyiin fi l-iimaan nitaabuʼu nafs al-fikir.
Wa kan fikirku chig min al-fikir da fi ayyi cheyy,
da kula Allah yiwassifah leeku.
16 Khalli ayyi waahid yiʼiich hasab irfat al-Masiih al-ligiiha wa ma yafchul minha.
17 Ya akhwaani,
khalli kulluku titaabuʼu masali wa chiifu adiil al-naas al-aaychiin misilna wa fakkuru fi haalhum.
18 Wa gult al-kalaam da,
achaan fi naas katiiriin al-ma yidooru kalaam hana saliib al-Masiih misil ooreetku beyah iddat marraat wa battaan niʼooriiku be hizin chadiid wa dumuuʼ.
19 Wa fi l-akhiir yamchu fi l-halaak.
Chahwaathum bigo leehum rabbuhum wa achaan da yitaabuʼu chahwaathum bas.
Al-cheyy al-yiʼayyibhum,
da bas al-yifaachuru beyah.
Wa uguulhum saabtiin foog khumaam al-dunya bas.
20 Laakin jinsiiyitna aniina,
hi al-jinsiiya al-samaawiiye.
Wa aniina narjo Munajjiina al-yaji min al-sama wa khaattiin baalna fi jaytah wa hu Rabbina Isa al-Masiih.
21 Wa be gudurtah al-aziime al-yukhutt beeha kulla cheyy tihit hukmah,
hu yaji yikhayyir jisimna al-daʼiif wa yajʼalah misil jismah al-majiid.