Haal al-rasuul al-sahiih
11
Chiilu sabur achaan hassaʼ nidoor nihajji leeku chiyya misil naadum ma indah fikir.
Chiilu sabur bas.
2 Ana zaʼlaan fi chaanku wa zaʼali da jaayi min Allah.
Ana misil abu hana bineeye lissaaʼ ma chaafat raajil wa intu bas al-bineeye.
Wa ana sawweet mawʼid achaan al-bineeye di taakhud raajil waahid wa hu al-Masiih.
Wa nidoor nigaddimku leyah misil bineeye al-ma indaha eeb.
3 Laakin naʼarfu kadar al-daabi khachcha Hawwa be najaadtah wa hassaʼ ana khaayif leeku.
Akuun naadum yitallif fikirku wa ma titaabuʼu al-Masiih be mahabba sahiihe wa mukhlisa.
4 Ana khaayif achaan kan naadum yamchi leeku wa yiballikh leeku Isa aakhar chig min Isa al-aniina ballakhnaaku beyah,
intu takhbalooh.
Wa intu jaahiziin achaan takhbalo ruuh chig min al-Ruuh al-Khudduus al-awwal khibiltuuh.
Wa kan naadum yiballikh leeku bichaara chig min al-bichaara al-awwal khibiltuuha,
intu titaabuʼuuh ajala.
Wa tasburu le l-naadum al-misil da.
5 Wa l-rusul al-intu tuguulu humman kubaar dool,
ana nuguul ana ma sakhayyar minhum be cheyy.
6 Sahiih,
ana ma nikallim kalaam saʼab misil kalaam al-ulama laakin ilmi chadiid bilheen.
Wa da waddahnaah leeku kulluku fi kulla cheyy.
7 Wa taʼarfu kadar ma talabt minku gurus wakit ballakht leeku bichaarat Allah.
Wa be misil da,
ana sawweet nafsi sakhayyar achaan intu tabgo kubaar.
Wa hassaʼ tuguulu da khata minni ana walla ?
8 Haay !
Ana chilt musaaʼada min muʼminiin balaaku achaan nakhdim leeku.
Wa da misil ana sirigt minhum fi chaanku.
9 Wa wakit ana maʼaaku wa bigiit hawjaan,
ana ma kallaft ayyi naadum minku.
Al-akhwaan al-jo min Magiduuniya bas saaʼadooni fi l-cheyy al-gassar leyi.
Wa ana abeet ma kallaftuku be ayyi cheyy al-dawwartah wa abadan ma nikallifku.
10 Wa be l-kalaam al-sahiih hana l-Masiih al-gaaʼid foogi,
nuguul leeku naadum waahid ma yadharni min al-farha di fi ayyi bakaan fi l-Yuunaan.
11 Wa maala ma nikallifku ?
Achaan ma nihibbuku walla ?
Allah yaʼarif kadar ana nihibbuku bilheen.
12 Wa ana nakhdim daayman misil ana khadamt min awwal.
Wa misil da,
al-naas al-yifaachuru be khidmithum ma yalgo fursa yuguulu humman rusul sawa sawa maʼaayi.
13 Al-fachchaariin dool humman ma rusul be l-sahiih.
Humman khaddaamiin khachchaachiin wa yisawwu nufuushum yichaabuhu rusul al-Masiih.
14 Wa waajib ma tiʼajjubu min al-kalaam da,
achaan Ibliis zaatah yisawwi nafsah yichaabih malaaʼikat al-nuur.
15 Wa kan khaddaamiin Ibliis kula yisawwu nufuushum yichaabuhu khaddaamiin Allah al-saalihiin,
ma niʼajjubu minhum.
Wa fi l-akhiir,
yalgo al-waajib leehum hasab khidmithum.
Taʼab al-rasuul al-sahiih
16 Wa nuguul battaan ma tahsubuuni ana naadum ma indah fikir.
Laakin kan fi fikirku ana naadum ma indi fikir kula,
akhbalooni bas.
Wa be da,
ana nagdar nilfachchar chiyya.
17 Wa l-kalaam al-nuguulah be fachaar da ma misil Rabbina yidoorah laakin misil kalaam hana naadum ma indah fikir.
18 Akiid naas katiiriin yilfachcharo be l-cheyy al-bukhuss al-bachar wa ana kula nilfachchar misilhum.
19 Achaan ana chift kadar intu al-tuguulu fikirku gawi tahmalo be farah al-naas al-ma induhum fikir.
20 Wa intu tahmalo al-naadum al-yisawwiiku abiidah walla yaakul maalku walla yasrig minku be l-khachch walla yistakbar giddaamku walla yudugguku amkaff.
21 Wa kan da bas al-cheyy al-yisawwuuh al-rusul al-gawiiyiin,
sahiih aniina ma gawiiyiin wa da eeb leena.
Wa laakin kan naadum yidoor yilfachchar be ayyi cheyy,
ana nilfachchar mislah.
Chiftu ?
Ana nihajji misil ma indi fikir.
22 Buguulu humman Yahuud walla ?
Ana kula Yahuudi.
Humman min Bani Israaʼiil walla ?
Ana kula min Bani Israaʼiil.
Humman min zurriiyit Ibraahiim walla ?
Ana kula min zurriiyit Ibraahiim.
23 Humman khaddaamiin al-Masiih walla ?
Chiftu ?
Hassaʼ nihajji misil raasi laffa marra waahid !
Ana khaddaam akheer minhum.
Khadamt be chidde ziyaada minhum.
Karabooni fi l-sijin ziyaada minhum.
Farachooni ziyaada minhum.
Wa gaʼadt fi ust al-moot katiir.
24 Al-Yahuud jaladooni khamsa marraat wa fi ayyi jalde tisʼa wa talaatiin darba*.
25 Al-Roomaaniyiin farachooni talaata marraat be asaay.
Wa l-naas rajamooni marra waahide.
Talaata marraat ana musaafir be safiina wa l-safiina ankasarat beyi fi ust al-bahar.
Yoom waahid ana gaʼadt fi ust al-bahar yoom kaamil leel wa nahaar.
26 Ana saafart katiir bilheen wa waajaht khutuura katiire.
Khutuura wakit ana gaatiʼ al-buhuur wa khutuura min rabbaatiin al-duruub.
Wa khutuura fi usut naasi al-Yahuud wa khutuura fi ust al-naas al-ma Yahuud.
Wa khutuura fi l-hillaal wa khutuura fi l-kadaade wa khutuura fi ust al-bahar al-maalih.
Wa khutuura fi ust al-muʼminiin al-khaayniin.
27 Ana khadamt be duraaʼi wa tiʼibt wa fagadt daayman al-noom wa l-akil wa l-churaab.
Wa katiir ke al-barid lihigaani wa khulgaan gassaro leyi.
28 Wa battaan,
fi cheyy aakhar.
Kulla ma yoom,
al-hamm al-chadiid yakrubni fi chaan al-muʼminiin al-fi ayyi bakaan.
29 Kan akhu waahid taʼbaan,
ana kula taʼbaan.
Kan naadum maragooh min al-derib,
ana nihiss be naar.
30 Kan waajib nilfachchar,
nilfachchar be l-cheyy al-yiwassif kadar ana ma indi gudra.
31 Wa Allah abu Rabbina Isa,
hu al-waajib leyah al-chukur ila l-abad,
yaʼarif kadar kalaami ma kidib.
32 Wakit ana gaaʼid fi madiinat Dimachkh,
dawwaro yakurbuuni.
Wa fi l-wakit daak,
haakim al-madiina al-kallafah al-malik Al-Haaris rassal askarah achaan yaharsu kulla biibaan al-madiina achaan ma namrug.
33 Wa ana da,
al-akhwaan dallooni be chabaka min chubbaak waahid al-gaaʼid fi durdur al-madiina wa misil da bas nijiit minnah*.