Inzaar al-rasuul
13
Wa hassaʼ da,
namchi leeku taalit marra.
Wa da yabga misil al-cheyy al-maktuub fi l-Kitaab <Chuhuud itneen aw talaata yisabbutu ayyi kalaam>.
2 Wa l-cheyy al-ana gultah wakit ana gaaʼid maʼaaku al-marra al-taaniye,
nuguulah leeku battaan hassaʼ ana khaayib minku.
Ana gult le l-naas al-aznabo wa le kulla l-aakhariin kan najiiku battaan,
ma niʼaddibhum be nafas baarid.
3 Tidooru al-daliil al-yiwassif kadar al-Masiih yihajji leeku be waastiti ana wa daahu ana niwassifah leeku.
Hu ma daʼiif fi l-cheyy al-yisawwiih leeku wa akiid hu yiwassif gudurtah fi usutku.
4 Sahiih,
al-Masiih khalla minnah al-gudra wa maat fi l-saliib laakin hu hayy be gudrat Allah.
Wa fi alaakhitna maʼaayah,
aniina ma indina gudra hintina laakin nahyo maʼaayah be gudrat Allah wa be l-gudra di niʼaamuluuku.
5 Asʼalo nufuusku.
Hal be l-sahiih ke intu muʼminiin ?
Jarrubu nufuusku.
Ma taʼarfu kadar Isa al-Masiih gaaʼid fiiku walla ?
Wa da yabga sahiih kan ma fachaltu marra waahid.
6 Wa nitmanna taʼarfu aniina ma fachalna.
7 Wa nasʼalo Allah achaan intu ma tisawwu ayyi khata.
Wa suʼaalna da,
ma achaan al-naas yichiifu najaahna laakin achaan intu tisawwu al-kheer,
hatta kan naas waahidiin buguulu aniina fachalna kula.
8 Achaan aniina ma nagdaro nisawwu cheyy didd al-hagg illa le l-hagg.
9 Wa kan aniina ma indina gudra wa intu bas induku,
khalaas aniina farhaaniin.
Wa nasʼalo Allah leeku achaan intu tabgo muʼminiin kaamiliin.
10 Wa khalaas,
naktib leeku al-kalaam da wakit ana khaayib minku achaan wakit ana gaaʼid maʼaaku ma waajib leyi nahrijku.
Achaan al-sulta al-Rabbina antaani foogku hi le nigawwiiku fi l-iimaan wa ma le nikharribku.
Nihaayat al-jawaab
11 Wa khalaas,
ya akhwaani,
afraho.
Abgo muʼminiin kaamiliin.
Achchaajaʼo ambeenaatku.
Khalli fikirku yabga waahid.
Iichu be l-salaam wa Allah siid al-mahabba wa l-salaam yagood maʼaaku.
12 Assaalamo ambeenaatku be salaam al-saalihiin.
13 Kulla l-akhwaan al-saalihiin al-maʼaayi yisallumuuku.
14 Khalli niʼmat Rabbina Isa al-Masiih wa mahabbat Allah wa l-ukhuwwa al-jaaye min al-Ruuh al-Khudduus yagoodu saabtiin foogku kulluku.