Al-juud
8
Ya akhwaani,
nidoor niʼooriiku be l-niʼma al-Allah antaaha le l-muʼminiin al-gaaʼidiin hini fi balad Magiduuniya.
2 Suʼuuba chadiide gaaʼide tijarrib iimaanhum laakin humman farhaaniin farha chadiide.
Wa wakit humman fagraaniin fagur chadiid,
anto be juud.
3 Wa nachhad leehum kadar humman anto hasab gudrithum wa anto ziyaada min gudrithum kula be niiyithum.
4 Wa talabo minnina be chidde achaan nantuuhum fursa le yichaaruku fi l-musaaʼada le l-akhwaan al-saalihiin.
5 Wa humman sawwo ziyaada min al-dawwarnaah minhum.
Chaalo niiye achaan yitaabuʼu muraadat Rabbina wa battaan chaalo niiye achaan yitaabuʼu adiil kalaamna misil Allah yidoorah.
6 Achaan da,
talabna min Tiitus hu yikammil maʼaaku khidmit al-niʼma di al-hu awwal badaaha ambeenaatku.
7 Akiid intu bigiitu chudaad fi kulla cheyy.
Intu chudaad fi l-iimaan wa l-kalaam wa l-ilim wa niiyitku chadiide wa mahabbitku al-ligiituuha minnina chadiide.
Wa hassaʼ abgo chudaad fi khidmit al-niʼma di kula.
8 Wa fi l-cheyy al-bukhuss al-musaaʼada,
ma naamurku beyah.
Ana gaaʼid niʼooriiku be khabar al-niiye al-chadiide hana al-akhwaan al-aakhariin achaan nijarribku.
Nantiiku fursa achaan tiwassufu kadar mahabbitku mukhlisa.
9 Achaan niʼmat Rabbina Isa al-Masiih taʼarfuuha.
Awwal hu khani.
Wa fi chaanku intu,
hu bigi fagri achaan be fagrah intu tabgo khaniyiin be barakat Allah.
10 Wa fi l-cheyy al-bukhuss al-kalaam da,
niʼooriiku be fikri.
Akheer tikammulu hassaʼ al-khidme al-badeetuuha al-sana al-faatat achaan intu bas al-awwalaaniyiin fi l-khidme di.
Wa ziyaada min da,
intu al-awwalaaniyiin al-induku niiye achaan tisawwu al-khidme di.
11 Wa khalaas kammuluuha.
Wa kammuluuha be nafs al-niiye al-chadiide al-badeetuuha beeha.
Waajib tantu hasab gudritku.
12 Kan niiyitku adiile,
Allah yarda be l-cheyy al-tantuuh.
Al-ma fiih ma binlagi.
Hu yidoor intu tantu min al-maal al-induku bas.
13 Ma tifakkuru ana nidoor kadar yabga gaasi leeku wa hayyin le naas aakhariin.
Nidoor yabga leena kullina sawa sawa.
14 Fi l-wakit al-haali,
intu induku katiir wa humman hawjaaniin wa khalaas saaʼuduuhum.
Wa baʼadeen,
kan humman induhum katiir wa intu hawjaaniin,
humman kula yisaaʼuduuku wa yabga leena kullina sawa sawa.
15 Wa da yifakkirna be l-kalaam al-maktuub fi l-Kitaab al-buguul <Al-chaal katiir kula,
ma faddal leyah.
Wa l-chaal chiyya kula ma gassar leyah>.
Chahaada le Tiitus
16 Wa nuguul al-hamdulillah achaan Allah anta le Tiitus niiye chadiide misil niiyiti ana achaan yiʼaawinku.
17 Wa Tiitus ma khibil talabna bas.
Awwal kula,
hu be nafsah dawwar yamchi leeku be niiye chadiide.
18 Wa l-naadum al-nirassuluuh maʼaayah maʼruuf.
Al-muʼminiin fi ayyi bakaan yachkuruuh be sabab khidimtah fi ballikhiin bichaarat al-Masiih.
19 Wa ziyaada min da,
hu waahid min al-akhwaan al-ikhtaaroohum al-muʼminiin le yisaafuru maʼaana wakit aniina masʼuuliin fi cheeliin al-atiiye di.
Wa nisawwu al-khidme di achaan nimajjudu beeha Rabbina Isa wa niwassufu niiyitna al-mukhlisa.
20 Wa khatteena baalna achaan nikammulu adiil masʼuuliitna fi l-atiiye al-kabiire di,
fi chaan ma nijiibu foogna chakak min ayyi naadum.
21 Wa chilna niiye achaan nisawwu al-cheyy al-waajib ma giddaam Allah bas,
laakin giddaam al-naas kula.
22 Wa maʼa l-akhwaan al-itneen dool nirassulu leeku akhu aakhar.
Wa hu naadum jarrabnaah be khidme katiire.
Naʼarfu hu indah niiye le l-khidme.
Wa hassaʼ niiyitah zaadat bilheen achaan indah acham gawi foogku intu.
23 Wa Tiitus da,
hu rafiigi wa yakhdim maʼaayi achaan yiʼaawinku.
Wa akhwaanna al-maʼaayah dool,
humman mumassiliin hana jamaaʼaat al-muʼminiin.
Wa haalhum adiile lahaddi al-naas yimajjudu al-Masiih be sababhum.
24 Khalaas,
wassufuuhum mahabbitku achaan al-muʼminiin fi ayyi bakaan yaʼarfuuha wa yaʼarfu maala hajjeena beeku be raas marfuuʼ.