Jawaab al-Rasuul Buulus le Khalaatiya
Mugaddima
Al-hamdulillah be sabab rahmatah al-kabiire, Allah fatah le kulla l-naas derib al-naja be l-Masiih. Wa be l-derib da, Allah yisawwi al-naas saalihiin be sabab iimaanhum wa ma be tabbigiin al-churuut wa l-wasaaya wa l-gawaaniin al-binlagu fi ayyi kitaab.
Wa l-jawaab da, awwal rassalooh le l-Masiihiyiin al-gaaʼidiin fi balad usumha Khalaatiya. Wa hi fi turaab Turkiya al-haaliiyan gaaʼide. Wa l-naas dool aamano be l-Masiih wakit Buulus wa Barnaaba macho fi arbaʼa hillaal fi junuub Khalaatiya wa ballakho fooghum bichaarat al-Masiih. Wa asaame al-hillaal dool Antaakiya-Bisiidiya wa Listara wa Darba wa Iguuniya. Wa l-kalaam da maktuub fi Amal al-Rusul wa yabda fi 13:14 wa yikammil fi 14:23. Wa ballakho leehum be moot al-Masiih fi l-saliib wa buʼaasah min ust al-maytiin. Wa fassaro leehum kadar Allah fatah derib jadiid le kulla l-naas wa kan yiʼaamunu be l-Masiih, Allah yakhbalhum wa yakhfir leehum zunuubhum. Wa naas katiiriin aamano be l-Masiih wa firho farha chadiide.
Laakin wakit Buulus wa Barnaaba khalloohum wa macho giddaam, naas aakhariin jo wa gammo yiʼallumu al-muʼminiin dool. Wa l-naas dool min al-Yahuud al-buguulu humman muʼminiin be l-Masiih laakin kalaamhum ma misil kalaam al-rusul. Humman dawwaro kadar kulla l-muʼminiin yitaabuʼu al-churuut al-Allah antaahum le l-Yahuud be waasitat Muusa. Humman maʼruufiin be Hizib al-Tahuura. Wa gaalo kan naadum ma yitahhuruuh hasab tahuurat Muusa, al-naadum da abadan ma yanja. Wa battaan gaalo fi l-sahiih da, Buulus ma rasuul achaan hu ma min al-rusul al-gaaʼidiin fi Madiinat al-Khudus al-raakho maʼa al-Masiih min al-awwal. Wa be gudrat al-Ruuh al-Khudduus, al-Rasuul Buulus katab al-jawaab da. Wa hu wassaf kadar hu rasuul be izin Allah wa l-bichaara al-ballakhaaha leehum hi kalaam Allah. Wa hu fassar leehum kadar al-Yahuud zaathum ma yabgo saalihiin be tabbigiin churuut al-Tawraat. Laakin Allah yisawwi al-naas saalihiin be sabab iimaanhum be l-Masiih wa beyah hu bas yinajjiihum. Achaan da, kan naadum yidoor yabga saalih be l-tahuura walla be tabbigiin churuut al-Tawraat, hu khalla derib al-iimaan wa be misil da, hu ma yabga saalih giddaam.
Wa khalaas Buulus rassal al-jawaab da le talaamiizah al-fi Khalaatiya. Wa baʼad da, hu wa Barnaaba macho fi Madiinat al-Khudus wa achchaawaro maʼa l-rusul wa l-chuyuukh. Kulluhum astafago kadar kalaam hana Hizib al-Tahuura da ma yanfaʼ.
Wa Hizib al-Tahuura hassaʼ haaliiyan bigi ma fiih laakin fi kulla muddit taariikh al-Masiihiiya, fiyah naas misilhum. Humman bidooru bisawwu cheyy misil Hizib al-Tahuura dawwaro bisawwuuh. Bidooru biziidu fi bichaarat al-Masiih kalaam aakhar. Buguulu iimaan be l-Masiih wiheedah ma yakfi. Bidooru biziidu le l-iimaan wasaaya walla churuut walla aadaat achaan beehum al-naas yabgo saalihiin. Be misil da, humman bintaku fi gudrat al-naas wa ma fi gudrat al-Ruuh al-Khudduus. Wa be l-sahiih, Isa al-Masiih ja fi l-dunya wa maat fi l-saliib wa baʼas achaan al-naas yabgo iyaal Allah aaychiin be gudrat al-Ruuh al-Khudduus. Wa hu ma ja achaan yukhutt fooghum diin hana wasaaya wa gawaaniin wa aadaat. Wa l-jawaab da ankatab achaan zamaan, fi muchkila fi balad waahide wa laakin taʼliimah indah faayde fi ayyi bakaan wa ayyi wakit. Khalli ayyi naadum al-yagriih yalga niʼmat Allah al-fi l-Masiih. Aamiin.