Jawaab al-Rasuul Buulus le Kuluusi
1
Jawaab minni ana Buulus Rasuul Isa al-Masiih be izin Allah wa daahu naktib maʼa akhuuna Timuutaawus
2 leeku intu akhwaanna fi l-Masiih al-saalihiin wa saadikhiin al-saakniin fi hillit Kuluusi.
Aleekum al-salaam wa l-rahma min Allah Abuuna.
Chukur wa duʼa hana Buulus
3 Nachkuru Allah abu Rabbina Isa al-Masiih fi ayyi wakit nasʼalooh leeku
4 achaan simiʼna iimaanku fi l-Masiih Isa gawi wa tihibbu kulla l-saalihiin.
5 Wa intu saabtiin fi iimaanku wa mahabbitku achaan intu gaaʼidiin tarjo be acham al-baraka al-Allah hafadaaha leeku fi l-sama.
Wa simiʼtu beeha fi kalaam al-hagg wa hu bichaarat al-Masiih al-ballakhooha leeku min awwal.
6 Wa bichaarat al-Masiih lihigatku wa simiʼtuuha wa fihimtu beeha niʼmat Allah.
Wa min yoom karabtuuha be l-sahiih da,
al-bichaara gaaʼide tijiib al-kheer ambeenaatku misil hi gaaʼide tiziid wa tijiib al-kheer fi kulla l-dunya.
7 Wa intu simiʼtu bichaarat al-Masiih be khachum habiibna Abfuraas al-hu abid le l-Masiih misilna.
Hu gaaʼid yakhdim le l-Masiih be niiye mukhlisa wa yimassilna fi usutku.
8 Wa hu ooraana be l-mahabba al-ligiituuha min al-Ruuh al-Khudduus.
9 Wa achaan da,
min yoom simiʼna khabar iimaanku,
aniina gaaʼidiin nasʼalo leeku Allah.
Wa nasʼalo leeku Allah achaan taʼarfu muraadaatah wa talgo fihim wa fikir adiil fi kulla cheyy min al-Ruuh al-Khudduus.
10 Wa misil da,
taʼarfu kikkeef tiʼiichu be l-haal al-waajbe le naas al-Rabb wa tisawwu daayman al-cheyy al-hu yarda beyah wa tanjaho fi kulla khidmit al-kheer wa taʼarfu Allah be ziyaada.
11 Wa fi kulli haal,
khalli Allah yigawwiiku be gudurtah al-majiide achaan tahmalo al-taʼab wa tasburu foogah be farah
12 wa tachkuru daayman Allah Abuuku al-jaʼalaaku jaahiziin le tichaaruku fi warasat al-saalihiin fi mamlakat al-nuur.
13 Aywa,
Allah najjaana wa maragaana min muluk al-dalaam wa waddaana fi mamlakat Ibnah al-yiriidah
14 al-fadaana wa jaab leena al-khufraan.
Kuburiiyit al-Masiih
15 Al-Masiih hu suurat Allah al-ma binchaaf.
Hu Ibn Allah al-mukallaf fi kulla cheyy al-Allah khalagah.
16 Achaan beyah hu,
Allah khalag kulla cheyy al-fi l-samaawaat wa fi l-ard,
al-binchaaf wa l-ma binchaaf,
wa ayyi makhluug al-indah arch walla muluk,
wa kan hu haakim walla kabiir.
Allah khalag kulla cheyy be waasitat Ibnah wa fi chaanah.
17 Ibn Allah hu gubbaal kulla cheyy wa be gudurtah kulla cheyy gaaʼid fi bakaanah.
18 Hu bas raas al-jisim wa l-jisim hu ummat al-Masiih.
Wa hu al-bidaaya wa awwal naadum al-baʼas min ust al-maytiin.
Wa Allah sawwa misil da achaan Ibnah yabga al-awwal fi kulla cheyy.
19 Wa l-Masiih hu misil da achaan Allah radyaan kadar kulla sifaatah yagoodu foogah.
20 Wa be waasitat al-Masiih,
Allah khassad yiʼaddil kulla cheyy fi l-ard wa l-samaawaat.
Hu sawwa al-suluh be damm Ibnah wakit hu maat fi l-saliib.
21 Wa fi l-wakit al-faat,
intu ma induku alaakha maʼa Allah wa afkaarku diddah wa gaaʼidiin tisawwu al-fasaala.
22 Wa laakin hassaʼ Allah sawwa suluh beenah wa beenku be waasitat Ibnah al-ja be jisim insaani.
Wa Ibnah maat fi chaanku le yisawwiiku chaʼab Allah al-saalihiin bala eeb achaan yigaddimku leyah.
23 Wa da kula yabga leeku kan tagoodu saabtiin wa gawiiyiin fi l-iimaan wa ma khalleetu achamku al-awwal ligiituuh wakit simiʼtu bichaarat al-Masiih.
Wa l-bichaara di ballakhooha le kulla makhluug fi l-ard wa ana Buulus bigiit khaddaamah achaan niballikh al-bichaara le l-naas.
Khidmit al-Rasuul Buulus
24 Wa ana farhaan be taʼabi achaan ana gaaʼid natʼab fi chaanku.
Wa fi jismi nahmal kulla l-taʼab al-yigassir le l-Masiih fi chaan ummatah* al-hi jismah.
25 Ana bigiit khaddaam le ummat al-Masiih achaan Allah kallafaani be l-khidme di wa nakhdim fi chaanku.
Wa khidimti hi niballikh kalaam Allah al-kaamil.
26 Wa niballikh al-sirr al-Allah abadan ma bayyanah le naas hana ayyi zaman al-faat wa laakin hassaʼ hu bayyanah le naasah al-saalihiin.
27 Wa Allah chaal niiye achaan yiʼooriihum kadar al-sirr da yijiib baraka kabiire wa majiide bilheen le kulla l-umam.
Wa sirr Allah hu al-Masiih zaatah yagood fiiku wa da yantiiku acham tadkhulu fi majdah.