Jawaab al-Rasuul Buulus le Khalaatiya
1
Jawaab minni ana Buulus al-bigiit rasuul ma be izin al-naas wa la be niiyithum,
laakin be izin Isa al-Masiih wa Allah abuuh al-baʼasah min ust al-maytiin.
2 Al-jawaab da jaayi minni wa min kulla l-akhwaan al-maʼaayi wa hu le jamaaʼaat al-muʼminiin al-fi balad Khalaatiya.
3 Aleekum al-salaam wa l-rahma min Allah Abuuna wa Rabbina Isa al-Masiih
4 al-gaddam nafsah dahiiye fi chaan zunuubna achaan yinajjiina min charr al-dunya di be muraadat Allah Abuuna.
5 Wa l-hamdulillah daayman wa ila l-abad.
Aamiin.
Bichaarat al-Masiih hi kalaam waahid
6 Ana ajjabt leeku bilheen.
Allah naadaaku achaan tiʼiichu be niʼmat al-Masiih wa ajala ke intu gammeetu khalleetuuh achaan tidooru titaabuʼu bichaara aakhara.
7 Wa be l-sahiih,
ma fi bichaara aakhara laakin naas waahidiin gammo yibarjuluuku be kalaamhum wa yidooru yitallufu bichaarat al-Masiih.
8 Wa kan ayyi naadum minnina walla malak min malaaʼikat Allah yaji yiballikh leeku bichaara fi l-Masiih chig min al-bichaara al-ballakhnaaha leeku di,
khalli Allah yanʼalah marra waahid.
9 Gulnaah gibeel wa hassaʼ nuguulah battaan,
kan naadum yiballikh leeku fi l-Masiih bichaara chig min al-bichaara al-awwal simiʼtuuha di,
khalli Allah yanʼal al-naadum da marra waahid.
10 Chunu fikirku fi l-kalaam da ?
Nidoor nalga beyah rida min al-naas walla rida min Allah ?
Nidoor naʼajib al-naas walla ?
Nuguulu leeku kan ana lissaaʼ gaaʼid naʼajib al-naas,
ana ma abid al-Masiih.
Bichaarat al-Masiih jaat min Allah zaatah
11 Ya akhwaani,
nidoor kadar intu taʼarfu al-bichaara al-ballakhtaha leeku ma jaat min al-naas.
12 Wa naadum ma antaaha leyi wa ma fi naadum garraani leeha.
Nazalat leyi wakit Allah bayyan leyi Isa al-Masiih.
13 Akiid taʼarfu haali wakit ana lissaaʼ nitaabiʼ diin al-Yahuud.
Simiʼtu ana haarabt ummat al-Masiih al-Allah ikhtaarha be chidde wa dawwart nidammirha marra waahid.
14 Wa fi diin al-Yahuud,
ana faayit naas katiiriin al-ana maʼaahum umurna sawa achaan ana munkarib bilheen fi aadaat juduudna.
15 Laakin gubbaal ma wildooni kula,
Allah ikhtaaraani achaan nabga be niʼmatah rasuul.
Wa fi l-wakit al-Allah gataʼah leyi,
16 hu bayyan Ibnah fi galbi achaan nibachchir beyah fi buldaan hana l-naas al-ma Yahuud.
Wa ana ma gammeet chaawart ayyi insaan.
17 Wa ma macheet lammeet maʼa l-naas al-bigo rusul gubbaali al-gaaʼidiin fi Madiinat al-Khudus.
Laakin futt tawwaali fi daar al-Arab wa baʼadeen gabbalt fi madiinat Dimachkh.
18 Wa baʼad talaata sana,
khalaas macheet Madiinat al-Khudus achaan nilʼaarafo maʼa Butrus.
Wa gaʼadt maʼaayah khamistaachar yoom.
19 Laakin ma chift naadum aakhar min al-rusul illa chift Yaakhuub akhu al-Rabb Isa.
20 Wa kulla l-kalaam al-katabtah leeku da sahiih.
Allah yaʼarif kalaami ma kidib.
21 Wa baʼad da,
gammeet nuruukh fi Suuriya wa Kilikiiya.
22 Wa fi l-wakit da,
jamaaʼaat al-Masiihiyiin al-fi daar al-Yahuudiiya lissaaʼhum ma chaafooni.
23 Simʼo al-khabar bas al-buguul «
Al-naadum al-awwal haarabaana gaaʼid yiballikh le l-naas be l-iimaan al-awwal dawwar yidammirah ».
24 Wa chakaro Allah fi chaani.