Al-rusul sabbato Buulus fi khidimtah
2
Wa battaan baʼad arbaʼtaachar sana,
ana macheet Madiinat al-Khudus marra taaniye.
Wa Barnaaba kula macha maʼaayi wa chilna maʼaana akhuuna Tiitus.
2 Macheet be sabab ruʼya min Allah.
Wa macheet le kubaaraat al-muʼminiin al-maʼruufiin wa lammeet maʼaahum fi malamma wiheedna.
Wa gaddamt leehum al-bichaara al-ballakhtaha fi ust al-naas al-ma Yahuud.
Dawwart niʼakkid kadar al-khidme al-awwal sawweetha wa l-hassaʼ gaaʼid nisawwiiha ma tabga baatle.
3 Wa Tiitus zaatah al-gaaʼid maʼaayi hu Yuunaani wa ma Yahuudi wa laakin ma jabaroona achaan nitahhuruuh.
4 Hajjeena fi suʼaal al-tahuura achaan akhwaan waahidiin ma muʼminiin be l-sahiih andasso ambeenaatna.
Jo be talbiid yijaasusu fi l-hurriiye al-indina be l-Masiih Isa achaan dawwaro yarbutu foogna aadaat al-Yahuud lahaddi nabgo misil abiid.
5 Laakin aniina abeenaahum marra waahid ma simiʼna kalaamhum achaan dawwarna nahfado leeku al-kalaam al-sahiih al-Allah antaana fi bichaarat al-Masiih.
6 Wa hajjeena maʼa l-naas al-kubaaraat fi fikir akhwaanna.
Wa kan humman kubaaraat walla ma kubaaraat,
da ma lammaani.
Giddaam Allah kulla l-naas sawa sawa.
Wa humman ma zaado le kalaami cheyy waahid.
7 Be l-aks,
bigi leehum waadih kadar Allah kallafaani be ballikhiin bichaarat al-Masiih le l-naas al-ma Yahuud misil hu kallaf Butrus be ballikhiin bichaarat al-Masiih le l-Yahuud.
8 Wa misil Allah ikhtaar Butrus wa sawwaah rasuul le l-Yahuud,
hu ikhtaaraani ana kula wa sawwaani rasuul le l-ma Yahuud.
9 Wa l-ruʼasa al-maʼruufiin Yaakhuub wa Butrus wa Yuuhanna bigi leehum waadih kadar Allah antaani al-niʼma di.
Wa khalaas,
karaboona be l-iid al-zeene wa sallamoona ana wa Barnaaba achaan yiwassufu aniina kullina muchtarikiin fi l-khidme.
Wa astafago kadar aniina nakhdumu fi ust al-naas al-ma Yahuud wa humman yakhdumu fi ust al-Yahuud.
10 Talabo minnina cheyy waahid bas.
Dawwaro aniina nifakkuru fi l-masaakiin al-maʼaahum.
Wa da bas al-cheyy al-min awwal niriid nisawwiih.
Buulus kachcha le Butrus
11 Laakin wakit Butrus ja fi Antaakiya,
ana khattamt leyah wa aaradtah achaan hu khaltaan.
12 Gubbaal naas waahidiin ma yaju min bakaan Yaakhuub,
Butrus gaaʼid yaakul maʼa l-akhwaan al-ma Yahuud.
Laakin min al-naas dool jo khalaas,
hu bada yikiss min al-naas al-ma Yahuud wa anfarag minhum achaan hu khaayif min Hizib al-Tahuura*.
13 Wa akhwaan aakhariin min al-Yahuud taabaʼooh fi l-nifaakh da lahaddi waddo maʼaahum Barnaaba zaatah fi nifaakhhum.
14 Laakin wakit ana chift kadar humman ma maachiin adiil wa ma yitaabuʼu al-kalaam al-sahiih al-Allah antaana fi bichaarat al-Masiih,
gammeet hajjeet le Butrus giddaamhum kulluhum.
Wa gult «
Inta Yahuudi wa bigiit misil naadum ma Yahuudi wa khalleet minnak aadaat al-Yahuud.
Wa misil da,
maala tidoor tajbur al-naas al-ma Yahuud yabgo misil al-Yahuud ? ».
Nabgo saalihiin be sabab al-iimaan
15 Aniina zaatna mawluudiin Yahuud wa ma min al-muznibiin al-ma Yahuud dool.
16 Wa be da kula,
naʼarfu kadar Allah ma yajʼal ayyi naadum saalih achaan hu yitaabiʼ churuut al-Tawraat.
Laakin hu yajʼal al-naadum saalih kan hu muʼmin be l-Masiih.
Wa be misil da,
aniina aamanna be l-Masiih Isa achaan Allah yajʼalna saalihiin be sabab iimaanna be l-Masiih wa ma achaan nitaabuʼu churuut al-Tawraat.
Achaan ma fi insaan waahid yabga saalih giddaam Allah be tabbigiin churuut al-Tawraat.
17 Laakin kan chilna derib al-Masiih achaan nabgo saalihiin wa be da al-Yahuud buguulu foogna aniina muznibiin,
hal nuguulu al-Masiih hu sabbab zunuub walla ?
La,
abadan.
18 Laakin kan ana nigabbil wa nitaabiʼ battaan al-aadaat al-awwal khalleethum minni,
misil da bas nabga khaati be l-sahiih.
19 Al-Tawraat sawwa foogi amalah wa khalaas,
fi l-cheyy al-bukhuss churuut al-Tawraat ana mayyit.
Wa ana mutt le churuutah achaan nugumm niʼiich le Allah.
Ana mutt maʼa al-Masiih fi saliibah.
20 Wa hassaʼ da,
al-naadum al-hayy ma ana laakin al-Masiih hu hayy fiyi.
Wa kulla cheyy al-nisawwiih fi l-dunya,
nisawwiih hasab al-iimaan fi Ibn Allah al-habbaani lahaddi anta nafsah dahiiye fi chaani.
21 Abadan ana ma nankur niʼmat Allah.
Kan al-naas yabgo saalihiin be tabbigiin churuut al-Tawraat,
misil da al-Masiih maat bala sabab.