Ruʼya hana Buulus wa chookah
12
Al-fachaar da ma indah faayde laakin kan laabudda nilfachchar,
nihajji be l-ruʼya wa l-asraar al-Allah kachafaahum leyi.
2 Ana naʼarif muʼmin waahid be l-Masiih wa yoom waahid,
gabul arbaʼtaachar sana,
hu anrafaʼ lahaddi l-sama al-aali.
Kan anrafaʼ be jismah walla bala jismah,
da ma naʼarfah.
Illa Allah wiheedah yaʼarfah.
3 Wa ana naʼarif kadar al-naadum da anrafaʼ fi l-Janna.
Kan be jismah walla bala jismah,
da ma naʼarfah.
Illa Allah wiheedah yaʼarfah.
4 Wa hu simiʼ asraar faaytiin fikir al-naas wa ma fi insaan indah izin yihajji beehum.
5 Wa fi chaan naadum misil da nilfachchar laakin fi chaani ana ma nilfachchar illa nihajji be l-gudra al-ma indi.
6 Wa kan nilfachchar kula,
ana ma naadum al-ma indah fikir achaan kalaami sahiih.
Laakin naaba ma nilfachchar achaan ma nidoor ayyi naadum yifakkir foogi cheyy ziyaada min al-chaafah fi khidimti be eenah wa simʼah minni be adaanah.
7 Akiid,
ana chift ruʼya ajiibe bilheen wa Allah ma yidoor ana nistakbar be sababha.
Wa achaan da,
Allah antaani cheyy waahid al-gaaʼid yitaʼʼibni misil chook fi lahami wa misil mursaal hana l-Cheetaan al-gaaʼid yuduggini.
Wa antaani al-taʼab da achaan ma nistakbar.
8 Wa talaata marraat ana daʼeet Rabbina Isa wa chahadtah achaan yarfaʼah minni.
9 Wa laakin hu radda leyi wa gaal «
Niʼmati takfi leek.
Gudurti tabga kaamile fi l-naadum al-ma indah gudra ».
Achaan da,
nilfachchar be farah ziyaada fi l-gudra al-ana ma indi achaan gudrat al-Masiih tasbut foogi.
10 Achaan da,
ana nafrah wakit ma indi gudra wa wakit yiʼayyuruuni wa yitaʼʼubuuni wa yaturduuni wa yidaayuguuni fi chaan ana taabiʼ al-Masiih.
Achaan wakit ma indi gudra,
fi l-bakaan da bas,
al-gudra gaaʼide foogi.
11 Khalaas,
ana hajjeet leeku misil naadum ma indah fikir.
Intu lazzeetuuni achaan nuguul al-kalaam da.
Wa intu bas al-naas al-waajib yikarrumuuni achaan ana ma sakhayyar be ayyi cheyy min al-rusul al-intu tuguulu humman al-kubaar,
kan ana naadum ma naafiʼ kula.
12 Intu chiftu al-daliil al-yisabbit kadar ana rasuul wakit khadamt fi usutku.
Chiftu al-sabur al-gawi wa l-alaamaat wa l-ajaayib wa amal Allah.
13 Hal ligiitu minni faayde chiyya min al-faayde al-ligooha al-muʼminiin al-fi l-bakaanaat al-aakhariin ?
Cheyy waahid bas ana ma sawweetah wa hu ana ma kallaftuku be diifti.
Wa da jariime.
Saamuhuuni !
Al-ziyaara al-taalta
14 Khalaas,
daahuuni jaahiz namchi leeku taalit marra.
Wa ana ma nabga leeku tagiil achaan al-nidoorah ma maalku.
Nidoorku intu.
Achaan al-iyaal ma yudummu maal fi chaan waaldeenhum.
Al-waaldeen bas waajib yudummu maal fi chaan iyaalhum.
15 Wa fi chaanku intu,
nanti be farah kulla cheyy al-indi wa nanti nafsi fi chaanku battaan.
Kan nihibbuku katiir,
hal intu tihibbuuni chiyya walla ?
16 Khalaas,
tuguulu sahiih ana ma kallaftuku be diifti.
Laakin waahidiin yuguulu ana najiid wa akaltuku be najaada.
17 Wa hal chilt minku cheyy be waasitat al-akhwaan al-ana rassaltuhum leeku ?
18 Ana talabt min Tiitus achaan yamchi leeku wa rassalt maʼaayah al-akhu al-aakhar.
Wa hal Tiitus chaal cheyy minku be khachch walla ?
La.
Haalah wa haali ma sawa walla ?
Aniina ma khadamna be nafs al-tariiga walla ?
19 Akuun intu tuguulu fi guluubku aniina gulna kulla l-kalaam da achaan aniina nidaafuʼu le nufuusna giddaamku.
La,
ma ke.
Nihajju leeku be usum al-Masiih giddaam Allah.
Ya akhwaanna al-nihibbuuku,
kulla cheyy al-sawweenaah da,
hu fi chaanku bas achaan iimaanku yabga gawi.
20 Wa hassaʼ ana khaayif achaan wakit najiiku,
intu ma tukuunu misil ana nidoorah wa ana kamaan ma nukuun misil intu tidooruuh.
Akuun nalga ambeenaatku al-duwaas wa l-husud wa l-zaʼal wa l-tamaʼ wa l-namiime wa l-guwaale wa l-istikbaar wa l-barjaal.
21 Akuun wakit najiiku,
Allah yijiib leyi battaan al-eeb giddaamku.
Wa nahzan fi chaan al-naas al-katiiriin al-awwal aznabo wa ma taabo min al-haal al-khabiise wa l-zina wa l-fasaad al-awwal sawwoohum.