Khalli ayyi waahid yabga daluul
2
Hal ligiitu chajaaʼa be alaakhitku maʼa l-Masiih ?
Wa mahabbitah raggadat guluubku walla ?
Hal chaaraktu sawa fi gudrat al-Ruuh al-Khudduus ?
Wa ligiitu min al-Masiih mahanna katiire walla ?
2 Da kulla ke ligiituuh wa ana farhaan beyah.
Wa hassaʼ abgo waahid fi fikirku wa misil da tiziidu farhati bilheen.
Wa arraayado ambeenaatku be mahabba waahide.
Wa istafugu ambeenaatku marra waahid wa khalli kulluku tifakkuru nafs al-cheyy.
3 Wa ma tisawwu ayyi cheyy min al-husud wa la min al-istikbaar.
Khalli ayyi waahid yabga daluul wa yajʼal akhwaanah akheer min nafsah.
4 Khalli ayyi waahid yukhutt baalah fi l-cheyy al-yijiib faayde le l-aakhariin wa ma fi l-cheyy al-yijiib faayde leyah hu wiheedah bas.
Masal fi haal al-Masiih
5 Al-fikra al-intu waajib titaabuʼuuha,
hi nafs al-fikra al-Isa al-Masiih taabaʼaaha.
6 Awwal hu Allah laakin ma dawwar yamsuk le nafsah gudurtah al-rabbaaniiye.
7 Be l-aks,
hu maskan nafsah marra waahid wa sawwa nafsah misil abid wa khassad yaldooh wa yabga bachar.
8 Wa wakit bigi naadum,
hu sallam nafsah wa taabaʼ kalaam Allah lahaddi l-moot.
Wa khassad yumuut wa maat moot cheen fi l-saliib.
9 Wa achaan da,
Allah rafaʼah foog aali marra waahid wa sawwa usmah aali min kulla l-asaame
10 lahaddi ayyi waahid yikarrim usum Isa fi l-sama wa fi l-ard wa tihit al-ard wa yarkaʼ giddaamah.
11 Wa kulla waahid yachhad yuguul Isa al-Masiih hu al-Rabb wa yimajjid Allah Abuuh.
Abgo nuur fi ust al-naas
12 Fi chaan kulla l-kalaam da,
ya akhwaani al-nihibbuku,
asmaʼo kalaami.
Wakit ana maʼaaku,
intu daayman titaabuʼu kalaam Allah.
Wa hassaʼ ana ma maʼaaku wa waajib titaabuʼuuh be ziyaada.
Jaahudu le tisawwu kulla cheyy al-waajib le l-naas al-Allah najjaahum.
Chiilu derib al-takhwa wa akhaafo min Allah khoof chadiid.
13 Achaan Allah hu al-gaaʼid yisawwi amalah foogku wa hu yantiiku al-niiye wa l-gudra le tisawwu al-cheyy al-adiil al-yarda beyah.
14 Fi kulla cheyy ma tachku wa la tihaaruju ambeenaatku.
15 Wa misil da,
tabgo naas bala khata wa bariʼiin wa tiʼiichu misil iyaal Allah bala eeb fi usut naas al-zaman al-haali al-humman uuj wa faaskhiin.
Wa tabgo fi usuthum nuur misil al-nujuum fi l-aalam al-adlam
16 achaan intu munkaribiin fi kalaam al-haya.
Wa kan tabgo misil da,
nagdar narfaʼ raasi foog fi yoom jayyit al-Masiih.
Wa naʼarif juhudi wa l-khidme al-khadamtaha leyah ma fachalat.
17 Wa kan iimaanku bigi taahir misil al-dahiiye al-naas awwal yantuuha le Allah fi ibaadithum,
wa kan damm hana mooti yabga misil al-charaab al-yusubbuuh foogha le yitammumu gaddimiin al-dahiiye,
khalaas ana farhaan wa nafrah maʼaaku kulluku.
18 Wa waajib intu kula tabgo farhaaniin wa tafraho maʼaayi.
Haal Timuutaawus
19 Wa baʼad chiyya,
nitmanna achaan nirassil leeku Timuutaawus kan di muraadat Rabbina Isa.
Nidoor nirassilah achaan hu yichajjiʼni wakit yigabbil yijiib leyi khabarku.
20 Ma fi naadum aakhar al-yihimm beeku misli ana illa hu bas.
Yihimm beeku be niiye mukhlisa.
21 Kulla l-aakhariin yukhuttu baalhum fi l-cheyy al-yijiib faayde leehum humman wa ma fi l-cheyy al-yijiib faayde le Isa al-Masiih.
22 Laakin akiid intu taʼarfu kikkeef Timuutaawus wassaf sabaatah.
Min wakit tawiil,
hu gaaʼid yakhdim maʼaayi fi ballikhiin bichaarat al-Masiih misil wileed al-yakhdim maʼa abuuh.
23 Achaan da,
wakit naʼarif chunu yabga leyi hini,
nirassilah leeku tawwaali.
24 Wa indi acham foog Rabbina kadar baʼad wakit chiyya bas,
ana zaati namchi leeku.
Haal Abfariid
25 Wa fi fikri ana,
waajib leyi nirassil leeku akhuui Abfariid al-gaaʼid yakhdim maʼaayi wa nijaahudu sawa.
Sahiih,
intu bas rassaltuuh leyi achaan fi taʼabi hu yisaaʼidni.
26 Laakin hu gaaʼid yagram leeku kulluku wa bigi leyah gaasi achaan intu simiʼtu khabar hana maradah.
27 Wa be l-sahiih,
awwal hu mardaan bilheen wa gariib yumuut.
Laakin Allah hanna foogah wa ma foogah hu wiheedah,
laakin foogi ana kula achaan ma yiziid le huzni hizin aakhar battaan.
28 Wa chilt niiye nirassilah leeku ajala achaan be jaytah intu tafraho battaan wa ana kamaan galbi yargud.
29 Wa khalaas,
akurbuuh be usum al-Rabb be farha kabiire.
Wa nuguul leeku waajib tikarrumu be ziyaada kulla naadum mislah hu.
30 Awwal hu gariib yumuut fi chaan khidimtah le l-Masiih wa andassa fi khutuura chadiide achaan yitammim khidmitku leyi.