Radd al-rasuul le khusmaanah
10
Ana Buulus al-buguulu foogi ana nimaskin nafsi wakit ana gaaʼid maʼaaku wa laakin kalaami haarr wakit ana khaayib minku.
Wa ana nihannisku be usum al-Masiih al-maskan nafsah wa kalaamah daayman baarid.
2 Nitmanna achaan wakit najiiku ma tiluzzuuni lahaddi nihajji leeku be kalaam haarr.
Ma nidoor nihajji leeku misil nihajji le l-naas al-waahidiin al-buguulu foogna aniina nitaabuʼu haal naas al-dunya.
3 Sahiih,
aniina aaychiin fi l-dunya laakin ma nihaarubu misil naas al-dunya.
4 Wa l-silaah al-nihaarubu beyah ma silaah hana al-naas.
Gudrat silaahna min Allah wa beyah nidammuru khidmit Ibliis al-gawiiye.
Nifachchulu munaakhachaat al-naas
5 wa ayyi kalaam hana l-istikbaar al-yisidd al-derib al-beyah al-naas yaʼarfu Allah.
Wa nakurbu ayyi fikra wa nisawwuuha titaabiʼ kalaam al-Masiih.
6 Wa nidooru intu titaabuʼu kalaam al-Masiih tamaam.
Wa fi l-wakit daak,
aniina jaahiziin achaan niʼaddubu ayyi naadum be sabab amalah hana l-isyaan.
7 Intu gaaʼidiin tifakkuru fi l-cheyy al-gaaʼid waadih giddaamku bas.
Ayyi naadum kan hu muʼakkid hu hana l-Masiih,
khalli yifakkir.
Kan hu hana l-Masiih,
aniina kula hana l-Masiih.
8 Wa kan nilfachchar chiyya be l-sulta al-Rabbina antaani foogku,
da ma eeb leyi.
Hu antaani al-sulta di achaan nigawwiiku fi l-iimaan wa ma achaan nikharribku.
9 Wa ma indi niiye nikhawwifku be jawaabaati.
10 Hatta kan naas waahidiin yahguruuni wa yuguulu foogi «
Kalaam Buulus fi jawaabaatah haarr wa gawi.
Laakin wakit hu zaatah haadir maʼaana,
hu ma indah gudra wa kalaamah ma indah faayde ».
11 Wa khalli al-naas al-buguulu al-kalaam da yaʼarfu kadar al-cheyy al-katabnaah wakit aniina khaaybiin minhum,
nisawwuuh wakit aniina haadiriin maʼaahum.
12 Aniina abadan ma nukhuttu nufuusna fi nafs al-saff maʼa naas waahidiin al-yisawwu nufuushum kubaar.
Ma nidooru nigaaduru nufuusna maʼaahum.
Humman gaaʼidiin yigaaduru nufuushum be nufuushum wa yigaaduru nufuushum ambeenaathum.
Wa be da,
yiwassufu kadar humman mataamiis.
13 Laakin aniina ma nilfachcharo ziyaada.
Naʼarfu huduudna.
Nihajju be l-khidme al-sawweenaaha fi l-turaab al-gaaʼid fi l-huduud al-Allah jaʼalaahum leena.
Wa akiid intu kula gaaʼidiin fi bakaan al-khidme al-Allah jaʼalaaha leena.
14 Wa ma futna khaadi min huduudna wakit macheena lahaddi hillitku.
Wa aniina bigiina al-awwalaaniyiin al-ballakho leeku bichaarat al-Masiih.
15 Wa aniina ma nufuutu khaadi min huduudna fi l-kalaam al-nuguuluuh fi l-khidme,
yaʼni ma nisawwu nufuusna kubaar fi l-khidme al-sawwooha naas aakhariin.
Laakin nitmannu kadar iimaanku yiziid wa khidmitna ambeenaatku kula tiziid marra waahid.
16 Wa khalaas,
namchu fi l-buldaan al-khaadi minku wa niballukhu fooghum al-bichaara.
Wa ma nakhdumu fi ayyi bakaan al-naadum aakhar ballakh foogah al-bichaara gabulna.
Wa misil da,
abadan ma nisawwu nufuusna kubaar be l-khidme al-sawwaaha naadum aakhar fi l-bakaan al-Allah antaah leyah.
17 Wa l-Kitaab buguul <Khalli naadum ma yisawwi nafsah kabiir.
Akheer yuguul Allah bas al-kabiir>.
18 Achaan al-naadum al-Allah yachhad leyah,
hu bas al-Allah khiblah wa ma yakhbal al-naadum al-yachhad le nafsah.