Wasaaya le l-iyaal wa waaldeenhum
6
Asmaʼo ya al-iyaal,
al-Rabb yidoor intu tasmaʼo kalaam waaldeenku.
Da bas al-waajib tisawwuuh.
2 Maktuub fi l-Kitaab <Karrim ammak wa abuuk>.
Wa min al-wasaaya,
di bas awwal wasiiye al-indaha waʼad.
3 Wa l-waʼad hu <achaan talga al-kheer wa umrak yabga tawiil fi l-ard>.
4 Wa asmaʼo ya abbahaat al-iyaal,
ma tizaʼʼulu iyaalku laakin rabbuuhum fi l-adab wa taʼliim al-Rabb.
Wasaaya le l-abiid wa siyaadhum
5 Asmaʼo ya l-abiid,
taabuʼu kalaam al-naas al-fi l-dunya di bigo siyaadku.
Karrumuuhum be ihtiraam tamaam.
Akhdumu leehum be niiye waahide misil intu gaaʼidiin takhdumu le l-Masiih.
6 Akhdumu leehum ma fi chaan humman gaaʼidiin yichiifuuku bas.
Ma tukhuttu baalku fi chukur al-naas.
Laakin khuttu fi fikirku intu abiid le l-Masiih wa sawwu muraadat Allah be niiye mukhlisa.
7 Akhdumu leehum be farah misil khidmitku hi le Rabbina wa ma le l-naas bas.
8 Khalli taʼarfu kadar ayyi naadum minnina yalga ajur min al-Rabb ale hasab al-kheer al-hu sawwaah,
kan hu abid walla hurr.
9 Wa asmaʼo ya siyaad al-abiid,
tabbugu nafs al-taʼliim.
Wa ma tihaddudu abiidku.
Ma tanso kadar intu wa abiidku kulluku abiid hana siid waahid wa hu al-gaaʼid fi l-samaawaat wa hu ma yifannid al-naas.
Silaah Allah al-kaamil
10 Wa aakhir cheyy,
abgo gawiiyiin fi alaakhitku maʼa l-Rabb wa be gudurtah al-aziime.
11 Albaso silaah Allah al-kaamil achaan tagoodu beyah saabtiin wa najaadat Ibliis ma tinnasir foogku.
12 Aniina ma nihaarubu adu min al-naas.
Laakin fi l-zamaan al-haadir da,
al-dunya gaaʼide fi l-dalaam wa fiyah chawaatiin al-gaaʼidiin yamlukuuha.
Wa aniina gaaʼidiin nihaarubu hukkaam wa kubaaraat al-chawaatiin dool al-humman askar Ibliis al-gaaʼidiin fi l-samaawaat.
13 Achaan da bas,
albaso silaah Allah al-kaamil achaan tagoodu saabtiin wakit Ibliis yahjimku.
Wa baʼad kulla l-duwaas yikammil,
tagoodu saabtiin battaan.
14 Achaan da,
agoodu saabtiin,
sulubku marbuut be l-hagg.
Khalli al-haal al-saalhe tabga leeku diriʼ* gawi fi sadurku.
15 Abgo daayman chajiiʼiin le tiballukhu bichaarat al-salaam wa da yabga leeku misil maraakiib adiiliin fi rijileenku.
16 Wa ziidu le l-silaah da al-iimaan wa khalli yabga leeku daraga.
Ibliis al-chariir yidoor yizarrigku be nachaachiibah al-induhum fi raashum naar wa be l-iimaan taktulu al-niiraan dool.
17 Wa khalli al-naja tabga leeku taagiiye hana l-harb.
Wa akurbu gawi kalaam Allah al-hu seef hana l-Ruuh al-Khudduus.
18 Wa khallu al-Ruuh al-Khudduus yuguudku fi salaawaatku wa asʼalo Allah fi kulla wakit be kulla anwaaʼ hana duʼa wa talab.
Wa misil da,
agoodu waaʼiyiin wa inkarubu fi salaawaatku wa asʼalo Allah le kulla l-saalihiin.
19 Wa asʼalo Allah leyi ana zaati achaan ayyi wakit al-nidoor nihajji be kalaam Allah hu yantiini al-kalaam al-waajib.
Nidoor nihajji bala khoof wa nifassir le l-naas sirr Allah al-bayyanah fi bichaarat al-Masiih.
20 Wa fi chaan al-bichaara,
ana bigiit safiir wa be sababha karabooni fi l-sijin.
Khalli Allah yantiini gudra achaan niballikhha bala khoof wa nikallim misil Allah yidoorah.
Nihaayat al-jawaab
21 Wa khalaas,
akhuuna Tichiikus yiʼooriiku be kulla khabari.
Hu akhuuna wa nihibbuuh.
Wa hu yakhdim le Rabbina be niiye mukhlisa.
22 Wa hu yikhabbirku be haalitna wa yichajjiʼku wa be sabab da bas rassaltah leeku.
23 Wa khalli kulla l-akhwaan yalgo al-salaam wa l-mahabba maʼa l-iimaan min Allah Abuuna wa Rabbina Isa al-Masiih.
24 Wa l-niʼma le kulla l-naas al-yihibbu Rabbina Isa al-Masiih be mahabba al-ma tikammil abadan.