Al-musaaʼada wa l-juud al-waajib
9
Wa be l-sahiih,
ma waajib leyi naktib leeku fi l-cheyy al-bukhuss al-musaaʼada al-nidooru niwadduuha le l-akhwaan al-saalihiin al-fi Madiinat al-Khudus.
2 Ana naʼarif niiyitku chadiide.
Wa ana hajjeet beeha raasi marfuuʼ le akhwaanna al-hini fi Magiduuniya wa gult leehum kadar intu al-fi l-Yuunaan jaahiziin min al-sana al-faatat.
Wa khabar hana hamiisitku chajjaʼ katiiriin minhum achaan yantu.
3 Wa hassaʼ rassalt al-akhwaan al-talaata dool be l-jawaab da,
achaan niʼakkid kadar al-kalaam al-gultah fi niiyitku ma yabga kidib.
Nidoor intu tabgo jaahiziin misil ana awwal gultah.
4 Kan najiiku maʼa akhwaan waahidiin min Magiduuniya wa intu ma jaahiziin,
al-akhwaan yichiifu kadar intu ma jaahiziin.
Wa l-eeb yisawwiina achaan achamna foogku fachal.
Wa l-eeb yisawwiiku ziyaada.
5 Achaan da,
fi fikri ana waajib niwassi al-akhwaan dool yamchu leeku giddaami wa yinazzumu maʼaaku atiiyitku al-gultu tantuuha be juud.
Wa misil da,
wakit naju al-atiiye tukuun jaahize wa tantuuha leena be niiyitku wa ma misil jabarnaaku jabaraan.
6 Wa ma tanso kadar al-naadum al-yiteerib chiyya yilimm chiyya wa l-yiteerib katiir yagtaʼ katiir.
7 Khalli ayyi naadum minku yanti hasab al-niiye al-chaalaaha fi galbah.
Khalli ma yanti cheyy bala niiyitah wa ma misil naadum asarooh asaraan achaan Allah yihibb al-naadum al-yanti be farah.
8 Wa Allah yagdar yantiiku niʼma be ziyaada lahaddi fi ayyi wakit induku al-yakfi leeku achaan tichaaruku ziyaada fi ayyi amal hana l-kheer.
9 Wa yabga misil al-kalaam al-maktuub fi l-Kitaab al-buguul fi l-naadum al-saalih <Hu yanti be juud le l-masaakiin wa kheerah ma binnasi abadan>.
10 Wa Allah al-yanti al-teeraab le l-harraati wa maʼaach le l-naas,
hu yikattir leeku teeraabku achaan talgo katiir wa tantu ziyaada wa yiziidku baraka.
11 Wa Allah yiziid leeku kulla cheyy achaan anteetu be juud wa wakit niwaddu atiiyitku le Madiinat al-Khudus,
al-naas yachkuru Allah.
12 Achaan al-khidme al-tisawwuuha le Allah di ma tisaaʼid al-saalihiin al-hawjaaniin bas.
Hi tikattir chukur al-naas al-yigaddumuuh le Allah kula.
13 Wa naas katiiriin yimajjudu Allah achaan al-khidme al-tisawwuuha le Allah di tabga al-daliil al-yiwassif kadar intu muʼminiin be bichaarat al-Masiih wa titaabuʼuuh adiil.
Wa yimajjudu Allah achaan anteetuuhum wa anteetu le naas aakhariin be juud.
14 Wa yasʼalo Allah leeku wa yiriiduuku be mahabba chadiide be sabab niʼmat Allah al-aziime al-antaaha leeku.
15 Wa l-hamdulillah,
al-atiiye al-hu antaaha ma tilwassaf.