Jawaab al-Rasuul Buulus le Filibbi
1
Jawaab minni ana Buulus wa Timuutaawus,
abiid Isa al-Masiih,
leeku intu jamaaʼat al-naas al-bigiitu saalihiin be Isa al-Masiih al-fi hillit Filibbi maʼa masaaʼiilku wa muʼaawiniinhum.
2 Aleekum al-salaam wa l-rahma min Allah Abuuna wa Rabbina Isa al-Masiih.
Duʼa al-Rasuul wa chukrah
3 Fi ayyi wakit kan fakkart fiiku,
nachkur Allah Rabbi.
4 Wa ayyi wakit nadʼi Allah,
nasʼalah leeku kulluku be farah.
5 Ana farhaan minku achaan intu chaaraktu maʼaayi fi ballikhiin bichaarat al-Masiih min awwal wakit ana jiit leeku lahaddi l-yoom.
6 Allah bada khidimtah al-adiile foogku wa ana muʼakkid kadar hu yisawwiiha daayman lahaddi yitammimha fi yoom jayyit al-Masiih Isa.
7 Wa waajib leyi nihiss beeku kulluku misil da achaan galbi daayman maʼaaku.
Wa nihibbuku achaan intu kulluku muchaarikiin maʼaayi fi niʼmat Allah.
Wa intu daayman muchaarikiin maʼaayi wakit ana gaaʼid marbuut fi l-sijin wa wakit ana gaaʼid nidaafiʼ le bichaarat al-Masiih wa nisabbitha le l-naas.
8 Wa Allah yachhad leyi,
ana garmaan leeku kulluku bilheen be mahabbat al-Masiih Isa.
9 Wa ana gaaʼid nasʼal Allah achaan hu yiziid mahabbitku wa yikattirha bilheen.
Wa khalli yantiiku maʼaaha ilim wa fihim tamaam
10 achaan taʼarfu kikkeef timayyuzu daayman al-cheyy al-afdal.
Wa khalli tiʼiichu be niiye mukhlisa wa bala eeb wa tabgo jaahiziin le l-yoom al-Masiih yaji foogah.
11 Wa khalli tabgo saalihiin wa malaaniin be l-kheer al-jaayi min Isa al-Masiih.
Wa l-hamdu wa l-chukur le Allah.
Ballikhiin al-bichaara le l-naas
12 Ya akhwaani,
nidoor intu taʼarfu kadar al-taʼab al-lihigaani hini ma waggaf chattitiin bichaarat al-Masiih fi l-naas.
Be l-aks,
hi chattatat be ziyaada.
13 Bigi waadih le kulla askar hana hurraas beet al-sultaan wa le kulla l-naas al-aakhariin kadar ana masjuun fi chaan ana abd al-Masiih.
14 Wa fi l-sijin,
ana bigiit masal le l-akhwaan al-fi l-hille di.
Wa katiiriin minhum achamhum foog Rabbina bigi gawi be ziyaada.
Wa ligo chajaaʼa lahaddi gammo yihajju be kalaam Allah bala khoof.
15 Sahiih,
waahidiin minhum yibachchuru be l-Masiih achaan hasadooni wa khaasamooni laakin al-aakhariin yibachchuru be niiye adiile.
16 Al-akhwaan dool yibachchuru achaan yihibbuuni wa yaʼarfu Allah jaabaani hini achaan nidaafiʼ le l-bichaara.
17 Wa laakin al-aakhariin al-hasuudiin dool gaaʼidiin yiballukhu be l-Masiih be niiye ma mukhlisa.
Yidooru yukhuttu nufuushum giddaam.
Wa fi fikirhum,
ballikhiinhum yabga leyi gaasi wakit ana marbuut fi l-sijin.
18 Wa leyi ana,
da ma bisawwi cheyy.
Be ayyi daliil,
kan be niiye fasle walla be niiye adiile,
al-akhwaan gaaʼidiin yiballukhu kalaam al-Masiih wa achaan da ana farhaan.
Aywa,
wa battaan kula nafrah
19 achaan naʼarif kadar <Natiijat kulla l-kalaam da,
hi Allah yinajjiini>.
Wa akiid,
Allah yinajjiini achaan intu gaaʼidiin tasʼalooh leyi wa Ruuh hana Isa al-Masiih yiʼaawinni.
Haalat al-Rasuul al-gaasiye
20 Wa nitmanna be niiye waahide wa be acham gawi kadar ma nafchul fi ayyi cheyy.
Wa nidoor nikallim misil daayman kallamt be chajaaʼa wa bala khoof wa nikarrim al-Masiih giddaam al-naas fi ayyi cheyy al-nisawwiih,
kan niʼiich walla numuut.
21 Achaan leyi ana,
al-haya ma indaha faayde illa maʼa l-Masiih.
Wa kan numuut da,
nalga faayde be ziyaada.
22 Wa kan Allah yidoor ana lissaaʼ ma nifaarig al-dunya da,
nakhdim khidme samhe le l-Masiih.
Laakin min al-haya wa l-moot ma naʼarif min al-itneen dool nichiil weenu.
23 Indi niiye itneen al-yiddaawaso foogi.
Nidoor nifaarig al-dunya wa nagood maʼa l-Masiih achaan da bas al-afdal.
24 Wa laakin waajib be ziyaada ma nifaarig al-dunya achaan hayaati indaha faayde leeku.
25 Wa bigi leyi waadih kan ma numuut yabga leeku akheer.
Wa achaan da,
naʼarif kadar nagood hayy maʼaaku sawa achaan intu tabgo gawiiyiin wa farhaaniin fi l-iimaan be ziyaada.
26 Wa be misil da,
wakit nigabbil leeku,
intu tifaachuru be l-Masiih be ziyaada be sababi ana.
Al-haal al-waajbe fi l-taʼab
27 Laakin khalli tiʼiichu be l-haal al-muwaafge le bichaarat al-Masiih.
Wa misil da,
kan naji nichiifku walla kan ana baʼiid minku kula,
nasmaʼ kalaam fiiku al-yuguul intu saabtiin be niiye waahide wa fikir waahid wa intu gaaʼidiin tijaahudu sawa fi chaan al-iimaan al-ligiituuh min bichaarat al-Masiih.
28 Ma tikhallu al-khoof yisawwiiku be sabab ayyi khidme al-yisawwuuha al-naas al-yikhaalufuuku.
Wa da yabga leehum alaama al-tiwassif kadar humman fi derib al-halaak wa intu fi derib al-naja.
Wa l-yinajjiiku,
hu Allah.
29 Achaan Allah antaaku baraka wa be l-baraka di intu ma tiʼaamunu be l-Masiih bas laakin tatʼabo fi chaanah kula.
30 Wa khalaas intu gaaʼidiin tichaaruku fi nafs al-jihaad al-ana nijaahidah.
Wa jihaadi da,
intu chiftuuh awwal wakit ana maʼaaku wa hassaʼ kula simiʼtu khabar ana gaaʼid nijaahid misil da battaan.